မဲနူၣ်အဲ (Manuel) အိၣ်ထီကတာ်အသးလၢ အသိလ့ၣ်အတၢ်လဲၤကျဲ မ့ၣ်အူ အဂီၤတတီၤအဃိ, ကလဲၤထီၣ်ဘါယွၤအဂီၢ်န့ၣ် စဲၤခံဝဲဒၣ်လံန့ၣ်လီၤ. လၢတၢ်သူၣ်တစူၤသးတစူၤအပူၤ အဝဲအိၣ်ခိးဝဲအကတီၢ်, အဖိမုၣ် ထံၣ်ဝဲဒၣ် ပှၤနီၣ်သိလ့ၣ် ပိာ်မုၣ်တဂၤ ကဆီတလဲ အသိလ့ၣ်အထါယၢၣ်န့ၣ်လီၤ. အဖိမုၣ်စံးဘၣ်အီၤ “ပါပါဧၢ, နဆီတလဲ ထါယၢၣ်တဖၣ် ဂ့ၤဒိၣ်မးအဃိ, နကြၢးမၤစၢၤအီၤန့ၣ်လီၤ.” မဲနူၣ်အဲကစဲၤခံအါထီၣ်ဘၣ်ဆၣ်, သ့ၣ်ညါဝဲဒၣ်လၢ တၢ်အိၣ်အသးအံၤ မ့ၢ်ကစၢ်ယွၤ အတၢ်ကတဲာ်ကတီၤလၢအဂီၢ်န့ၣ်လီၤ. ဒ်သိးကမၤစၢၤ ပိာ်မုၣ်တဂၤအံၤအဂီၢ်, အိၣ်ပတုာ် အသိလ့ၣ်, ဒီးကလဲၤထီၣ်ဘါသကိးယွၤအဂီၢ်ဒၣ်လဲာ်, ကွဲမုာ်ဝဲဒၣ်န့ၣ်လီၤ.

လံာ်မၤတၢ် ၁၆ ပာ်ဖျါဝဲဒၣ် စီၤပီလူးဒီးစီၤစံလၤ ဘၣ်ကွၢ်ဆၢၣ်မဲာ်ဝဲဒၣ် တၢ်မၤတံာ်တာ်အဝဲသ့ၣ်န့ၣ်လီၤ. အဝဲသ့ၣ် ထံၣ်လိာ်အသးဒီးကုၢ်ပိာ်မုၣ်ဖိလၢတၢ်နါဒိးအီၤတဂၤ ကိးပသူထီၣ်တၢ်တလီၢ်လီၢ် (:၁၇) န့ၣ်လီၤ. တဘျုးသီအတီၢ်ပူၤန့ၣ်, စီၤပီလူး တကနၣ်ဃုာ်အီၤဘၣ်. အကတၢၢ်န့ၣ်, စီၤပီလူး အသးဘၣ်တံာ်တာ်ဝဲနးနးကလဲာ်, ဒီးစံးဘၣ်တၢ်နါတဒုအံၤ, “ယမၤလိာ်နၤလၢ ယ့ၣ်ရှူးခရံာ်အမံၤ, လၢနကဟးထီၣ်ကွံာ်လၢပှၤအံၤအလိၤ” (:၁၈) န့ၣ်လီၤ.

တၢ်တမုာ်တလၤလၢအဂီၢ်ဘၣ်ဆၣ်, ဒ်သိးကမၤစၢၤ ပှၤဂၤအဂီၢ်, စီၤပီလူး ဘၣ်မၤ တၢ်ဃုထၢန့ၣ်လီၤ. ဖဲအမၤပူၤမၤဖျဲး ပိာ်မုၣ်ဖိတဂၤအံၤဝံၤန့ၣ်ဒီး, တၢ်ဂ့ၢ်ကီဟဲအိၣ်ထီၣ်အါမံၤန့ၣ်လီၤ. ကုၢ်ကစၢ် အတၢ်ဃုကျိၣ်ဃုစ့အကျိၤကျဲ ခီဖျိလၢပိာ်မုၣ်ဖိတဂၤအံၤန့ၣ် လီၤမၢ်ကွံာ်ဝဲအဃိ, “ဟံးဃာ်စီၤပီလူးဒီးစီၤစံလၤ, ဒီးမိၤအီၤဆူဖၠါပူၤ, ဆူပဒိၣ်တဖၣ်အအိၣ်” (:၁၉) န့ၣ်လီၤ. တၢ်ဒိတီၢ်အဝဲသ့ၣ်, ဒီးဘၣ်တၢ်ထၢနုာ်အီၤလၢဃိာ်ပူၤ (:၂၂-၂၄) န့ၣ်လီၤ.

လၢကစၢ်ခရံာ်အတၢ်မၤအဂီၢ်န့ၣ် ပကဘၣ်ဟ့ၣ် တၢ်အပှ့ၤကလံၤတဖၣ်န့ၣ်လီၤ. မး ၁၀:၃၈ အပူၤန့ၣ် ကစၢ်ယ့ၣ်ရှူး စံးဘၣ်အပျဲၢ်အဘီၣ်တဖၣ်လၢ အဝဲသ့ၣ်ကဘၣ်ယိးထီၣ် အနီၢ်ကစၢ်အထူၣ်စူညါ, ဒီးပိာ်အခံန့ၣ်လီၤ. တၢ်အံၤမ့ၢ် ကစၢ်ယ့ၣ်ရှူး အကျဲ- ပကဘၣ်တၢ်တြီမၤတံာ်တာ်ပှၤ, ဒီးဘၣ်တဘျီဘျီန့ၣ် ပကတူၢ်ဘၣ်ခီၣ်ဘၣ်တၢ် ဒ်ပတၢ်အုၣ်က့ၤခီၣ်က့ၤကစၢ်အသိးန့ၣ်လီၤ. ဒ်သိးပကတူၢ်လိာ် တၢ်တြီမၤတံာ်တာ်ပှၤ သတူၢ်ကလာ်တဖၣ်အံၤအဂီၢ်, အဝဲကွဲမုာ်ပှၤန့ၣ်လီၤ.