ဖဲ ၂၀၁၁ နံၣ်န့ၣ်, ကၤရ့ၣ် ပဲးကး (Karrey Packard)ဒီးအဖိမုၣ် ဒ်သိးကသုးအိၣ်ဆိးဝဲဆူ ဟံၣ်သီဃီသီအဂီၢ်, ပာ်ဖှိၣ်ဘိၣ်ထီၣ်တၢ်ဖိတၢ်လံၤတဖၣ်န့ၣ်လီၤ. ကၤရ့ၣ် လီၤဃံၤဝဲ သတူၢ်ကလာ်, ဒီးမံသးသပ့ၤ, ဒီးအသးဖျၢၣ်တစံၣ်လၢၤဘၣ်န့ၣ်လီၤ. ကသံၣ်သရၣ်တဖၣ် မၤမူထီၣ်ဂဲၤထီၣ်က့ၤအီၤဘၣ်ဆၣ်, အတၢ်အိၣ်အသး နးထီၣ်ဝဲ ဒီတနၤန့ၣ်လီၤ. ပှၤစံးဘၣ်တဲဘၣ် အဝၤသးဘိ ကရ့း (Craig) လၢ ကကိးပာ်ထီၣ်ဟံၣ်ဖိဃီဖိတဖၣ် ဒ်သိးကစံးကတိၤလီၤဖး တၢ်ကတိၤလၢခံကတၢၢ်အဂီၢ်န့ၣ်လီၤ. ဟံၣ်ဖိဃီဖိ ဃ့ထုကဖၣ် တၢ်ထုကဖၣ်လၢ ကရ့း ကိးဝဲဒၣ် “တၢ်မုၢ်လၢ်လၢာ် အတၢ်ထုကဖၣ်” န့ၣ်လီၤ.

ဖဲတၢ်နးတၢ်ဖှီၣ်အကတီၢ်, မ့ၢ်နဃ့ထုကဖၣ်တ့ၢ်လံ တၢ်မုၢ်လၢ်လၢာ် အတၢ်ထုကဖၣ်တလီၢ်လီၢ်ဧါ. နီၢ်မၤရံဒီးနီၢ်မၢ်သၤန့ၣ် ဃ့ထုကဖၣ်ဝဲဒၣ်န့ၣ်လီၤ. ယိၤ ၁၁:၃ အပူၤန့ၣ် အဝဲသ့ၣ်ဆှၢလီၤ အဝဲၢ်ခွါ စီၤလါစရူး, အတၢ်အိၣ်အသးလီၤဘၣ်ယိၣ်အဂ့ၢ်ဆူ ကစၢ်ယ့ၣ်ရှူးအအိၣ်, ဒီးစံးဝဲဒၣ် “ပှၤလၢနအဲၣ်အီၤတဂၤ”န့ၣ် ဆူးဆါနးဒိၣ်မးန့ၣ်လီၤ. အကတၢၢ်, ဖဲကစၢ်ခရံာ် လဲၤတုၤဝဲအကတီၢ်န့ၣ်, စီၤလါစရူး သံတ့ၢ်ဝဲဒၣ် အိၣ်ဝဲလွံၢ်သီလံန့ၣ်လီၤ. လၢတၢ်သးအုးဖးဒိၣ်အပူၤ, နီၢ်မၢ်သၤ စံးဘၣ် ကစၢ်ယ့ၣ်ရှူးလၢ “နမ့ၢ်အိၣ်တ့ၢ်ဖဲအံၤဒီး,ယဒီပုၢ်ဝဲၢ်ခွါတသံဘၣ်ဝဲဘၣ်” (:၂၁) န့ၣ်လီၤ. နီၢ်မၢ်သၤ သ့ၣ်ညါဝဲလၢ ကစၢ်ခရံာ် မၤဘျါက့ၤ ပှၤဆူးပှၤဆါတဖၣ်သ့ဝဲဘၣ်ဆၣ်, အတၢ်မၤနၢၤတၢ်သံအစိကမီၤအဂ့ၢ်န့ၣ် အတၢ်ထံၣ်ဆိကမိၣ်တထီၣ်ဘးဝဲဘၣ်. ကစၢ်ယ့ၣ်ရှူး ဒုးဂဲၤဆၢထၢၣ်သမူထီၣ်က့ၤ စီၤလါစရူး လၢတၢ်သံနီၢ်နီၢ်, ဒီးတၢ်လၢအဒုးနဲၣ်ပာ်ဖျါဆိ အနီၢ်ကစၢ်ဒၣ်ဝဲ အတၢ်ဂဲၤဆၢထၢၣ်သမူထီၣ်က့ၤ စှၤနွံအလီၢ်ခံအဂ့ၢ်န့ၣ်လီၤ.

လၢတၢ်ကူစါယါဘျါတကပၤန့ၣ်, ကၤရ့ၣ် သံတ့ၢ်လံဘၣ်ဆၣ်, ယွၤဒုးမူထီၣ်က့ၤအီၤ လၢတၢ်လီၤကမၢကမၣ်အပူၤန့ၣ်လီၤ. ကၤရ့ၣ်ဒီးစီၤလါစရူး အဂ့ၢ်ခံမံၤလိာ်အပူၤန့ၣ်, ပလဲၤကပာ်က့ၤကပာ် တၢ်ဂ့ၢ်မိၢ်ပှၢ်သ့ဝဲဒၣ်, လၢအမ့ၢ် ယွၤအိၣ်ဒီးအတၢ်တိာ်ပာ်တဖၣ်, တၢ်လၢ ပတသ့ၣ်ညါဘၣ်န့ၣ်လီၤ. ယွၤ တကူစါယါဘျါ ပှၤကိးဂၤဒဲးဘၣ်. တမၤမူထီၣ်က့ၤဝဲဒၣ် ပှၤသံခဲလၢာ်ဘၣ်. ဘၣ်ဆၣ်, ကစၢ်ယ့ၣ်ရှူး ဟ့ၣ်လီၤပှၤလၢ တၢ်အုၣ်ကီၤအဂ့ၤကတၢၢ်န့ၣ်, ဖျါဖဲအဆၢဖိ ၂၅, ဒီးစံးဝဲလၢ “ယဲဒၣ်အံၤ, ယမ့ၢ်တၢ်ဂဲၤဆၢထၢၣ်က့ၤဒီးတၢ်မူလီၤ. ပှၤလၢ အစူၢ်က့ၤနာ်က့ၤယၤတဂၤလၢ်လၢ်န့ၣ်, မ့ၢ်သံဘၣ်ဆၣ်, ကမူဝဲဒၣ်” န့ၣ်လီၤ. ဒ်ပမ့ၢ်ပှၤစူၢ်က့ၤနာ်က့ၤတၢ်ဖိတဖၣ်အသိး, ကယဲၢ်တၢ်မၤအသးတမံၤလၢ်လၢ်အပူၤန့ၣ်, ပသ့ၣ်ညါလၢ ပကအိၣ်ဒီးကစၢ်ယ့ၣ်ရှူးန့ၣ်လီၤ. လၢပတၢ်မုၢ်လၢ်လၢာ် အတၢ်ထုကဖၣ်အဂီၢ်, တၢ်သ့ၣ်ညါတမံၤအံၤ ကမၤစှၤလီၤ ပတၢ်ဘၣ်ယိၣ်တဖၣ်သ့ၣ်သ့ၣ်န့ၣ်လီၤ.