“လၢပထံကီၢ်ဒီဘ့ၣ် တၢ်အိၣ်ဖှိၣ်ခိၣ်နၢ် တၢ်ထံၣ်လိာ်အိၣ်ဖှိၣ်လိာ်သးအကတီၢ်, ပှၤကဟ့ၣ် တၢ်ကစီၣ်မိၢ်ပှၢ်အဂီၢ် မ့ၢ်ပကွဲမုာ်နၤကသ့န့ၣ်ဧါ.” ဖဲ ဟိၣ်စ့ (Jose) ဖးဝဲ တၢ်ကရၢကရိ, လၢအမံၤဟူသၣ်ဖျါတဖုအံၤ အလံာ်ကွဲမုာ်ဝံၤ, စံးဆၢဝဲဒၣ်လၢ, “ဝံသးစူၤ ပျဲယကဃ့ထုကဖၣ်ဆိ တၢ်ဂ့ၢ်အံၤအဂီၢ်န့ၣ်တက့ၢ်.” လၢခံန့ၣ်, တတူၢ်လိာ်ဝဲဒၣ် တၢ်ကွဲမုာ်အံၤဘၣ်, ဒီးစံးဘၣ်အတံၤသကိးတဂၤလၢ, “ကစၢ်ယွၤကိးယၤလၢ ယကမၤအဲးဒံးထၢၣ်အတၢ်မၤ, ဘၣ်ဃးဒီးမံးရှၢၣ်အတၢ်တိာ်ကျဲၤတခါအဂီၢ်န့ၣ် ယသ့ၣ်ညါယဲန့ၣ်လီၤ. ဒီးတၢ်ကလဲၤဟ့ၣ်တၢ်ကစီၣ်အဂီၢ်, ယကဘၣ်ဟ့ၣ် တၢ်ဆၢကတီၢ်, ဒီးယဂံၢ်ယဘါန့ၣ်လီၤ. ဒ်သိးယကမၤ တၢ်လၢကစၢ်ယွၤအဲၣ်ဒိးမၢယၤအဂီၢ်န့ၣ် ယတတူၢ်လိာ် တၢ်ကွဲမုာ်အံၤဘၣ်န့ၣ်လီၤ.

တၢ်လၢယွၤအသးအိၣ် လၢကဘၣ်မၤဝဲန့ၣ် ဟိၣ်စ့ ပာ်ဝဲဒၣ် ဒ်အတၢ်မၤနီၣ်ဂံၢ်တၢ, ဒီးမ့ၢ်တၢ်လၢအမၤလီၤတံၢ် အတၢ်ဆၢတဲာ်အံၤန့ၣ်လီၤ. ယွၤအတၢ်တိာ်ပာ်န့ၣ် ကစၢ်ယ့ၣ်ရှူးစ့ၢ်ကီး ပာ်ဝဲဒၣ် ဒ်အတၢ်မၤနီၣ်ဂံၢ်တၢန့ၣ်လီၤ. မၢ် ၁:၃၂-၃၅ ပာ်ဖျါဝဲဒၣ် လၢဝ့ၢ်ကပ့းရနီၣ်န့ၣ် ကစၢ်ယ့ၣ်ရှူး မၤဘျါဝဲဒၣ် ပှၤဆူးပှၤဆါ, “ကယဲၢ်ပှၤလၢအမၤတကဲဘၣ် ခဲလၢာ်, ဒီးဟီထီၣ်ကွံာ် တၢ်နါအါဒု” ဝံၤန့ၣ်ဒီး, “မုၢ်ဆ့ၣ်ထီၣ်တၢ်ခံးဒံးအကတီၢ်န့ၣ် ဟးထီၣ်, ဒီးလဲၤဝဲဆူ ပှၢ်မုၢ်ကနၢအလီၢ်, ဒီးဘါထုကဖၣ်တၢ်ဖဲန့ၣ်လီၤ.” အဆၢဖိ ၃၇ န့ၣ် အပျဲၢ်အဘီၣ်တဖၣ် ဟဲဃုထံၣ်န့ၢ်အီၤ, ဒီးစံးဘၣ်အီၤလၢ, “ပှၤခဲလၢာ်ဃုနၤလီၤ” န့ၣ်လီၤ. ပှၤလၢအလူၤဃုထံၣ်အီၤအကျါ ပှၤတနီၤန့ၣ် ဖျါလၢကကူစါယါဘျါအသးအဂီၢ်န့ၣ်လီၤ. ဘၣ်ဆၣ်, တၢ်လၢကမၤဝဲဒၣ်ဆူညါတမံၤအဂီၢ်န့ၣ်, ကစၢ်ယ့ၣ်ရှူးခရံာ် တပျဲ ဂ့ၢ်ဂီၤအူ တၢ်အိၣ်သး, (မ့) အမံၤဟူသၣ်ဖျါထီၣ်သတူၢ်ကလာ်တဖၣ် ကဆၢတဲာ်ဝဲဒၣ်ဘၣ်န့ၣ်လီၤ. အဆၢဖိ ၃၈ န့ၣ် ကစၢ်ယ့ၣ်ရှူး စံးဝဲဒၣ်လၢ “မ်ပလဲၤဆူခူဧိၤဝ့ၢ်ဧိၤအဘူးတဖၣ် ဒ်သိး ယကစံၣ်တဲၤတဲလီၤတၢ်ဖဲန့ၣ်စ့ၢ်ကီးတက့ၢ်. အဂ့ၢ်ဒ်အံၤ, ယဟဲထီၣ်လၢတၢ်န့ၣ်အဂ့ၢ်” န့ၣ်လီၤ. အဆၢဖိ ၃၉ ပာ်ဖျါဝဲဒၣ်လၢ ကစၢ်ယ့ၣ်ရှူး လူၤပိာ်မၤထွဲ အတၢ်မၤအခိၣ်သ့ၣ် လၢအမ့ၢ် တၢ်မၤကစၢ်ယွၤအတၢ်မၤ,ဃုာ်ဒီးတၢ်စံၣ်တဲၤတဲလီၤတၢ်, လၢကၤလံၤလါ အကီၢ် ဒီတဘ့ၣ်အပူၤန့ၣ်လီၤ.

ကစၢ်ယွၤအတၢ်တိာ်ပာ်လၢပဂီၢ်န့ၣ် မ့ၢ်ပကသ့ၣ်ညါအီၤဒ်လဲၣ်. ပသုးဘူးပသးဆူယွၤအအိၣ်သ့ဝဲဒၣ် ခီဖျိလၢတၢ်ထုကဖၣ်, လၢအကလုၢ်ကထါ လံာ်စီဆှံအပူၤန့ၣ် ပကဃုထံၣ်န့ၢ် ယွၤအတၢ်ကူၣ်သ့, ဒီးပကပျဲအနဲၣ်ဆှၢပှၤ, ဒီးဃုထံၣ်န့ၢ် တၢ်ဟ့ၣ်ကူၣ်ဟ့ၣ်ဖးတဖၣ်လၢ ပှၢလၢအမူထွဲမၤထွဲ ယွၤအကျဲတဖၣ်အအိၣ်န့ၣ်လီၤ. မ်ပကအိၣ်မူလဲၤ ခီဖျိ ဒ်တၢ်လၢကစၢ်ယွၤအသးအိၣ် ပကမၤတၢ်တဖၣ်န့ၣ်တက့ၢ်.