တၢ်အပူၤကွံာ်တဘျုးနံၣ်, ဖဲဟံၣ်ဖိဃီဖိတၢ်ထံၣ်လိာ်က့ၤသးအကတီၢ်, ယမိၢ် ဟ့ၣ်ခီဟ့ၣ်နီၤ တၢ်ကတိၤဖိတနီၤလၢအကွဲးပာ်ဝဲဒၣ်န့ၣ်လီၤ. ယမိၢ် စံးကတိၤမၤလၤကပီၤအဖံ, ပိာ်မုၣ်တဂၤလၢ ယတထံၣ်ဘၣ်အီၤနီတဘျီဘၣ်ဆၣ်, ယနၢ်ဟူဘၣ်ယဲလၢ ယမိၢ် တဲပာ်ဖျါထီၣ်အဂ့ၢ်တလီၢ်လီၢ်န့ၣ်လီၤ. ယမိၢ် ကွဲးနီၣ် အတၢ်သ့ၣ်နီၣ်ထီၣ်က့ၤ ဖံဖံ စူစၢၢ် (Susan) ဂဲၤဆၢထၢၣ်, ဒီးဃ့ထုကဖၣ်တၢ်လၢ အဟံၣ်ဖိဃီဖိတဖၣ်အဂီၢ်, “တချုးလၢမုၢ်ဆ့ၣ်ထီၣ်ဂီၤထၢၣ်သၢ” အကတီၢ်န့ၣ်လီၤ. ယတထံၣ်သ့ၣ်ညါယဖံ ဖးဒိၣ်တဂၤအံၤ နီတဘျီဘၣ်ဆၣ်, တၢ်သ့ၣ်နီၣ်ဖိအံၤ အသဟီၣ်လီၤဘၣ်လၢ ယမိၢ်အတၢ်အိၣ်မူအပူၤဒိၣ်မး, ဒီးမ့ၢ်တၢ်လၢအအိၣ်စဲထီဃာ်ယသးပူၤ တုၤမုၢ်မဆါတနံၤအံၤဒၣ်လဲာ်န့ၣ်လီၤ.

တၢ်ဂ့ၢ်ဖိအံၤ ဒုးသ့ၣ်နီၣ်ထီၣ်က့ၤယၤ ပိာ်မုၣ်တဂၤအဂ့ၢ်, လၢအဘၣ်တၢ်ပာ်ဖျါအီၤ ဖဲလံာ်ကတိၤဒိ အဆၢဒိၣ် ၃၁ အပူၤန့ၣ်လီၤ. အဆၢဖိ ၁၅ ပာ်ဖျါဝဲဒၣ် ပိာ်မုၢ်တဂၤအံၤ ဂဲၤဆၢထၢၣ်ဝဲလၢ “ဂီၤထၢၣ်သၢ” အကတီၢ်, ဒီးကဟုကယာ်ကွၢ်ထွဲ အဟံၣ်ဖိဃီဖိတဖၣ် လၢကျိၤကျဲအါဘိအပူၤန့ၣ်လီၤ. လၢတၢ်ကဟုကယာ်ကွၢ်ထွဲအဟံၣ်ဖိဃီဖိတဖၣ်အဂီၢ်, ကဘၣ် မၤတၢ်အါမး- ဒ်အမ့ၢ် တၢ်သုးကျဲၤန့ၢ် တၢ်အီၣ်တၢ်အီ, တၢ်ပှ့ၤဟီၣ်ခိၣ်, တၢ်သူၣ်လီၤ စပံးမုၢ်, ဆါတၢ်ပှ့ၤတၢ်တဖၣ် ဒ်သိးကဒိးန့ၢ်ကျိာ်စံ အတၢ်ကဲဘျုးအဂီၢ်, တၢ်ဆးဆ့ကူဆ့ကၤတဖၣ်, ဒီးတၢ်ကဘၣ်မၤဝံၤ တၢ်မၤတဖၣ်အိၣ်ဒံးဝဲအါထံၣ်, ဒီးတၢ်မၤခဲလၢာ်န့ၣ် မ့ၢ်တၢ်အံးထွဲကွၢ်ထွဲ ပှၤလၢအအဲၣ်ဝဲတဖၣ်အဂီၢ်န့ၣ်လီၤ. ဒီးအဆၢဖိ ၂၀ ပာ်ဖျါဝဲလၢ, “ပှၤဖှီၣ်ဖိယာ်ဖိဒီး… ပှၤလၢအတၢ်တအိၣ်တဖၣ်” အဂီၢ်ဒၣ်လဲာ်, ကူၣ်ထီၣ်ဖးလီၤမၤစၢၤသ့ဝဲဒၣ်န့ၣ်လီၤ.

လၢ လံာ်ကတိၤဒိ ၃၁ အပူၤ, စိၤဆၢကတီၢ်လၢ တၢ်ရဲၣ်လီၤကွဲးပာ်ဖျါ မူဒါတၢ်မၤတဖၣ်, လၢတၢ်မၤစၢၤအံးထွဲကွၢ်ထွဲ ဟံၣ်ဖိဃီဖိတဖၣ်န့ၣ် တမ့ၢ်တၢ်မၤအဘီၣ်အညီဘၣ်. ဒ်န့ၣ်အသိး, ယဖံဖးဒိၣ်, ဒ်အမ့ၢ်ပှၤအိၣ်ဖျဲၣ်ထီၣ်ဝဲလၢ ၁၈၀၀ နံၣ်တဖၣ်အပူၤတဂၤ အဂီၢ်စ့ၢ်ကီးန့ၣ်, တမ့ၢ်တၢ်အဘီၣ်အညီဘၣ်. ဘၣ်ဆၣ်, မ့ၢ်လၢကစၢ်ယွၤ မၤစၢၤအဝဲသ့ၣ် ဒ်သိးကအိၣ်မူမၤလၢပှဲၤ တၢ်ဖံးတၢ်မၤတဖၣ်, လၢအဘၣ်ဃးဒီးတၢ်အံးထွဲကွၢ်ထွဲ ဟံၣ်ဖိဃီဖိတဖၣ်,ဃုာ်ဒီးပှၤအဂုၤအဂၤတဖၣ်အဃိ, လၢဂီၤထၢၣ်သၢ, ဒီးလၢဒီတနံၤအတီၢ်ပူၤ တၢ်ဃ့ထုကဖၣ်တၢ်န့ၣ်, ဒုးအိၣ်ထီၣ် ပိာ်မုၣ်သ့ၣ်တဖၣ်အံၤ ကပာ်ဖှိၣ်အတၢ်သးစၢၢ်ဆၢ, ဒီးတၢ်န့ၢ်ဂံၢ်န့ၢ်ဘါန့ၣ်လီၤ.