မး (Mark) သိၣ်လိနဲၣ်ယုၤ ကၤလဲး (Caleb) လၢအနီၢ်ကစၢ်ဒၣ်ဝဲ အါနံၣ်အါလါဝံၤန့ၣ်ဒီး, သ့ၣ်ညါထွဲဝဲလၢ တၢ်အိၣ်ဖှိၣ်ခိၣ်နၢ်တဂၤ ဟ့ၣ်မူဟ့ၣ်ဒါ ပှၤအဂၤတဂၤ ဒ်သိးကဟ့ၣ်ကူၣ်သိၣ်လိနဲၣ်ယုၤဝဲဒၣ် ကၤလဲးန့ၣ်လီၤ. ခိၣ်နၢ်တဂၤအံၤ စံးဝဲဒၣ် “လၢခံကတၢၢ်န့ၣ် ကၤလဲး ဒိးန့ၢ်ဘၣ် ပှၤဟ့ၣ်ကူၣ်သိၣ်လိနဲၣ်ယုၤတၢ်တဂၤလံ” န့ၣ်လီၤ.

လၢနံၣ်တဖၣ်အံၤအပူၤန့ၣ် ပှၤသ့ၣ်တဖၣ်အံၤ မ့ၢ်အဆိကမိၣ် ယမၤတၢ်မနုၤတမံၤလဲၣ်န့ၣ် မး အဲၣ်ဒိးသ့ၣ်ညါဝဲဒၣ်န့ၣ်လီၤ. တၢ်ကဟ့ၣ်ဆၢက့ၤအီၤတမံၤမံၤ, (မ့) တၢ်ကပာ်
ပနီၣ်မၤလၤကပီၤအီၤအဂီၢ် မး တမုၢ်လၢ်ကွၢ်စိဝဲဘၣ်ဆၣ်, အသးဘၣ်ဒိဆါဝဲဒိၣ်မးန့ၣ်လီၤ.

ဘၣ်ဆၣ်, တဘျုးနံၣ်လဲၤပူၤကွံာ်ဝံၤ, ဖဲလၢအလိၣ်ဘၣ် နီၢ်သးအတၢ်ဟံးစုနဲၣ်ကျဲ ဒိၣ်ဒိၣ်မုၢ်မုၢ်အကတီၢ်, မး ဟဲနုာ်လီၤဆူ အတၢ်အိၣ်မူအပူၤအဂ့ၢ်န့ၣ် ကၤလဲး ဒုးသ့ၣ်ညါဝဲဒၣ် မး န့ၣ်လီၤ. တုၤ မး နၢ်ဟူဝဲ တၢ်ကတိၤ န့ၢ်ဂံၢ်န့ၢ်ဘါတဖၣ်အံၤန့ၣ်ဒီး, မး သ့ၣ်ညါနၢ်ပၢၢ်ဝဲလၢ ကစၢ်ယွၤ ဟ့ၣ်လီၤတၢ်ဟ့ၣ်လီၤဆီတဖၣ်ဆူ ပှၤစူၢ်က့ၤနာ်က့ၤ ကစၢ်ယ့ၣ်ရှူး
တဖၣ်တဂၤစူာ်စူာ်, ဒ်သိးကမၤယွၤအတၢ်မၤ, ခီဖျိလၢကျဲလီၤဆီတဖၣ်အပူၤ- တထိၣ် သတြီၤဝဲဒၣ်ဒီးပှၤဂၤဘၣ်- ဒီးယွၤပၢဆှၢရဲၣ်ကျဲၤတၢ် ဘၣ်ဆၢဘၣ်ကတီၢ်န့ၣ်လီၤ.

ဖဲ ၁ ကရံၣ် ၁၂:၄-၃၁ န့ၣ်,စီၤပီလူး ထံၣ်ဝဲဒၣ် တၢ်အိၣ်ဖှိၣ်ဖိတဖၣ် အလုၢ်အပှ့ၤန့ၣ်, ဒ်အမ့ၢ်ကစၢ်ခရံာ် အနီၢ်ခိက့ၢ်ဂီၤတဖၣ်အသိး, မ့ၢ်တၢ်အကါဒိၣ်တမံၤန့ၣ်လီၤ. အဝဲသ့ၣ် အိၣ်ဒီးတၢ်ဟ့ၣ်လီၤဆီတဖၣ်, အလီၢ်အလၤ, ဒီးတၢ်ဖံးတၢ်မၤလီၤဆီတဖၣ်န့ၣ်လီၤ. ဒီးလၢအဆၢဒိၣ် ၃:၆ အပူၤန့ၣ်, စီၤပီလူး စံးဝဲဒၣ် “ယသူၣ်တၢ်, ဒီးစီၤအပီးလိၤဖှိၣ်တၢ်, မ့မ့ၢ် ယွၤဒုးဒိၣ်ထီၣ်တၢ်လီၤ” န့ၣ်, ဒုးသ့ၣ်နီၣ်ထီၣ်က့ၤပှၤလၢ ယွၤမ့ၢ်တၢ်အစဲတဖၣ် အဂံၢ်ခီၣ်ထံးန့ၣ်လီၤ.

လၢတၢ်မၤယွၤအတၢ်မၤန့ၣ်, ပဝဲတဂၤစုာ်စုာ်အဂီၢ်, ကစၢ်ယွၤ ဟ့ၣ်လီၤ တၢ်ဆၢကတီၢ်, ဒီးခွဲးယာ်လီၤလီၤဆီဆီန့ၣ်လီၤ. တၢ်လၢတဒ်သိးလိာ်အသးဒီးပှၤကညီတဖၣ်န့ၣ်, မ့ၢ်လၢကစၢ်ယွၤ အဲၣ်ပှၤဒ်နီၢ်တဂၤဘၣ်တဂၤအသိးအဃိ, တထိၣ်သတြီၤ ပတၢ်ဖံးတၢ်မၤဘၣ်. ဖဲလၢယွၤဟ့ၣ်ပှၤအကတီၢ်န့ၣ် ပကမၤတၢ်အဂ့ၤကတၢၢ်အဂီၢ်, မ်ပကပာ်ဖှိၣ်ပညိၣ် ပမဲာ်ချံအတၢ်ထံၣ်, ဒီးပသူၣ်ပသးတဖၣ်- လၢတၢ်နာ်သန့ၤ ယွၤအဂံၢ်အဘါ, ဒီအတၢ်ဟ့ၣ်စိ ဟ့ၣ်ကမီၤအလိၤလၢာ်လၢာ်ဆ့ဆ့- ဒီးတလိၣ်လၢပကဘၣ်ကိၢ်ဂီၤဝဲဒၣ်လၢ ပှၤဂၤအတၢ်မၤန့ၢ်မၤနၢၤတၢ်တဖၣ် လၢအဝဲသ့ၣ်အကျဲ, ဒီးအဆၢကတီၢ်ဒၣ်ဝဲအပူၤဘၣ်န့ၣ်လီၤ.