လၢကီၢ် စကီးတလဲ(န) (Scotland), ဘရိၤရၣ် (Brora) သဝီ, အကစၢၢ်တြီၤလာ်အပူၤန့ၣ်, သိဖိတဒုလိၣ်ဘၣ်ဝဲ တၢ်ကမၤထူၣ်ဖျဲးအီၤန့ၣ်လီၤ. သိတဒုအံၤ အိၣ်ကတာ်အသး, ဖဲလ့ကဘျၣ်အဖီလာ်, တကပၤန့ၣ်လၢၢ်လ့ဖးထီ, ဒီးအတကပၤန့ၣ် ပီၣ်လဲၣ်မိၢ်ပှၢ်အိၣ်ဝဲဒၣ်န့ၣ်လီၤ. သိဖိအံၤ ဘၣ်အိၣ်ဝဲဖဲန့ၣ် ထဲတဒုဧိၤ ခံနံၣ်ညါန့ၣ်လီၤ. တချုးလၢ ပှၤထူစံၣ်ဖိ ခဲ(န)မံၣ် ဝ့လ်စၢၣ် (Cammy Wilson) ဒီးအတံၤသကိးလွံၢ်ဂၤန့ၣ်, လၢတၢ်ပာ်လီၤသးကျၢၤမူဆှုအပူၤ, လဲၤမၤပူၤဖျဲးအီၤန့ၣ်, တၢ်ဂုာ်ကျဲးစၢးမၤထူၣ်ဖျဲးအီၤ တလီၢ်လီၢ်ဘၣ်ဆၣ်, ပှၤလဲၤတတုၤဆူအအိၣ်နီတဂၤဘၣ်န့ၣ်လီၤ. ပှၤတဖုအံၤအကျါ ပှၤသၢဂၤ ဒ်သိးကလဲၤတုၤဆူအအိၣ်အဂီၢ်, ဘၣ်လဲၤလီၤဝဲဆူ လ့ကၢၢ်ပၤအဖီလၣ် အထီကအိၣ်ဝဲ, ၈၂၀ ခီၣ်ယီၢ်, လၢတၢ်ပလီၢ်ပဒီသးအပူၤန့ၣ်လီၤ. လၢတၢ်သူၣ်ဒူသးဒူအပူၤန့ၣ်, အဝဲသ့ၣ် စူးကါဝဲဒၣ် ကဟၣ်စိာ်ထီၣ်စိာ်လီၤတၢ်, ဒ်သိးကမၤပူၤဖျဲးထီၣ်သိဖိလၢ အတၢ်နးတၢ်ဖှီၣ်အံၤအပူၤအဂီၢ်န့ၣ်လီၤ.
တၢ်ပာ်လီၤသးကျၢၤမူဆှုဒီးတၢ်သူၣ်ကညီၤသးကညီၤလၢ ပှၤထူစံၣ်ဖိဒီးအတံၤသကိးတဖၣ်အဂ့ၢ်န့ၣ် ဆဲးကပီၤဖျါက့ၤ ပပၢ်ကစၢ်ယွၤ လၢအအဲၣ်ပှၤကွံပှၤတဂၤအံၤ အတၢ်အဲၣ်တၢ်သးကညီၤ, ဖျါဖဲ လံာ်ယံးရမံယၤ ၂၃:၁-၃ အပူၤန့ၣ်လီၤ. အဆၢဖိ ၁ န့ၣ် ဝံ စံးကတိၤဒုၣ်ဒွဲၣ် ပှၤယူဒၤဖိခိၣ်နၢ်တဖၣ် ဒ် “ပှၤကွၢ်သိလၢအမၤဟးဂီၤ, ဒီးမၤလီၤပြံလီၤပြါ ယတၢ်အီၣ်ဆၣ်အလီၢ်အသိတဖၣ်” အသိးန့ၣ်လီၤ. ဒီးအဆၢဖိ ၂ န့ၣ် ယွၤပာ်ဖျါခီဖျိလၢ ဝံယံးရမံယၤ, မ့ၢ်လၢခိၣ်နၢ်တဖၣ် မၤနးမၤဖှီၣ် အပှၤဂီၢ်မုၢ် လၢကအံးက့ၤကွၢ်က့ၤ လီၤအသးတသ့တဖၣ် နးနးကျံၤကျံၤအဃိ, “ယကအိၣ်သကိးသုလၢသုမၤတၢ်အၢအဃိ” န့ၣ်လီၤ. ကစၢ်ယွၤ ထံၣ် အသိလၢအလီၤပြံလီၤပြါတဖုအံၤ အတၢ်နးတၢ်ဖှီၣ်, ဒီးအသူၣ်ကိၢ်သးဂီၤဝဲဒိၣ်ဒိၣ်မုၢ်မုၢ်န့ၣ်လီၤ. တမ့ၢ်ထဲကစၢ်ယွၤသူၣ်ကိၢ်သးဂီၤဝဲဒၣ်ဘၣ်, မ့မ့ၢ်လၢ အဆၢဖိ ၃ န့ၣ် ယွၤစံးဝဲဒၣ် လၢတၢ်အဲၣ်တၢ်ကွံအပူၤ, “ဒီးယကထၢဖှိၣ်ယသိတဖု အတၢ်အိၣ်လီၤတဲာ်လၢ ကယဲၢ်ကီၢ်လၢယဟီထီၣ်ကွံာ်အီၤဆူအပူၤ, ဒီးယကဒုးဟဲက့ၤအီၤဆူကရၢပူၤ, ဒီးကသၣ်ထီၣ်, ဒီးကအါထီၣ်” ဝဲဒၣ်န့ၣ်လီၤ.
ဖဲပတူၢ်ဘၣ်ခီၣ်ဘၣ် ဒ်ပကျဲလီၢ်မၢ်, ဒ်ပဘၣ်တၢ်စၢဃာ်ပှၤ, (မ့) ပဘၣ်အိၣ်ဒၣ်ထဲတဂၤဧိၤအကတီၢ်န့ၣ်, ပပၢ်အိၣ်လၢမူခိၣ်တဂၤ ထံၣ်သ့ၣ်ညါဝဲ ပတၢ်နးတၢ်ဖှီၣ်တဖၣ်, ဒီးတစူးကွံာ်ညိကွံာ်ပှၤလၢ တၢ်မၤစၢၤတအိၣ်အလီၢ်အကျဲန့ၣ်ဘၣ်. ယွၤ ဃုထံၣ်န့ၢ်ကျဲလၢကမၤပူၤဖျဲးပှၤ, ဒီးကမၤဘၣ်လိာ်ဘၣ်စးက့ၤပှၤသပှၢ်တၢၢ်န့ၣ်လီၤ.
