ဖဲ ရွဲစထၢၣ် (Royston) အဖိမုၣ် ဟါနၣ် (Hannah) တဂၤ တူၢ်ဘၣ် ခိၣ်နူာ်အသွံၣ်ယွၤ အဃိ, ကဲထီၣ်တၢ်သးပ့ၤနီၣ်သးယိာ် (coma) န့ၣ်လီၤ. ရွဲစထၢၣ်ဒီးအဟံၣ်ဃီဖိတဖၣ် ဘၣ်ဃ့ထုကဖၣ်ယွၤ တဘျီဘၣ်တဘျီန့ၣ်လီၤ. ဖဲအိၣ်ခိးကွၢ် တၢ်အိၣ်အသး လၢအလါ တဖၣ်အတီၢ်ပူၤန့ၣ်, အဝဲသ့ၣ် အိၣ်စဲဘူး ဟံးဃာ်လိာ်သးတဂၤဒီးတဂၤ-ဃုာ်ဒီးကစၢ်ယွၤန့ၣ်လီၤ. ဟံၣ်ဖိဃီဖိတဖၣ် အတၢ်စူၢ်တၢ်နာ် ဒိၣ်ယိာ်ထီၣ်ဝဲ, ရွဲစထၢၣ် ဆိကမိၣ်ကဒါက့ၤဒီးစံးဝဲဒၣ်လၢ, “ပသးတကလၢၢ်ဘၣ် ကစၢ်ယွၤ အိၣ်စဲဘူးဒီးပှၤဒ်သိးအံၤ နီတဘျီဘၣ်” န့ၣ်လီၤ. တၢ်မၤကွၢ်အကီအခဲ ဒီတကတီၢ်အပူၤန့ၣ်, ကစၢ်ယွၤဟ့ၣ်လီၤန့ၢ် အဝဲသ့ၣ် “ဒ်သိးကဃ့ထုကဖၣ်တၢ်တဘိယူၢ်ဃီအဂီၢ်, ဘၣ်တၢ်မၤသီထီၣ်က့ၤတၢ်စူၢ်တၢ်နာ်” လီၤဂာ်ဝဲဒၣ်ဒ် “မုၣ်ကမဲလၢ လံာ်လူၤကၣ် ၁၈ အပူၤ” အသိးန့ၣ်လီၤ.
ရွဲစထၢၣ် ပာ်ဖျါဟ့ၣ်ဒိဝဲလၢ ကစၢ်ယ့ၣ်ရှူး အတၢ်ကတိၤဟ့ၣ်ဒိ မုၣ်ကမဲတဂၤအဂ့ၢ်, လၢအလဲၤဃုမၤန့ၢ် တၢ်စံၣ်ညီၣ်တီလၢ ဝ့ၢ်အပှၤပၢတၢ်ပဒိၣ်တဂၤအအိၣ်, ဖျါဖဲလူၤ ၁၈:၁ အပူၤ, “ဒ်သိးပှၤကညီကဘါထုကဖၣ်တၢ်တဘိယူၢ်ဃီ, ဒီးသုတလီၤဘှါတဂ့ၤ” န့ၣ်လီၤ. ပိာ်မုၣ်တဂၤအံၤ ဃ့ကညးဝဲဒၣ် စံၣ်ညီၣ်ကွီၢ် တလီၢ်လီၢ်အဃိ, အသးဘၣ်တံာ်တာ်, ဒီးအကတၢၢ်န့ၣ်, တပာ်ဆူၣ်ပာ်ကိၤအသးလၢၤဘၣ်န့ၣ်လီၤ. ကစၢ်ယ့ၣ်ရှူး ထိၣ်သတြီၤဝဲစံၣ်ညီၣ်ကွီၢ်တဂၤ လၢအတသးကညီၤတၢ်ဒီးကစၢ်ယွၤ, စံးဝဲဒၣ်, “ယွၤကစံၣ်ညီၣ်တီန့ၢ် အပှၤဃုထၢဖိလၢ အကိးထီၣ်အီၤ လၢမုၢ်ဆါဆဲးလၢမုၢ်နၤ… တမ့ၢ်ဘၣ်ဧါ” (:၇) န့ၣ်လီၤ.
ကစၢ်ခရံာ် တဲပာ်ဖျါထီၣ် စံၣ်ညီၣ်ကွီၢ်လၢ အတတီတဂၤအဂ့ၢ်ဘၣ်ဆၣ်, ခီဖျိလၢပူဟ့ၣ်ဒိဖိအံၤအဃိ, ဟံၣ်ဖိဃီဖိတဖၣ် အသးဆူၣ်ဃ့ထုကဖၣ်ဝဲလၢ ဟါနၣ် အဂီၢ်န့ၣ်လီၤ. ဒ်သိးကမၤဘျါက့ၤ ဟါနၣ်, ဒီးလၢတၢ်မၤစၢၤအဂီၢ်, ဃ့ထုကဖၣ် ကစၢ်ယွၤ, လၢအတီဝဲနီၢ်နီၢ်, ဒီးအဲၣ်တၢ်နီၢ်နီၢ်တဂၤအအိၣ်န့ၣ်လီၤ. အဝဲသ့ၣ်ထံၣ်လီၤက့ၤအသးလၢ ဘၣ်တၢ်မိၤက့ၤဘူးထီၣ်အါထီၣ်ဒီးယွၤ- “ဖဲပလူၤဃုထံၣ် ယွၤန့ၣ်ဒီး, တၢ်မၤအသးဒ်ပမ့ၢ်ပှၤတဖၣ်လၢ အမံပၢၢ်ထီၣ်က့ၤနီၢ်နီၢ် လၢတၢ်မံခ့မံသပ့ၤအပူၤအသိး” န့ၣ်လီၤ. အါလါပူၤကွံာ်ဝံၤန့ၣ်ဒီး, ဟါနၣ် မံပၢၢ်ထီၣ်က့ၤဝဲလၢတၢ်သးပ့ၤနီၣ်သးယိာ်အပူၤ, ဒီးအတၢ်အိၣ်ဆူၣ်အိၣ်ချ့န့ၣ် ဂ့ၤထီၣ်က့ၤကယီၤ ကယီၤန့ၣ်လီၤ.
ဖဲလၢပသုးဘူးပသးဆူ ယွၤအအိၣ်န့ၣ်, ယွၤနၢ်ဟူ ပတၢ်ဃ့သကွံၢ်ကညး, ဒီးစံးဆၢ ဝဲဒၣ်ပှၤ ဒ်အတၢ်သးကညီၤအသိးန့ၣ်လီၤ. လၢမုၢ်ဆါဂ့ၤ, လၢမုၢ်နၤဂ့ၤ ပကကိးထီၣ်ယွၤအဂီၢ်, ကစၢ်ယွၤကွဲမုာ်ပှၤန့ၣ်လီၤ.
