“အါ…” ယဖိမုၣ် ဟီၣ်ကိးပသူဝဲဒၣ်လၢ “ပါပၢ်ဧၢ, ဟဲဆူအံၤတက့ၢ်” န့ၣ်ဒီး, တၢ်မၤအသးမနုၤတမံၤလဲၣ်န့ၣ် ယသ့ၣ်ညါယဲ, ဒီးမ့ၢ်ဝဲဒၣ် တၢ်ဖိဃၢ်ဖိတဖၣ်အဃိန့ၣ်လီၤ. ကိးနံၣ်ဒဲး, လၢတၢ်ကိၢ်ထီၣ်သီအကတီၢ်န့ၣ် တၢ်ဖိဃၢ်ဖိလၢအကရူၢ်အိၣ်ဟဲဝဲဒၣ်လၢ နံၣ်ဘရၤစကၤ (Nebraska) တၢ်ပၢၤခိၣ်တဖၣ်န့ၣ် သုးလီၢ်သုးကျဲဆူ ကိၣ်လိၣ်ရၤဒိၣ် (Colorado) အကစၢၢ်တဖၣ်,ဒ်အမ့ၢ် တၢ်ကိၢ်ခါအလီၢ်အကျဲအဃိန့ၣ်လီၤ. ပဘၣ်ပလီၢ်သူၣ်ပလီၢ်သးကိးနံၣ်ဒဲး, ဖဲတၢ်ဖိဃၢ်တဖၣ်ဟဲတုၤဝဲဒၣ်အကတီၢ်န့ၣ်လီၤ. လီၤဆီဒၣ်တၢ်န့ၣ်, တၢ်တနံၣ်အံၤ နးဒိၣ်ဝဲဒၣ်န့ၣ်လီၤ.

တၢ်ဖိဃၢ်တဖၣ်အံၤ ဟဲယူၢ်လီၤဝဲဒၣ်တလီၢ်လီၢ်ဆူ ပှၤအမဲၥ်သၣ်လိၤလိၤအဃိ, ကဲထီၣ်တၢ်ဂ့ၢ်ကီလၢ ၦၤကညီတဖၣ်အဂီၢ်ဘၣ်ဆၣ်, မ့မ့ၢ်လၢထိၣ်သ့ၣ်တဖၣ်အဂီၢ်န့ၣ် မ့ၢ်ဝဲဒၣ် တၢ်အီၣ်မူးအီၣ်ပွဲန့ၣ်လီၤ. ယမၤဃုသ့ၣ်ညါတၢ်ဝံၤန့ၣ်ဒီး, ယမၤလိန့ၢ်ဘၣ်ယဲလၢ တၢ်ဖိဃၢ်တဖၣ်အံၤ ဟ့ၣ်ထီၣ်ဝဲ တၢ်အီၣ်န့ၢ်ဂံၢ်န့ၢ်ဘါဒိၣ်ဒိၣ်လၢလီၢ်ကဝီၤ ထိၣ်ဘျ့ၣ်ဘျီၣ်တဖၣ်အဂီၢ်န့ၣ်လီၤ. တၢ်ဖိဃၢ်တဖၣ်အံၤ ကဲထီၣ်တၢ်သးတံၥ်တၥ်လၢ ပှၤကညီတဖၣ်အဂီၢ်အသိးန့ၣ်, အဝဲသ့ၣ်တဖၣ် မ့ၢ် “ကိၢ်မၤနၤ” နီၢ်နီၢ်လၢ ထိၣ်သ့ၣ်တဖၣ်အဂီၢ်န့ၣ်လီၤ.

လၢကစၢ်ယ့ၣ်ရှူး အစိၤဆၢကတီၢ်, လၢ ကီၢ်အံၣ်စရ့လးအပူၤန့ၣ် တၢ်ဖိဃၢ်သုးလီၢ်သုးကျဲတဖၣ် မ့ၢ်အိၣ်ဧါန့ၣ် ယတသ့ၣ်ညါဘၣ်. ဘၣ်ဆၣ်, ဖဲ မးသဲ ၆:၂၆ အပူၤန့ၣ် ကစၢ်ခရံၥ် စံၣ်တဲာ်တဲၤလီၤတၢ်လၢကစၢၢ်ဒီခိၣ်အကတီၢ်န့ၣ် ပာ်ဖျါဝဲဒၣ်လၢ ကစၢ်ယွၤ လုၢ်အီၣ်လုၢ်အီ ထိၣ်ဖိတဖၣ်အဂ့ၢ်, စံးဝဲဒၣ်လၢ, “ကွၢ်ထိၣ်ဖိလံၣ်ဖိလၢတၢ်ဖးဖီန့ၣ်တက့ၢ်. အဂ့ၢ်ဒ်အံၤ, တဖှံတၢ်ဘၣ်, တကူးဘၣ်တၢ်ဘၣ်, တဂၢ်ဖှိၣ် တၢ်လၢသိၣ်ပူၤဖီပူၤဘၣ်. ဒီးသုပၢ်အိၣ်လၢမူခိၣ်န့ၣ် လုၢ်အီၣ်လုၢ်အီအီၤလီၤ. သုဝဲဒၣ်အံၤသုဂ့ၤန့ၢ်အီၤ ဒိၣ်ဒၣ်တၢ်တက့ၢ်. တမ့ၢ်ဘၣ်ဧါ,” န့ၣ်လီၤ.

လၢတၢ်န့ၣ်အဃိ, ခ့ခါအဆၢကတီၢ်န့ၣ် ယကွၢ်တၢ်ဖိဃၢ်တဖၣ် လၢကျိၤကျဲလီၤဆီအပူၤန့ၣ်လီၤ. ယကွၢ်တၢ်ဖိဃၢ်တဖၣ်အံၤန့ၣ် တမ့ၢ်ဝဲဒၣ်ဒ်တၢ်လၢအလီၤသးဘၣ်အၢတဖၣ်အသိးဘၣ်. မ့မ့ၢ်တၢ်လၢအဒုးသ့ၣ်နီၣ်ကစၢ်ယွၤလုၢ်အီၣ်လုၢ်အီ အတၢ်ဘၣ်တ့- ဒ်တၢ်ဟ့ၣ်ဒိအမူလၢ ကစၢ်ယွၤ လုၢ်အီၣ်လုၢ်အီယၤအသိးန့ၣ်လီၤ. ကစၢ်ယွၤ မ့ၢ်လုၢ်အီၣ် လုၢ်အီ ထိၣ်ဘျ့ၣ်ဘျီၣ်တဖၣ် အါအါဂီၢ်ဂီၢ်ဒ်သိးအံၤန့ၣ်ဒီး, ကစၢ်ယွၤ ကကွၢ်ထွဲကဟုကယာ်ဝဲဒၣ် နၤဒီးယၤထဲလဲၣ်.