တုၤလၢ ယတံၤသကိး လူ (Lou) တဲဘၣ်ယၤ အတၢ်လဲၤခီဖျိ, ဖဲအဘၣ်ကွၢ်ဆၢၣ်မဲာ်ဒီး တၢ်မၤအသးလၢ အလိၣ်ဘၣ်တၢ်ကူၣ်သ့, ဒီးတၢ်ဂံၢ်တၢ်ဘါအါန့ၢ်အန့ၣ်အကတီၢ်, ကိးပသူထီၣ် ကစၢ်ခရံာ် လၢအသူၣ်ကံၢ်သးလဲပူၤအဂ့ၢ်န့ၣ်ဒီး, ယကသံကွၢ်ယဲတၢ်သံကွၢ်လၢ “ကစၢ်ယ့ၣ်ရှူးဧၢ, နဃ့ထုကဖၣ်န့ၢ်တၢ်လၢယဂီၢ်ဒ်လဲၣ်” တထံၣ်အံၤအဂီၢ်, ယတဆိကမိၣ်ဝဲဒၣ်နီတဘျီဘၣ်န့ၣ်လီၤ. အတၢ်ကတိၤ လၢပဂ့ၤပာ်သူၣ်ပာ်သး ဘၣ်ဃးဒီးတၢ်ထုကဖၣ်အဂ့ၢ်န့ၣ် ဟ့ၣ်အါထီၣ် ယတၢ်နၢ်ပၢၢ် တၢ်ထုကဖၣ်, ဒီးယတၢ်ထုကဖၣ်အလုၢ်အလၢ်တဖၣ်လၢတၢ်ထံၣ်အသီန့ၣ်လီၤ.
ဖဲလံာ်လူၤကၣ် ၂၂ အပူၤန့ၣ်, ကစၢ်ယ့ၣ်ရှူး ဘါထုကဖၣ်န့ၢ် တၢ်လၢ စီၤရှံမိၣ် ပ့းတရူး အဂီၢ် ဒ်လဲၣ်န့ၣ် “စီၤရှံမိၣ်ဧၢ, စီၤရှံမိၣ်ဧၢ, ကွၢ်ကွၢ်, မုၣ်ကီၤလံၢ် ဃ့ဂုၤသု ဒ်ဘုအသိးန့ၣ်လီၤ. မ့မ့ၢ်ယဲဒၣ်အံၤ, ဒ်သိးနတၢ်နာ် သုတဟးဂီၤကွံာ်တဂ့ၤဒီး, ယဘါထုကဖၣ်န့ၢ်လံ လၢနဂီၢ်လံ” န့ၣ်လီၤ. တၢ်ထုကဖၣ်တထံၣ်အံၤအပူၤန့ၣ် တၢ်ခူသူၣ်တအိၣ်ဝဲဒၣ်နီၤတမံၤဘၣ်. အဆၢဖိ ၃၁-၃၂ ပာ်ဖျါဝဲဒၣ် ဖဲ စီၤပ့းတရူး ဘၣ်တၢ်မၤကွၢ်အီၤအကတီၢ်, အတၢ်စူၢ်တၢ်နာ် ကဒံကဒါဝဲဒၣ်ဘၣ်ဆၣ်, မ့ၢ်လၢ ကစၢ်ခရံာ်အဘျုးအဖှိၣ်အဃိ, အတၢ်စူၢ်တၢ်နာ် အိၣ်ဂၢၢ်ဆိးကျၢၤဝဲဒၣ်န့ၣ်လီၤ.
တၢ်အစၢလၢ ကစၢ်ယ့ၣ်ရှူး ဃ့ဘါထုကဖၣ်န့ၢ်တၢ်လၢ စီၤပ့းတရူး, အပျဲၢ်အဘီၣ်လၢအသူၣ်ဆူၣ်သးဆူၣ်ဘၣ်ဆၣ်, အဂံၢ်ဘါစၢ်တဂၤအဂ့ၢ်န့ၣ်, လံာ်မၤတၢ် ပာ်ဖျါထီၣ်ဝဲဒၣ်န့ၣ်လီၤ. ကစၢ်ယွၤ စူးကါဝဲဒၣ် စီၤပ့းတရူး ဒ်သိးကစံၣ်တဲၤတဲလီၤ ခရံာ်အတၢ်သးခုကစီၣ်ဆူ ပှၤယူၤဒၤဖိ, ဒီးပှၤတခီဘီမုၢ်ဖိတဖၣ်အအိၣ်န့ၣ်လီၤ. ဒီးတၢ်မၤလၢ ကစၢ်ယ့ၣ်ရှူး ဃ့ထုကဖၣ်တၢ်န့ၣ် တကတၢၢ်ဒံးဘၣ်. ဖဲ ရိမ့ၤ ၈:၃၄ အပူၤန့ၣ် စီၤပီလူး မၤသ့ၣ်နီၣ်က့ၤပှၤလၢ “ပှၤလၢအဒိးသံအသးလၢပဂီၢ်န့ၣ်, မ့ၢ်ခရံာ်လီၤ. လၢန့ၣ်အခိၣ်တလိာ်, ဂဲၤဆၢထၢၣ်က့ၤဝဲ, ဒီးဆ့ၣ်နီၤဝဲလၢ ယွၤအစုထွဲ, ဒီးဃ့တၢ်လၢ ပဂီၢ်” န့ၣ်လီၤ. ဖဲနဘၣ်ကွၢ်ဆၢၣ်မဲာ်ဒီး တၢ်မၤကွၢ် (မ့) တၢ်လ့ပစီလီၤဘၣ်နၤအကတီၢ်, သ့ၣ်နီၣ်ထီၣ်က့ၤနဲလၢ ကစၢ်ယ့ၣ်ရှူး, လၢအဃ့ထုကဖၣ်န့ၢ်တၢ်လၢအပျဲၢ်အဘီၣ်တဖၣ်အဂီၢ်တဂၤန့ၣ်, ဃ့ထုကဖၣ်န့ၢ်တၢ်လၢ ပှၤလၢအစူၢ်က့ၤနာ်က့ၤအပျဲၢ်အဘီၣ်တဖၣ် အတၢ်ကစီၣ်ဘၣ်ဃးဒီးကစၢ်ခရံာ်အဂ့ၢ် (ကွၢ် ယိၤ ၁၇:၁၃-၂၀) န့ၣ်လီၤ.
