တၢ်ဟ့ၣ်ပလီၢ် “ထီၣ်န့ဒိၣ် ကလံၤမုၢ်သဝံး” (Tornado) လၢအလီၤပျံၤလီၤဖုးအဂ့ၢ်ဖဲလၢမုၢ်နၤယိာ် အကတီၢ်န့ၣ်, ပလဲၤတၢ်လၢသိလ့ၣ် အိၣ်ဝဲဒၣ် တဆံယဲၢ်နၣ်ရံၣ်လံန့ၣ်လီၤ. တၢ်ဟ့ၣ်ပလီၢ်စံးဘၣ်ပှၤလၢ ပကြၢးအိၣ်ဆိး တၢ်အိၣ်တဒၢအလီၢ်တကီၢ်ခါန့ၣ်လီၤ. ဒ်တၢ်ဟ့ၣ်ပလီၢ်ဆိအသိး, လီသီၣ်သထြုးလၢမူခိၣ်, ဒီးကလံၤအူတပျုာ်တပျီၤ ပသိလ့ၣ်အတြဲၤဖိတဖၣ်န့ၣ်လီၤ. ပနီၣ်ဃ့ၢ် ပသိလ့ၣ်လၢကျဲမုၢ်ဒိၣ်, ဒီးလဲၤအိၣ်ကတီၢ် ဖဲသမှံၤဟံၣ်ဒွဲ (hotel) တၢ်သူၣ်ထီၣ်အဂၢၢ်အကျၢၤတဖျၢၣ်အကပၤန့ၣ်လီၤ. ပလဲၤဃ့ၢ်နုာ်လီၤဆူ တၢ်သူၣ်ထီၣ်အပူၤ, ဒီးမ့ၢ်လၢပဃုထံၣ်န့ၢ် တၢ်အိၣ်တဒၢအလီၢ်အဃိ, ပစံးဘျုးဘၣ်ကစၢ်ယွၤ” န့ၣ်လီၤ.

တၢ်ကီတၢ်ခဲ မၤသ့ၣ်နီၣ်ပှၤလၢ ပလိၣ်ဘၣ် တၢ်အိၣ်ဆိးလီၢ်အဘံၣ်အဘၢတတီၤန့ၣ်လီၤ. ကတိၤဒိ ၁၈:၁၀ စံးဘၣ်ပှၤလၢ, “ယွၤအမံၤမ့ၢ် တၢးထီခၢၣ်သနၢၢ်လီၤ. ပှၤတီပှၤလိၤန့ၣ် ဃ့ၢ်နုာ်ဆူအပူၤ, ဒီးအိၣ်ပူၤဖျဲးဝဲ” န့ၣ်လီၤ. ပှၤကူၣ်သ့တဖၣ် လၢယွၤဂ့ၢ်ပီညါတကပၤန့ၣ် ပာ်ဖျါဝဲလၢ လံာ်ကျိၤ “ယွၤအမံၤ” စံးတၢ်န့ၣ် မ့ၢ်ဝဲဒၣ် ကယဲၢ် ကစၢ်ယွၤအတၢ်မ့ၢ်တၢ်ကယဲၢ်တၢ်ခဲလၢာ်န့ၣ်လီၤ. ဖဲပအိၣ်ခူသူၣ်လၢယွၤအပူၤန့ၣ်ဒီး, ကယဲၢ်တၢ်လၢ ကစၢ်ယွၤ အသူးသ့ၣ်ကံၢ်စီတဖၣ်ခဲလၢာ် ကဟ့ၣ်ပှၤတၢ်ဘံၣ်တၢ်ဘၢန့ၣ်လီၤ. မ့ၢ်လၢ ကစၢ်ယွၤ သူၣ်ကညီၤသးကညီၤတၢ်အဃိ, တူၢ်လိာ်မုာ်ပှၤန့ၣ်လီၤ. ကစၢ်ယွၤ န့ၣ်ဂ့ၤဝဲအဃိ,ဒိကနၣ် ပတၢ်ထုကဖၣ်တဖၣ်န့ၣ်လီၤ. ကစၢ်ယွၤမ့ၢ်ဝဲ တၢ်အဲၣ်တၢ်ကွံအဃိ, သ့ၣ်ညါနၢ်ပၢၢ်, ဒိသူၣ်ဒိသး ပတၢ်နးတၢ်ဖှီၣ်တဖၣ်န့ၣ်လီၤ.

ဘၣ်ဆၣ်, ကစၢ်ယွၤ န့ၣ် တမ့ၢ်ဝဲဒၣ်ထဲ ကျိၤကျဲအဂၤတဘိ, လၢတၢ်ဘှါဆှဲ တၢ်ကီတၢ်ခဲတဖၣ်အဂီၢ်န့ၣ်ဘၣ်. ကစၢ်ယွၤ န့ၣ် မ့ၢ်ဝဲဒၣ်တၢ်အါန့ၢ်ဒံး ပဘှါဆှဲ ပတၢ်ကီတၢ်ခဲလၢအဆိအချ့ (မ့) တၢ်ဆီတလဲကွံာ် ပတၢ်ဆိကမိၣ်န့ၣ်လီၤ. တၢ်အိၣ်တဒၢလၢ ကစၢ်ယွၤအပူၤ အခီပညီန့ၣ် မ့ၢ်တၢ်ဃုထၢ ယွၤအတၢ်မၤစၢၤ လၢကယဲၢ်တၢ်အဂုၤအဂၤတဖၣ် ခဲလၢာ် အဖီခိၣ်န့ၣ်လီၤ. ဖဲပသူၣ်ကၢ်သးလီၤဘှါ, ဒီးပဘၣ်ယိၣ်ဘၣ်ဘီတၢ်အကတီၢ်န့ၣ်, ပဃ့ၢ်ဆူ ယွၤအိၣ်သ့ဝဲဒၣ် ခီဖျိလၢတၢ်ထုကဖၣ်, လၢတၢ်ဖးဆိကမိၣ်ကွၢ်ထံ ကစၢ်ယွၤကလုၢ်ကထါ, (မ့) လၢတၢ်ဟ့ၣ်လီၤအးလီၤသးဆူ သးစီဆှံကစၢ်အစုပူၤန့ၣ်လီၤ.

တၢ်အိၣ်မူမၤထွဲ လုၢ်လၢ်တဖၣ်အံၤ လၢတၢ်အါနံၣ်အါလါအတီၢ်ပူၤန့ၣ်, ကနဲၣ်ဆှၢပှၤဆူ တၢ်အိၣ်မူဒီစိၤ တၢ်နာ်သန့ၤလီၤသးလၢ ကစၢ်ယွၤ, လၢအမ့ၢ် ပတၢ်အိၣ်ဘံၣ်အိၣ်ဘၢအလီၢ်အကျဲအမ့ၢ်အတီတဂၤန့ၣ်လီၤ.