လၢတၢ်သ့ၣ်နီၣ်မၤလၤကပီၤ တၢ်ကရၢကရိ လၢအတဃုနီၢ်ကစၢ်အဘျုးတဖု အနံၣ်ယဲၢ်ဆံ နံၣ်ဆဲးဆၢ, ဒီးတၢ်ကမၤလၤကပီၤ ပှၤလၢအဒုးအိၣ်ထီၣ်တၢ်ကရၢကရိအံၤ, လီၤဆီဒၣ်တၢ်, ပှၤလၢအဟ့ၣ်လီၤသး ဒီးမၤတ့ၢ်လံတၢ် အါနံၣ်အါလါတဖၣ်အဂီၢ်, ပှၤသမှံၤ အဂၤလၢအကယၤတဖၣ် ဟဲပှဲၤကတံာ်ဝဲ ဘျီရိဖှိၣ်ဒၢးတဒၢးန့ၣ်လီၤ. ပှၤသူၣ်ထီၣ်တၢ်ကရၢကရိတဂၤ ပာ်ဖျါထီၣ်အတၢ်စံးဘျုးယွၤဆူ ပှၤမုာ်သးမၤကလီတၢ်တဖၣ်ဟ့ၣ်ထီၣ် အတၢ်ဆၢကတီၢ်, နၣ်ရံၣ်လၢအကထိတဖၣ်, ဒီးစ့ဆီၣ်ထွဲမၤစၢၤတၢ် ဒီလၣ်လၢအကကွဲၢ်တဖၣ်ဘၣ်ဆၣ်, မ့တမ့ၢ်ဘၣ်လၢကစၢ်ယွၤအဃိန့ၣ်ဒီး, တမ့ၢ်တၢ်မၤ ကဲထီၣ်လိၣ်ထီၣ်ကသ့ဝဲဒၣ်ဘၣ်န့ၣ်လီၤ. စံးကဒီးဝဲဒၣ်လၢ တၢ်ကရၢကရိ လဲၤထီၣ် လဲၤထီဝဲဒၣ်န့ၣ် တမ့ၢ်လၢပှၤကညီ အတၢ်ထဲးဂံၢ်ထဲးဘါအဃိဘၣ်. မ့မ့ၢ်လၢ ကစၢ်ယွၤသုးကျဲၤကတဲာ်ကတီၤန့ၢ်တၢ်လၢ အဝဲသ့ၣ်အဂီၢ်အဃိန့ၣ်လီၤ.

တၢ်သ့ၣ်ညါမၤလၤကပီၤယွၤ လၢတၢ်ဟ့ၣ်အဂ့ၤတဖၣ်အဂီၢ်န့ၣ် မ့ၢ်တၢ်အကါဒိၣ်တမံၤလီၤန့ၣ် စီၤဒၤနံးယ့လး နၢ်ပၢၢ်ဝဲဒၣ်န့ၣ်လီၤ. လၢခါဆူညါတၢ်ကမၤအသးအဂီၢ်, ဖဲစီၤပၤနဘူးကးန့စၢ် ဒိးန့ၢ်ဘၣ်တၢ်မံမီၢ်န့ၣ်ဒီး, ကိးဝဲဒၣ် အပှၤကူၣ်သ့တဖၣ်ခဲလၢာ် လၢကီၢ်ဘၤဘူၤလိၣ်အပူၤ, ဒ်သိးကပာ်ဖျါထီၣ်က့ၤ အတၢ်မံမီၢ်, ဒီးကကျိာ်ထံအခီပညီအဂီၢ် န့ၣ်လီၤ. လၢတၢ်သးဟးဂီၤအပူၤန့ၣ်, အဝဲသ့ၣ်စံးဆၢ စီၤပၤလၢ ဒ်စီၤပၤ ဃ့ဝဲအသိးန့ၣ် လၢဟီၣ်ခိၣ်ချၢအံၤ ပှၤကမၤဝဲန့ၣ် တအိၣ်နီတဂၤဘၣ်. တၢ်မၤအံၤ လိၣ်ဘၣ် တၢ်စိကမီၤလီၤလိၢ်လီၤလးတမံၤမံၤ (ဒၤ ၂:၁၀-၁၁) န့ၣ်လီၤ. စီၤဒၤနံးယ့လး တူၢ်လိာ်ဝဲတၢ်ဂ့ၢ်အံၤ,ဒီးစံးဘၣ် စီၤပၤလၢ, “တၢ်ခူသူၣ်တမံၤလၢစီၤပၤဃ့ဝဲန့ၣ် ပှၤကူၣ်တၢ်သ့, ပှၤသ့တၢ်အူတၢ်သမူ, ပှၤကွဲးလံာ်, ပှၤကွၢ်ဆၣ်ဧိၤဖီဧိၤသ့န့ၣ် ဒုးနဲၣ် စီၤပၤ တသ့ဘၣ်နီတဂၤဘၣ်. မ့မ့ၢ် ကစၢ်အိၣ်ဝဲလၢမူခိၣ်တဂၤ, လၢအလီၣ်ဖျါ တၢ်ခူသူၣ်တဖၣ်” (: ၂၇-၂၈) န့ၣ်လီၤ. လၢတၢ်နာ်အပူၤန့ၣ်, ဃ့ဝဲဒၣ် ကစၢ်ယွၤ လၢကလီၣ်ဖျါထီၣ် တၢ်မံမီၢ်အံၤ ဆူအအိၣ်န့ၣ်လီၤ. ဖဲကစၢ်ယွၤစံးဆၢ အတၢ်ထုကဖၣ်, ဒီးဒုးနဲၣ်ဖျါထီၣ် တၢ်မံမီၢ် အခီအပညီအဃိ, လၢတၢ်ဆီၣ်လီၤသးအပူၤန့ၣ် စီၤဒၤနံးယ့လး ဟ့ၣ်ထီၣ်တၢ်လၤကပီၤအဆိအချ့ဆူ အကစၢ်ယွၤ, အဒိၣ်အထီတဂၤအအိၣ်, ဒီးတမ့ၢ်လၢ အနီၢ်ကစၢ်အတၢ်ကူၣ်သ့ကူၣ်ဘၣ် (:၃၀, ၄၅) န့ၣ်ဘၣ်.

တၢ်ပာ်ပနီၣ်မၤလၤကပီၤ တၢ်မၤကဲထီၣ်လိၣ်ထီၣ်တဖၣ်န့ၣ် မ့ၢ်တၢ်လၢအဂ့ၤ ဘၣ်ဆၣ်, တကတီၢ်ဃီန့ၣ်, ပကြၢးဟ့ၣ်ထီၣ် တၢ်မၤလၤကပီၤကစၢ်ယွၤန့ၣ်လီၤ. ပမ့ၢ်ကွၢ်ကဒါက့ၤ လၢပတၢ်အိၣ်မူအပူၤ, တၢ်လၢပကြၢးစံးထီၣ်ပတြၢၤတဖၣ်, အကတၢၢ်န့ၣ် မ့ၢ်ဒၣ်တၢ်အိၣ်ဟဲဝဲလၢကစၢ်ယွၤအအိၣ်န့ၣ်လီၤ.