ဒ်ခရံာ်ဖိ ပှၤကွဲးလံာ်တဂၤအသိး, က့(လ) (Gayle) စးထီၣ်မၤတၢ်သီသီအကတီၢ်, ဒိးန့ၢ်ဝဲဒၣ် တၢ်ဟ့ၣ်ဖိတဖၣ် လၢအမၤမုာ်, ထုးန့ၢ်သူၣ်သးတဖၣ် လၢပှၤထုးထီၣ်လံာ်အအိၣ်တလီၢ်လီၢ်န့ၣ်လီၤ. တၢ်ဟ့ၣ်ဖိတဖၣ် မ့ၢ်ဝဲ ဖီကဒိၣ်တဖၣ်, ခၠီးကလဲးတဖၣ်, သ့ၣ်ဂံၢ်ဝၣ်စဲအလၣ်ဃ့အဘိၣ်တဖၣ်န့ၣ်လီၤ. တၢ်ဟ့ၣ်ခဲလၢာ်န့ၣ် မ့ၢ်တၢ်လၢအလီၤအဲၣ်လီၤကွံ
တဖၣ်န့ၣ်လီၤ. ဘၣ်ဆၣ်, ဒ်တၢ်ဆၢကတီၢ်ယံာ်ထီၣ်ဝဲန့ၣ်ဒီး, ပှၤထုးထီၣ်လံာ်တဂၤန့ၣ် စးထီၣ်ဆှၢန့ၢ်အီၤ တၢ်ဟ့ၣ်တဖၣ်, လၢအလုၢ်အပှ့ၤအိၣ်ကၢအိၣ်ခိး, ဒ်အမ့ၢ် တၢ်ကဖး လံာ်စီဆှံလၢတနံၣ်အဂီၢ်, တၢ်ဘူၣ်သကိးဘါသကိး အလံာ်ဖုၣ်ကိာ်ဖိတဖၣ်. ဒီးတနံၤဘၣ်တနံၤ, နီၢ်တဂၤ အတၢ်ထုကဖၣ်လံာ်ကွဲးနီၣ်တဖၣ်န့ၣ်လီၤ. က့(လ) စူးကါဝဲဒၣ် တၢ်လၢအဒိးန့ၢ်တဖၣ်, ဒီးကဲထီၣ်ပှၤခရံာ်ဖိလၢ အဒိၣ်တုာ်ခိၣ်ပှဲၤတဂၤ, တၢ်ဟ့ၣ်လၢ အမၤမုာ်အသးတဖၣ်န့ၣ် တထုးန့ၢ်အသးလၢၤဘၣ်. ဒီးဟ့ၣ်လီၤအသး, စူးကါအါထီၣ်အတၢ်အိၣ်မူ, ဒ်သိးကနဲၣ်ဆှၢပှၤဂုၤပှၤဂၤတဖၣ်ဆူ ကစၢ်ခရံာ်အအိၣ်အဂီၢ်န့ၣ်လီၤ.

တၢ်မၤအံၤ ဒုးသ့ၣ်နီၣ်ထီၣ်က့ၤပှၤ စီၤတံၤမသ့း ဒိၣ်ထီၣ်ဝဲဒၣ်လၢ တၢ်မၢဖိစီၤပီလူး အတၢ်ဟ့ၣ်ကူၣ်ဟ့ၣ်ဖး, ဒီးအတၢ်တိစၢၤမၤစၢၤအဖီလာ်န့ၣ်လီၤ. ၂ တံၤ ၂:၁၅ အပူၤန့ၣ်, လၢနီၢ်သးအတၢ်ဒိၣ်တုာ်ခိၣ်ပှဲၤအဂီၢ်, စီၤပီလူး စံးဝဲဒၣ်သပှၢ်ပှၢ်, ဒီးဟ့ၣ်ကူၣ်အီၤလၢ “ကျဲးစၢးကဲထီၣ်လၢ ပှၤဘၣ်ယွၤအသး, ပှၤမၤတၢ်ဖိလၢ အမဲာ်ဆှးအလီၢ်တအိၣ်ဘၣ်, ပှၤနီၤဖး တၢ်မ့ၢ်တၢ်တီ အကလုၢ်အကထါအဆၢ တီတီလိၤလိၤန့ၣ်တက့ၢ်” န့ၣ်လီၤ.

ဝံၤန့ၣ်ဒီး, အဆၢဖိ ၁၆ န့ၣ်, စီၤပီလူး ပာ်ဖျါအါထီၣ်ဝဲလၢ “တၢ်အၢတၢ်သီအတၢ်ကတိၤကလီကလီန့ၣ်, ဟးဆှဲးအီၤတက့ၢ်. အဂ့ၢ်ဒ်အံၤ, ကလဲၤဆူ တၢ်တယူးတယီၣ် ဘၣ်ယွၤအါထီၣ်အါထီၣ်” န့ၣ်လီၤ. ဒီးစံးကဒီးဝဲဒၣ်လၢ “ဃ့ၢ်ဟးဆှဲးဖိၣ်သၣ်ခွါ အတၢ်သးကွံတဖၣ်,… တၢ်သံကွၢ်ကလီကလီ, ဒီးတဂိာ်တသီၣ်ဘၣ်န့ၣ်, ဟးဆှဲးအီၤတက့ၢ်…… ဒီးကစၢ်အခ့အပှၤန့ၣ်, တဘၣ်အ့ၣ်လိာ်ဆိးက့လိာ်ဘၣ်. မ့မ့ၢ် အဘၣ်မ့ၢ် ပှၤဝံသးစူၤလၢပှၤခဲလၢာ်, ပှၤသိၣ်လိတၢ်သ့, ပှၤကီၤအသး” (:၂၂-၂၄) န့ၣ်လီၤ.

စီၤပီလူး အတၢ်ဟ့ၣ်ကူၣ်, လၢအပှဲၤဒီးတၢ်ကူၣ်သ့န့ၣ် ဟ့ၣ်ထီၣ်ဝဲတၢ်ကဲဘျုးမိၢ်ပှၢ် အဂၤတမံၤ လၢပှၤစူၢ်က့ၤနာ်က့ၤတၢ်ဖိတဖၣ်အဂီၢ်န့ၣ်လီၤ. ပှၤသ့ၣ်တဖၣ်လၢအထီဒါ ကစၢ်ခရံာ်ဒၣ်လဲာ်, ဖဲအဝဲသ့ၣ်ထံၣ် ပဃုထၢ ကစၢ်ခရံာ်, လၢတၢ်ဒိၣ်တုာ်ခိၣ်ပှဲၤအပူၤန့ၣ်ဒီး, “ဘၣ်တဘၣ်, ယွၤကဟ့ၣ်လီၤအီၤလၢ တၢ်ပီၢ်ယၢ်လီၤအသး, ဒီးကမၤပူၤဖျဲးထီၣ်ကွံာ်အသးလၢမုၣ်ကီၤလံၢ်အပျံၤသကွီၤ” (:၂၆) န့ၣ်လီၤ. “တၢ်ဒိၣ်ထီၣ်” လၢယွၤအပူၤန့ၣ် တၢ်ကဲဘျုးအထူအယိာ် အိၣ်ဝဲဒၣ်အါန့ၢ်ဒံး ပနီၢ်ကစၢ်အဂီၢ်အဃိ, မ်ပကဒိၣ်ထီၣ်လၢ တၢ်စူၢ်တၢ်နာ်အပူၤန့ၣ်တက့ၢ်. ပှၤဂုၤပှၤဂၤစ့ၢ်ကီး ကဘၣ်ဘျုးဘၣ်ဖှိၣ်ဝဲဒၣ်န့ၣ်လီၤ.