ဒၢ်ယၣ်နၣ် (Diana) မဲာ်ချံအတၢ်ထံၣ်ဟးဂီၤဝဲန့ၣ် နးဒိၣ်ထီၣ်အဃိ, အတၢ်ဘၣ်ယိၣ်ဘၣ်ဘီအါထီၣ်ဝဲန့ၣ်လီၤ. အတၢ်ဂ့ၢ်ကီအိၣ်စ့ၢ်ကီးဒီး တၢ်ဆိကမိၣ်ဆိကမးအါ, တၢ်မၤတဖၣ်မၤဝဲ တဘျီဝံၤတဘျီန့ၣ်လီၤ. ကသံၣ်သရၣ်တဖၣ်နာ်ဝဲဒၣ်လၢ အတၢ်ဆါပနီၣ်လၢအိၣ်ဟဲဖျါထီၣ်တဖၣ်အံၤ, တမ့ၢ်လၢအမဲာ်ချံတၢ်ဆါအဃိဘၣ်, မ့မ့ၢ် တၢ်တမံၤမံၤလၢအခိၣ်နူာ်ပူၤအဃိန့ၣ်လီၤ. အဝဲသ့ၣ် ဃုထံၣ်န့ၢ်ဝဲဒၣ် တၢ်အချံကမိာ် (tumor) လၢ ဒၢ်ယၣ်နၣ် အခိၣ်နူာ်ပူၤ, ဒီးအလီၢ်အိၣ်လၢ ကဘၣ်တၢ်ကွဲးကါထုးထီၣ်ကွံာ်အီၤန့ၣ်လီၤ. ဒၢ်ယၣ်နၣ် ဘၣ်ယိၣ်ဝဲဒၣ်လၢ တၢ်ကွဲးကါကူစါတၢ်န့ၣ် ကမၤဘၣ်ဒိဘၣ်ထံး အတၢ်သ့တၢ်ဘၣ်, လၢအမ့ၢ်တၢ်သးဝံၣ်စံးထီၣ်ပတြၢၤယွၤ- တၢ်လၢအသးစဲမၤဝဲ, ဃုာ်ဒီးအဟံၣ်ဖိဃီဖိတဖၣ်န့ၣ်လီၤ. လၢတၢ်န့ၣ်အဃိ, ကသံၣ်သရၣ် မၤဝဲဒၣ် တၢ်ကွဲးကါလီၤလီၤဆီဆီတမံၤ, ဒီးဖဲကွဲးကါတၢ်အကတီၢ်န့ၣ် တဟ့ၣ်ဝဲဒၣ် ဒၢ်ယၣ်နၣ် လၢကသံၣ်တၢ်မံသပ့ၤဘၣ်. ဒီးဖဲတၢ်ကွဲးကါအီၤအကတီၢ်န့ၣ်, ဒ်သိးကသံၣ်သရၣ်ကသ့ၣ်ညါဝဲလၢ ဒၢ်ယၣ်နၣ် အခိၣ်နူာ် အနၢၣ်တဖၣ် မၤတၢ်အကျိၤကျဲဂ့ၤဂ့ၤဘၣ်ဘၣ် အဂီၢ်, မၢ ဒၢ်ယၣ်နၣ် သးဝံၣ်တၢ်န့ၣ်လီၤ. ဖဲတၢ်ကွဲးကါအဆၢကတီၢ်, ပှၤခံဂၤ သးဝံၣ်သကိးတၢ်န့ၣ် ဘၣ်တၢ်ဖီၣ်ဃာ်အကလုၢ်န့ၣ်လီၤ.
ဒ် ဒၢ်ယၣ်နၣ် အသိး, ပှၤလၢအကွဲးထါစံးထီၣ်ပတြၢၤတဖၣ်အါမးလၢလံာ်စီဆှံအပူၤ, စီၤပၤစီၤဒၤဝံးစ့ၢ်ကီး အဲၣ်သးဝံၣ်စံးထီၣ်ပတြၢၤယွၤန့ၣ်လီၤ. ဖဲလၢအဘၣ်မိၣ်ဘၣ်မး, ဒီးဖဲလၢတၢ်သူၣ်ခုသးခု ခံမံၤလိာ်အပူၤန့ၣ်, သးဝံၣ်စံးထီၣ်ပတြၢၤကစၢ်ယွၤတလီၢ်လီၢ်န့ၣ်လီၤ. ဖဲအဝဲပူၤဖျဲးထီၣ်ဝဲလၢ ဒုၣ်ဒါတဖၣ်အစုပူၤန့ၣ်ဒီး, သ့ၣ်ညါပာ်ပနီၣ်ဝဲဒၣ် ပှၤလၢ “မၤပူၤဖျဲးအီၤလၢ အဒုၣ်အဒါတဖၣ်အစုပူၤ” (၂ ရှမူၤ ၂၂:၄၉) တဂၤန့ၣ် မ့ၢ်ဒၣ်ကစၢ်ယွၤန့ၣ်လီၤ. မ့ၢ်လၢကစၢ်ယွၤ အတၢ်မၤဂ့ၤတဖၣ်အဃိ စီၤဒၤဝံး ဘိးဘၣ်သ့ၣ်ညါဝဲဒၣ်လၢ “ယကစံးထီၣ်ပတြၢၤနၤ, လၢပှၤကလုာ်တဖၣ်အကျါ, ယွၤဧၢ, ဒီးယကသးဝံၣ်ထီၣ်နမံၤ” (:၅၀) န့ၣ်လီၤ.
လၢဟီၣ်ခိၣ်ချၢအံၤ ကစၢ်ယွၤ မၤတၢ်ဆူညါထီဘိ, ဒီးအုၣ်က့ၤခီၣ်က့ၤပှၤလၢ တၢ်ဒဲးဘး, တၢ်ဆါအၢလၢ ကမၤဟးဂီၤ, ပဝဲတဂၤစုာ်စုာ် အတၢ်အိၣ်မူန့ၣ်လီၤ. ကယဲၢ်တၢ်လၢယွၤမၤတၢ်ခဲလၢာ်တဖၣ်အဂီၢ်, ပဝဲကိးဂၤဒဲး, မ်ပကသးဝံၣ်စံးထီၣ်ပတြၢၤယွၤ လၢသူၣ်ဒီဖျၢၣ်သးဒီဖျၢၣ် ဒ်စီၤဒၤဝံးအသိးန့ၣ်တက့ၢ်.
