ဖဲယနုာ်လီၤမၤသကိးတၢ်ဒီး လံာ်စီဆှံကၠိတဖျၢၣ် အတၢ်ပၢဆှၢတၢ်ကမံးတံာ်န့ၣ်, ခိၣ်နၢ်မၤတၢ်ယံာ်တ့ၢ်မးလံတဂၤ ဘိးဘၣ်သ့ၣ်ညါဝဲဒၣ် ကအိၣ်ဘှံးဝဲလၢမူဒါ တၢ်မၤအဂ့ၢ်န့ၣ်လီၤ. ယအိၣ်လၢပှၤအိၣ်မူအိၣ်ဒါတဖၣ်အကျါ လၢကဃုထံၣ်န့ၢ် ပှၤပၢၤလီၢ်ဆ့ၣ်နီၤအသီတဂၤန့ၣ်လီၤ. ပဃုထၢပာ်ဖှိၣ်သကိး ကံၢ်စီတၢ်သ့တၢ်ဘၣ် အစရီလၢ အလီၤပျံၤလီၤဖုးဂီၢ်မုၢ်ဂီၢ်ပၤန့ၣ်လီၤ. မ့ၢ်ပကဃုထံၣ်န့ၢ် ပှၤကမၤလၢပှဲၤ မူဒါလၢအကါဒိၣ်, ဒီးအကီအခဲတမံၤ ဒ်သိးအံၤတဂၤ ကသ့ဝဲဒၣ်ဒ်လဲၣ်.

ဒ်န့ၣ်အသိး, ယကမၢကမၣ်ဘၣ်ယဲ ဖဲယဖးဘၣ် ကစၢ်ယွၤ နဲၣ်လီၤဝဲတၢ်လီၤတံၢ်လီၤဆဲး လၢတၢ်ကတ့ထီၣ် ဒဲစီဆှံ အမ့ၣ်အူဒၢမိၢ်ပှၢ်အဂီၢ်, “ဒီးကဘၣ်တၢ်ပိာ်န့ၢ်အီၤလၢထူစီ, အဘိ, ဒီးအဒ့တဖၣ်, အခိၣ်မီၣ်တဖၣ်, အကမိာ်တဖၣ်, အဖီတဖၣ်ဘၣ်မၤလၢ တၢ်တလိၣ်ဃီဒီးအီၤ” န့ၣ်လီၤ (၂ မိၤ ၂၅:၃၁-၃၆). ဒီးတၢ်အိၣ်အလီၢ်အဂၢၤန့ၣ် “ကဘၣ်အိၣ်ဒီးယၣ်လီၤစဲၤလၢဂၢၤအဂီၢ် မၤဝဲလၢဖှီဝါကဆှၣ်,အလုၢ်လ့ၢ်ဃံၤအသး, အထီအပျၢ်တကယၤန့ၣ်ဘၣ်အိၣ်လၢတခီအဂီၢ်, ဒီးအထူၣ်အထူၣ်ခံဆံ, ဒီးအခီၣ်တိၢ်အဖျၢၣ်ခံဆံလီၤ. ဒီးထူၣ်အနီၣ်ကွး, ဒီးအနီၣ်မၤစဲဘူးလိာ်သးတဖၣ် ဘၣ်မၤလၢစ့” (၂၇:၉-၁၀) န့ၣ်လီၤ. တၢ်မၤဒ်သိးအံၤတဖၣ်န့ၣ် မ့ၢ်မတၤတဂၤ မၤလၢပှဲၤကသ့ဝဲဒၣ်လဲၣ်.

၂ မိၤ ၃၁:၂-၅ န့ၣ် ယွၤစံးဝဲဒၣ်, “ယကိးတ့ၢ် စီၤဘစၤလးအ့လး… ဒီးယမၤပှဲၤအီၤဒီးယွၤအသး, ဒီးတၢ်ကူၣ်ဘၣ်ကူၣ်သ့, ဒီးအသးဆး, ဒီးတၢ်သ့ၣ်ညါ, ဒီးကယဲၢ်တၢ်မၤတမံၤလၢ်လၢ်- လၢတၢ်ဂူၢ်ကျ့လၢၢ်, တၢ်စိးပျၤသ့ၣ် ဒ်သိးအကမၤကယဲၢ်တၢ်မၤတမံၤလၢ်လၢ်” န့ၣ်လီၤ. အဆၢဖိ ၆ န့ၣ် ယွၤ ပာ်ဖျါစ့ၢ်ကီးဝဲလၢ “ကယဲၢ်ပှၤလၢအသူၣ်ဆးအသးဆး ခဲလၢာ်န့ၣ်, ယဟ့ၣ်လီၤတၢ်ကူၣ်သ့ ဒ်သိးအကမၤကယဲၢ်တၢ်လၢယမၤလိာ်နၤ” န့ၣ်လီၤ.

မူဒါလီၤဟိလၢ ခိၣ်နၢ်ပတီၢ်ထီအလီၢ်အလၤ, ပှၤမုာ်သးမၤကလီတၢ်လၢတၢ်အိၣ်ဖှိၣ်အဂီၢ်, (မ့) လၢတၢ်ရဲၣ်ကျဲၤ တၢ်ဖံးတၢ်မၤအဂီၢ်န့ၣ်, မ့ၢ်ပကဘၣ်လူၤဃုမၤပှဲၤဝဲဒ်လဲၣ်. မ့ၢ်ဒၣ်ကစၢ်ယွၤ, လၢအဃုထၢဝဲ, ဒီးကတဲာ်ကတီၤန့ၢ်ဝဲ တၢ်သ့တၢ်ဘၣ်တဖၣ် လၢအပှၤဂီၢ်မုၢ်တဖၣ်န့ၣ်လီၤ. လၢတၢ်လုၢ်ဟံၣ်အဂီၢ်, ယွၤသူၣ်လီၤဆီလီၤ က့ၢ်ဂီၤဒိ လၢတၢ်ပညိၣ်ကွၢ်စိ ဖးဒိၣ်အပူၤန့ၣ်လီၤ. ဝံၤန့ၣ်ဒီး, ကစၢ်ယွၤ ဃုထၢအပှၤဂီၢ်မုၢ်, ဒီးကတဲာ်ကတီၤန့ၢ်ဝဲ တၢ်သ့တၢ်ဘၣ်တဖၣ် ဒ်သိးကမၤလၢမၤပှဲၤ တၢ်ဖံးတၢ်မၤအဂီၢ်န့ၣ်လီၤ. ယွၤအတၢ်ရဲၣ်တၢ်ကျဲၤအဂီၢ်, ယွၤအတၢ်စံးဆၢန့ၣ် မ့ၢ်ဒၣ်ယွၤအပှၤဂီၢ်မုၢ်န့ၣ်လီၤ.