ပထွံၣ်အသီဖိတဒုန့ၣ်, ပကိးအီၤလၢ ဝ့စတၢၣ် (Winston), ဒီးတၢ်လၢမၤဝဲန့ၣ် အ့ၣ်တၢ်, မံဝဲ, အီၣ်ဝဲဒၣ် (မၤဝဲစ့ၢ်ကီး တၢ်အဂၤတမံၤ, ခံမံၤ) န့ၣ်လီၤ. ဝ့စတၢၣ် ခူၣ်ဝဲတၢ်ပူၤန့ၣ်, တခူၣ်ဝဲ ဒ်ထွံၣ်တဖၣ်ခူၣ်ညီနုာ်တၢ်အသိးဘၣ်, မ့မ့ၢ်ခူၣ်ဝဲ ဟီၣ်လာ်တၢ်ကျိၤတဖၣ်န့ၣ်လီၤ. လီၤဂာ်ဒ်ပှၤဃ့ၢ်ပူၤဖျဲးအသးလၢ ဃိာ်အပူၤအသိးန့ၣ်လီၤ. ထွံၣ်ဖိန့ၣ် ခူၣ်ဝဲဒၣ် လၢတၢ်သးဆၢ မၤတၢ်ဒိၣ်ဒိၣ်ကလဲာ်, လၢတၢ်သူၣ်ပိာ်သးဝး, ဒီးလၢတၢ်ဘၣ်အၢဘၣ်သီအပူၤန့ၣ်လီၤ.
ဖဲတၢ်တယံာ်ဒံးဘၣ်န့ၣ်, ယဆိကမိၣ်ကွၢ်ယဲလၢ ထွံၣ်တဒုအံၤ ဘၣ်မနုၤအဃိ ခူၣ်တၢ်ဒ်သိးအံၤလဲၣ်န့ၣ်ဒီး, လၢယသးပူၤ တၢ်ဂ့ၢ်တမံၤ အိၣ်ဟဲဖျါထီၣ်ဝဲဒၣ်န့ၣ်လီၤ. ယနီၢ်ကစၢ်ဒၣ်ယဲ, ယမ့ၢ်စ့ၢ်ကီးပှၤခူၣ်တၢ်ဖိတဂၤ, လၢအဆၢမိၣ်န့ၢ် “ခူၣ်,” တၢ်လၢယမုၢ်လၢ် ယဲလၢ အကမၤသူၣ်ခုသးခုယၤတဖၣ်န့ၣ်လီၤ. တၢ်မၤတဖၣ်အံၤ, တမ့ၢ်တၢ်လၢအတဂ့ၤထီဘိဒၣ်လဲာ်, ဖဲယသူၣ်ဆူၣ်သးဂဲၤဒိၣ်မးလၢ တၢ်ဃုထံၣ်န့ၢ် တၢ်သးမံသးမုာ်တမံၤမံၤ, မ့တမ့ၢ်လၢ ကစၢ်ယွၤအပူၤန့ၣ်, ယကဲထီၣ်လံပှၤခူၣ်တၢ်တဂၤန့ၣ်လီၤ. တၢ်လူၤဃုထံၣ်န့ၢ် တၢ်အိၣ်မူအခီပညီ, မ့တမ့ၢ်ဘၣ်လၢကစၢ်ယွၤန့ၣ်ဒီး, ယကဘၣ်အၢဘၣ်သီ, ဒီးယသးဆၢမိၣ်န့ၢ်တၢ်တဖၣ် ကအါထီၣ်ဝဲဒၣ်တလီၢ်လီၢ်န့ၣ်လီၤ.
မ့ၢ်လၢပှၤအံၣ်စရ့လးဖိတဖၣ် တလူၤဃုထံၣ်န့ၢ် တၢ်အိၣ်မူအခီပညီလၢယွၤအဃိ, ခီဖျိလၢဝံယံးရမံယၤန့ၣ် ကစၢ်ယွၤ သိၣ်ဃီၣ် အပှၤဂီၢ်မုၢ်လၢအမ့ၢ်, ပှၤခူၣ်တၢ်တဖၣ်, ဒီးစံးဝဲဒၣ် “ယပှၤဂီၢ်မုၢ် လဲၤသဒၣ်ယၤ… ဒီးကျိးန့ၢ်ကမါလၢအဂီၢ်ဒၣ်ဝဲ, ကမါသ့ၣ်ဖးလၢ အဟံးဃာ်ထံတသ့ဘၣ်” (ယံး၂:၁၃) န့ၣ်လီၤ. မ့ၢ်လၢအပှၤဂီၢ်မုၢ်တဖၣ် လဲၤကပာ်က့ၤကပာ် တၢ်ဃုထံၣ်န့ၢ်အီၤအဃိ, ယွၤသိၣ်ဃီၣ်ဝဲဒၣ်န့ၣ်လီၤ. လၢတၢ်ကျဲးစၢးမၤဟါမၢ် တၢ်သးသူထံအဒိၣ်အယိာ်အဂီၢ်, ပှၤဂီၢ်မုၢ်တဖၣ်ခူၣ်ဝဲဒၣ် ထံကမါတဖၣ် လၢအကစၢ်ဒၣ်ဝဲဘၣ်ဆၣ်, အဆၢဖိ ၁၃ န့ၣ် ထဲဒၣ် ယွၤ တဂၤဧိၤမ့ၢ် “ထံမူအထံထီၣ်ပၢၢ်” လီၤန့ၣ် ဟ့ၣ်ပလီၢ်ဝဲဒၣ် အပှၤဂီၢ်မုၢ်န့ၣ်လီၤ. လံာ်ယိၤဟၣ် ၄ န့ၣ်, ကစၢ်ယ့ၣ်ရှူး ဟ့ၣ်ဒုးအီ ပိာ်မုၣ်တဂၤလၢထံမူ, ဖဲထံပူၤတပူၤအဃၢၤ, ပိာ်မုၣ်လၢအဃုထံၣ်န့ၢ်စ့ၢ်ကီး တၢ်သးမံသးမုာ် လၢတၢ်လီၢ်အဂုၤအဂၤ (:၁၀-၂၆) န့ၣ်လီၤ.
ဘၣ်တဘျီဘျီန့ၣ်, ပဝဲကိးဂၤဒဲး ပမ့ၢ်ပှၤခူၣ်တၢ်ဖိတဖၣ်န့ၣ်လီၤ. ဘၣ်ဆၣ် လၢတၢ်သးကညီၤအပူၤ, ကစၢ်ယွၤ ကဟံးထီၣ်ဝဲ တၢ်လၢပလူၤဃုထံၣ်န့ၢ်တၢ် လၢအဘျုးတအိၣ်တဖၣ်, ဒီးအလီၢ်န့ၣ် ကမၤပှဲၤက့ၤပတၢ်သးသူအဒိၣ်အယိာ်န့ၣ်လၢအထံမူ, ထဲကစၢ်ယွၤတဂၤဧိၤ ကမၤမံမၤမုာ်ပသးန့ၣ်လီၤ.
