ဖဲပှၤန့ၢ်စိန့ၢ်ကမီၤ, လၢပၢဆှၢတၢ်လိာ်ကွဲဖုဒီၣ် (referee), အတၢ်နဲၣ်ပာ်ဖျါထီၣ်အစုလၢခံကတၢၢ်, ဒ်ပှၤမၤနၢၤတၢ်အသိးန့ၣ်ဒီး, ပှၤကနိတၢ်ဖိ ခဲန့ၣ်ဒံၢ် ဘလ့း (Kennedy Blades) ကဲထီၣ် ၂၀၂၄ နံၣ် ပှၤအိၣ်လၣ်ပ့းမုၣ်ဖိတဂၤန့ၣ်လီၤ. အဝဲပာ်ဖှိၣ်ထီၣ်အစုလၣ်တပူၤဃီ, ယူာ်ထီၣ်အစု, ဒီးကွၢ်ထီၣ်ဆူမူခိၣ်, ဒီးစံးထီၣ်ပတြၢၤယွၤန့ၣ်လီၤ. ပှၤဟံးန့ၢ်တၢ်ကစီၣ်တဂၤ သံကွၢ်အီၤ ဘၣ်ဃးဒီးလၢအပူၤကွံာ်သၢနံၣ်အတီၢ်ပူၤ အတၢ်ဂုၤထီၣ်ပသီထီၣ်အဂ့ၢ်န့ၣ်လီၤ. ပှၤလိာ်ကွဲတၢ်ဖိစဲၣ်နီၤတဂၤအံၤ တပာ်ဖျါထီၣ် အတၢ်ကျဲးစၢးမၤလိန့ၢ်နီၢ်ခိအဂ့ၢ်ဘၣ်. မ့မ့ၢ် စံးဆၢဝဲဒၣ် “ယအိၣ်မူအိၣ်ဘူးအါဒိၣ်ဝဲဒီးကစၢ်ယ့ၣ်ရှူး” န့ၣ်လီၤ. အဝဲအုၣ်အသးလၢ ကစၢ်ခရံာ် ဒ်အမ့ၢ် စီၤပၤ, ဒီးဘိးဘၣ်သ့ၣ်ညါဝဲဒၣ်လၢ ကစၢ်ခရံာ်ကဟဲက့ၤ ခံဘျီတဘျီ, ဒီးဟ့ၣ်ဂံၢ်ဟ့ၣ်ဘါပှၤဂၤတဖၣ်လၢ ကစူၢ်က့ၤနာ်က့ၤအီၤအဂီၢ်န့ၣ်လီၤ. အဝဲစံးဝဲလၢ “မ့ၢ်ဒၣ် ကစၢ်ယ့ၣ်ရှူးအဃိလီၤ. ဒ်သိးယမၤန့ၢ်မၤနၢၤ တၢ်မၤဖးဒိၣ်ဒ်သိးအံၤကသ့အဂီၢ်, အဝဲမ့ၢ်တၢ်ဂ့ၢ်မိၢ်ပှၢ်” န့ၣ်လီၤ. လၢတၢ်ထံၣ်လိာ်သံကွၢ်တၢ်အဂၤတဖၣ်စ့ၢ်ကီး, အဝဲဘိးဘၣ်သ့ၣ်ညါဝဲဒၣ်လၢ ကစၢ်ယ့ၣ်ရှူး မ့ၢ်တၢ်ခဲလၢာ် လၢအဂီၢ်, ဒီးလၢအတၢ်အိၣ်မူအပူၤ, တၢ်အဂ့ၤကိးမံၤဒဲးန့ၣ် မ့ၢ်ဒၣ်လၢအဃိန့ၣ်လီၤ.

အတၢ်သးဆူၣ်ဒိၣ်ဒိၣ်ကလဲာ် လၢကအိၣ်မူအိၣ်ဂဲၤ, ဒီးပာ်ကစၢ်ယွၤလၢ တၢ်အကါဒိၣ်ကတၢၢ်တမံၤအံၤ ဒုးနဲၣ်ကဒါက့ၤ စီၤဒၤဝံး အုၣ်အသးတဖၣ်လၢ ထါစံးထီၣ်ပတြၢၤ ၆၃ အပူၤန့ၣ်လီၤ. ဖဲ အဆၢဖိ ၁ န့ၣ် စီၤဒၤဝံး အၢၣ်လီၤတူၢ်လိာ်အသးဆၢန့ၢ်ဘၣ် ကစၢ်လၢအတ့လီၤအီၤတဂၤနးနးကျံၤကျံၤ, ဒီးစံးဝဲဒၣ် “ယွၤဧၢ, နမ့ၢ်ယကစၢ်လီၤ. ယဃုနၤဂီၤဂီၤ, ယသးအံၤသူအသးလၢနၤ, ယဖံးယညၣ်ဆၢန့ၢ်နၤလၢကီၢ်လၢအဃ့” န့ၣ်လီၤ. အဆၢဖိ ၂ ပာ်ဖျါဝဲလၢ စီၤဒၤဝံး “ထံၣ်” ဘၣ်ယွၤဒီး ထံၣ်ဘၣ်ယွၤအစိအကမီၤ, ဒီးအလၤကပီၤန့ၣ်လီၤ. ဖဲအဆၢဖိ ၃ န့ၣ် အဝဲဘိးဘၣ်သ့ၣ်ညါဝဲဒၣ်လၢ ယွၤအတၢ်အဲၣ်အထူအယိာ်န့ၣ် “ဂ့ၤန့ၢ်တၢ်မူ” န့ၣ်လီၤ. အဆၢဖိ ၇-၈ န့ၣ်, ဃ့ထုကဖၣ်, ဒီးစံးဝဲ “အဂ့ၢ်ဒ်အံၤ, နမ့ၢ်တၢ်မၤစၢၤယၤ, ဒီးယကသူၣ်ဖှံသးညီလၢ နဒံးဆ့အကဒုပူၤလီၤ. ယသးသန့ၤအသးလၢနၤ, နစုထွဲ မၤစၢၤယၤ” န့ၣ်လီၤ. လၢစီၤဒၤဝံးအဂီၢ်, ယွၤမ့ၢ်တၢ်ခဲလၢာ်လီၤန့ၣ် အိၣ်ဖျါဝဲဒၣ်ဆှံဆှံဖိန့ၣ်လီၤ.

ဖဲလၢကစၢ်ယ့ၣ်ရှူး ကဲထီၣ် ပတၢ်ဂ့ၢ်တၢ်ကျိၤ, ဒီးပတၢ်ခဲလၢာ်န့ၣ်ဒီး, ပတၢ်အိၣ်မူအိၣ်ဂဲၤန့ၣ် ကဲထီၣ်တၢ်လၢအနဲၣ်ပှၤဂၤဆူ တၢ်ပှ့ၤက့ၤသးသမူ အတၢ်ရ့လိာ်ဘၣ်ထွဲဒီးကစၢ်ယွၤသ့ဝဲဒၣ်န့ၣ်လီၤ.