ဟံၣ်ဖိဃီဖိတဒူၣ်လၢ အတၢ်ဆဲးကျိးလိာ်သးလီၤမၢ်တ့ၢ်ဝဲဒီးအဖိခွါဒီးဒီပုၢ်ဝဲၢ်ခွါ, တဲလၣ် (Tyler) န့ၣ် ဒိးန့ၢ်ဝဲဒၣ် ပှၤသံအချါ သပၢၤတဖျၢၣ်, ဒီးတၢ်စံးဝဲလၢအပူၤန့ၣ် အိၣ်ဝဲဒီးတဲလၣ် အစိၣ်အချါန့ၣ်လီၤ. အဝဲအသးအိၣ်ဒံးဒၣ်ထဲ (၂၂) နံၣ်ဧိၤ, ဒီးအတၢ်သံန့ၣ် ဖျါလၢတၢ်စူးကါကသံၣ်မူၤဘှီးအါတလၢ (Overdose) အဃိန့ၣ်လီၤ. အါနံၣ်အါလါအတီၢ်ပူၤန့ၣ်, တဲလၣ် ဘၣ်ဂဲၤလိာ်ဝဲဒီးတၢ်သးစဲထီကသံၣ်မူၤဘှီး, ဒီးတၢ်ဃုထၢလၢ အတပိာ်ကျဲတဖၣ်န့ၣ်လီၤ. ဘၣ်ဆၣ်, တချုးအတၢ်သံ, ခီဖျိလၢ တၢ်စူးကါကသံၣ်မူၤဘှီးအါတလၢအဂ့ၢ်အံၤ မၤအသးန့ၣ်, တဲလၣ် အိၣ်ဆိးဝဲဒၣ်လၢ ပှၤဆီတလဲမၤဂ့ၤထီၣ်က့ၤတၢ်အိၣ်မူ အတၢ်ရဲၣ်တၢ်ကျဲၤအဟံၣ်, ဒီးမၤဝံၤမၤလၢပှဲၤ တၢ်ရဲၣ်တၢ်ကျဲၤတဖၣ်, ဒီးအိၣ်ဆူၣ်အိၣ်ချ့ထီၣ်က့ၤဝဲဒၣ်လံန့ၣ်လီၤ. လၢခံန့ၣ်, လၢတၢ်ဖုးသံပျီၢ်သံအပူၤ, ပှၤဘၣ်မူဘၣ်ဒါတဖၣ် ဃုထံၣ်သ့ၣ်ညါက့ၤဝဲဒၣ်လၢ တဲလၣ် အိၣ်မူဒံးဝဲဒၣ်နီၢ်နီၢ် န့ၣ်လီၤ. လၢ တဲလၣ် အလီၢ်န့ၣ် ပှၤထံၣ်ဆိကမိၣ်ကမၣ် ပှၤသးစၢ်အဂၤတဂၤ, လၢအသံတ့ၢ်ဝဲဒၣ် ခီဖျိလၢတၢ်စူးကါကသံၣ်မူၤဘှီးအါတလၢအဃိန့ၣ်လီၤ. လၢခံန့ၣ်ဒီး, တဲလၣ် ထံၣ်လိာ်ပာ်ဖှိၣ်ထီၣ်က့ၤအသးဒီး အဟံၣ်ဖိဃီဖိတဖၣ်ဝံၤ, ဆိကမိၣ်ကဒါက့ၤ ပှၤသးစၢ်လၢအသံတ့ၢ်တဂၤအဂ့ၢ်, ဒီးစံးဝဲဒၣ် “ယဘၣ်မ့ၢ် ပှၤလၢအသံတ့ၢ်တဂၤ” န့ၣ်လီၤ.
တဘျီန့ၣ်, ပှၤအံၣ်စရ့လးဖိတဖၣ် ဖဲအအိၣ်မူအိၣ်ဂဲၤဒံးအဖၢမုၢ်န့ၣ် မၤလိန့ၢ်ဝဲတၢ်သံအဂ့ၢ်န့ၣ်လီၤ. ဧၤ ၅:၂ အပူၤန့ၣ်, ဝံဧၤမိၣ် သးဝံၣ်ထီၣ် တၢ်သးအုးအတၢ်သးဝံၣ်, “အံၣ်စရ့လးအပှၤမုၣ်လိၣ်ဘိလီၤဃံၤလံ. တဂဲၤဆၢထၢၣ်လၢၤဘၣ်” တယုၢ်အံၤဆူ ပှၤဂီၢ်မုၢ်လၢ အပူထီၣ်ကစၢ်ယွၤအအိၣ်န့ၣ်လီၤ. တၢ်သးဝံၣ် အလံာ်မဲာ်ဖျၢၣ်တဖၣ်အံၤ ကထုးန့ၢ်ပှၤဂီၢ်မုၢ်တဖၣ်အသးသ့ၣ်သ့ၣ်- မ့ၢ်အဝဲသ့ၣ်သံလံဧါအဂီၢ်န့ၣ်လီၤ. ဘၣ်ဆၣ်, ဝံ စံးကတိၤပာ်ဖျါစ့ၢ်ကီး, တၢ်မၤမုာ်ထီၣ်က့ၤအတၢ်ကတိၤ, အိၣ်ဟဲလၢယွၤအနီၢ်ကစၢ်ဒၣ်ဝဲ- “ဃုယၤတက့ၢ်. ဒီးသုကမူလီၤ,” ဒီး “ဃုတၢ်ဂ့ၤတက့ၢ်… ဒီးဒ်န့ၣ်, တၢ်ကမၤအသးလၢ ယွၤတၢ်သုးမုၢ်ဂီၢ်မုၢ်အကစၢ်န့ၣ် ကအိၣ်ဒီးသု” (:၄,၁၄) န့ၣ်လီၤ. ပှၤအံၣ်စရ့လးဖိတဖၣ် အတၢ်ဒဲးဘးတဖၣ်လၢအထီဒါယွၤအဃိ, သံတ့ၢ် ဝဲလံဘၣ်ဆၣ်, ဒ်သိးပှၤဂီၢ်မုၢ်ကဃၣ်က့ၤအသးဆူ ယွၤအအိၣ်, ဒီးကဃုထံၣ်န့ၢ် တၢ်မူအဂီၢ်, ယွၤကွဲမုာ်ကဒါက့ၤအပှၤဂီၢ်မုၢ်န့ၣ်လီၤ.
လၢတၢ်ဘှါဆှဲ ပတၢ်ဒဲးဘးအဂီၢ်, မ်ပကအၢၣ်လီၤ ပတၢ်ဒဲးဘး, ဒီးဟဲစိာ်ပတၢ်ဒဲးဘးတဖၣ်ဆူ ကစၢ်ယွၤလၢအအဲၣ်ပှၤ, ဒီးပျၢ်ပတၢ်ဒဲးဘးတဂၤအအိၣ်န့ၣ်တက့ၢ်. လၢတၢ်အဲၣ်တၢ်ကွံအပူၤန့ၣ် ယွၤကနဲၣ်ဆှၢပှၤလၢတၢ်သံဒီးဆူတၢ်မူ (ယိၤ ၅:၂၄) န့ၣ်လီၤ.
