လၢဟီၣ်ခိၣ်လာ်အကျိၤဖးဒိၣ်, လၢအဘၣ်ထွဲလိာ်သးဒီး မဲ(န)မိး(သ) (Mammoth Cave) လ့အပူၤန့ၣ် ခွါလိၣ်ဘိဖိသၢဂၤ ဟးဝ့ၤဝီၤဝဲ လၢတၢ်သူၣ်ပိၢ်သးဝးအပူၤန့ၣ်လီၤ. အဝဲသ့ၣ်အဖါတံၢ် ဖရဲး(က) (Frank) မ့ၢ်ပှၤအိၣ်ဒီးအတၢ်လဲၤခီဖျိအါမးတဂၤ, လၢတၢ်လဲၤတၢ်က့ၤလၢၢ်လ့တဖၣ် အပူၤန့ၣ်, အိၣ်ဒီးအဝဲသ့ၣ်န့ၣ်လီၤ. တၢ်လီၢ်လီၤဘံအယိာ်တဖၣ်, ဒီးတၢ်လီၢ်လၢအလီၤဘၣ်ယိၣ်တဖၣ်န့ၣ် ဖါတံၢ်တဂၤအံၤ သ့ၣ်ညါဝဲဒၣ်အဃိ, ဒီးကိးစိဝဲ ပိာ်ခွါဖိသၢဂၤလၢ “ဖိသ့ၣ်ဧၢ, ဟဲဖဲအံၤ, လဲၤဖဲအံၤ” တလီၢ်လီၢ်ဒၣ်လဲာ်, အဝဲသ့ၣ် လဲၤဟးကွၢ်လိာ်ကွဲတၢ် ယံၤန့ၢ်ဒံးအဖါတံၢ်န့ၣ်လီၤ.
ဖါတံၢ် ဖရဲး(က) မၤစၢ်လီၤတၢ်ကပီၤ, လၢအခိၣ်ကုာ်ကျၤ (headlamp), ဒီးပာ်လီၤအသးလၢ ကအိၣ်ဘှီၣ်ကလာ်န့ၣ်လီၤ. တယံာ်ဘၣ်န့ၣ်, ပိာ်ခွါဖိတဖၣ် သ့ၣ်ညါဝဲဒၣ်လၢ ပှၤလၢအနဲၣ်ဆှၢအဝဲသ့ၣ်တဂၤ လီၤမၢ်လံန့ၣ်လီၤ. လၢတၢ်ပျံၤတၢ်ဖုးအပူၤန့ၣ်, အဝဲသ့ၣ်ကိးပသူထီၣ် အဖါတံၢ်အမံၤန့ၣ်လီၤ. တၢ်စံးဆၢတအိၣ်ဘၣ်. လၢခံကတၢၢ်န့ၣ်, အဝဲသ့ၣ်ထံၣ်ဝဲဒၣ် အဖါတံၢ်အတၢ်ကပီၤခိၣ်တိ ကပီၤထီၣ်လၢတၢ်အယံၤန့ၣ်လီၤ. တၢ်ကိၢ်တၢ်ဂီၤတဖၣ်စှၤလီၤ, ဒီးသးအတၢ်ဃူတၢ်မုာ်အိၣ်ထီၣ်ဝဲဒၣ်တကီၢ်ခါ, ဒီးခဲကနံၣ်အံၤ, အဝဲသ့ၣ် အိၣ်ကတဲာ်ကတီၤပာ်အသး, ဒ်သိးကလူၤပိာ် ပှၤကနဲၣ်ဆှၢတၢ်တဂၤအခံန့ၣ်လီၤ.
တၢ်လၢပကဘၣ်မၤ သးမုာ်စီဆှံ ဒ်လဲၣ်အဂီၢ်န့ၣ် တၢ်ဂ့ၢ်မၤအသးနီၢ်နီၢ်အံၤ မ့ၢ်တၢ်အဒိအကြၢးကတၢၢ်တမံၤန့ၣ်လီၤ. ကျဲလဲၤသကွ့ၤတဖၣ် ကွဲန့ၢ်လွဲန့ၢ်ပှၤ, ဒ်သိးပကအိၣ်ယံၤဒီးတၢ်လၢအကိးဃီၤပှၤ “ပိာ်ယခံတက့ၢ်” အကလုၢ်, ဖျါဖဲ မး ၁၆:၂၄ အပူၤန့ၣ်လီၤ. မၤ ၂:၃၈-၃၉ ပာ်ဖျါဝဲလၢ တၢ်ကလုၢ်အံၤ မ့ၢ်ဝဲဒၣ် သးစီဆှံ, အိၣ်ဂဲၢၢ်ဆိးကျၢၤလၢ ကယဲၢ်ယွၤအဖိတဖၣ် ကိးဂၤဒဲးအပူၤန့ၣ်လီၤ.
ယွၤအသးစီဆှံန့ၣ် တစူးကွံာ်ညိကွံာ်ပှၤနီတဘျီဘၣ်ဆၣ်, ပလဲၤကပာ် သးစီဆှံ သ့ဝဲဒၣ်န့ၣ်လီၤ. ၁ သ့း ၅:၁၉ န့ၣ်, ပှၤတၢ်မၢဖိစီၤပီလူး ဟ့ၣ်ပလီၢ်ပှၤလၢ “သုတမၤလီၤပံာ်ကွံာ်သးန့ၣ်တဂ့ၤ” န့ၣ်လီၤ. လၢအလီၢ်န့ၣ်, ပကဘၣ် “သူၣ်ဖှံသးညီတဘိယူၢ်ဃီ, ဘါထုကဖၣ်တၢ်တထံၣ်ဃီ, လၢတၢ်ခဲလၢာ်အပူၤန့ၣ် စံးထီၣ်ပတြၢၤတၢ်အဘျုးအဖှိၣ်” (:၁၆-၁၈) န့ၣ်လီၤ. ပမ့ၢ်မၤဒ်သိးအံၤန့ၣ်ဒီး, ပကအိၣ်စဲဘူးပသးဒီးပှၤလၢအနဲၣ်ဆှၢပှၤ, “တၢ်ဃူတၢ်ဖိးအကစၢ်” တဂၤ, ဒ်သိးပကမ့ၢ်ပှၤလၢ “တၢ်ပာ်တၢ်ကမၣ်အလီၢ်တအိၣ်ဘၣ်” (:၂၃) အဂီၢ်န့ၣ်လီၤ. တၢ်မၤအံၤ မ့ၢ်ဒၣ်ကစၢ်ယွၤအတၢ်မၤ, ဒီးတမ့ၢ်လၢပတၢ်ဂုာ်ကျဲးစၢးအဃိဘၣ်. ဒ်စီၤပီလူး ဒုးသ့ၣ်နီၣ်ပှၤလၢ အဆၢဖိ ၂၄ အပူၤအသိး, “ပှၤလၢအကိးန့ၢ်သုမ့ၢ်ပှၤလၢအကလုၢ်တီ, ဒီးအဝဲဒၣ်ကမၤစ့ၢ်ကီးဝဲ” န့ၣ်လီၤ.
