ဖ့လ့း(စ) ဝံးတလ့ၣ် (Phillis Wheatley) မ့ၢ် ၦၤအၤဖြံၤကၤ-အမဲရကၤဖိ ၦၤကွဲးထါ, ဒီးအလံၥ်ဘၣ်တၢ်ထုးထီၣ်အဆိကတၢၢ်တဂၤအံၤ စူးကါဝဲဒၣ် လံၥ်စီဆှံ အတၢ်ဂ့ၢ်မိၢ်ၦၢ်တဖၣ်, ဒ်သိးကထုးန့ၢ်ဝဲ ၦၤစူၢ်နၥ်ကစၢ်ယ့ၣ်ရှူးတဖၣ်လၢ တၢ်မၤကတၢၢ်ကွံၥ် တၢ်မၢကဲကုၢ်အတၢ်မၤန့ၣ်လီၤ. အဝဲအိၣ်ဖျဲၣ်ထီၣ် ဖဲ ၁၇၅၃ နံၣ် အဘၢၣ်ကဝီၤ, လၢအၤဖြံၤကၤ-မုၢ်နုၥ်တကပၤ, ဒီးဖဲအသးအိၣ်ဒံးထဲ နွံနံၣ်န့ၣ် ဘၣ်တၢ်ဆါကွံၥ်အီၤဆူ ၦၤဆါၦၤပှ့ၤကုၢ်တဂၤ အအိၣ်န့ၣ်လီၤ. လၢတၢ်ကူၣ်ဘၣ်ကူၣ်သ့တကပၤန့ၣ် သိၣ်လိန့ၢ်တၢ်ချ့သဒံး, ဒ်အမ့ၢ် ကၠိဖိစဲၣ်နီၤလီၤဆီတဂၤ, ဒီးအကတၢၢ်န့ၣ်, ပူၤဖျဲးဝဲလၢတၢ်ကဲကုၢ်အလီၢ်, ဖဲ ၁၇၇၃ နံၣ်န့ၣ်လီၤ. လၢအထါတဖၣ်, ဒီးအလံာ်ပရၢလၢအကွဲးဟ့ၣ်ယုၢ်လိာ်သးတဖၣ်အပူၤန့ၣ်, ဝံးတလ့ၣ် ဟ့ၣ်သဆၣ်ထီၣ် အၦၤဖးတၢ်ဖိတဖၣ်လၢ ကအၢၣ်လီၤတူၢ်လိၥ် လံၥ်စီဆှံအတၢ်မၤဂၢၢ်မၤကျၢၤ, ဘၣ်ဃးဒီးၦၤကိးဂၤဒဲးန့ၣ်အိၣ်ဒီးခွဲးယာ်အပတီၢ် ဒ်သိးသိးအဂ့ၢ်န့ၣ်လီၤ. အဝဲကွဲးပာ်ဖျါဝဲဒၣ်လၢ, “ၦၤကိးဂၤအသးကံၢ်ပူၤန့ၣ် ယွၤသူၣ်လီၤဝဲ တၢ်ဘျၢသနူလၢအကါဒိၣ်, ဒီးပကိးအီၤလၢ တၢ်အဲၣ်တၢ်သဘျ့- လၢအတတူၢ်လိာ် တၢ်ဆီၣ်သနံးမၤအၢမၤနးတၢ်, ဒီးအသးသူဝဲဒၣ် တၢ်အိၣ်မူလၢအသဘျ့, ဒီးတၢ်ဘျၢသနူတမံၤအံၤအိၣ်မူဝဲဒၣ်လၢပပူၤန့ၣ်လီၤ.”

ၦၤကိးဂၤဒဲးအိၣ်ဒီးခွဲးယာ်အပတီၢ်ဒ်သိးသိး, လၢယွၤအမဲၥ်ညါန့ၣ် မ့ၢ်တၢ်မ့ၢ်တၢ်တီတမံၤလၢ စီၤပီလူး ပၥ်ဒိၣ်ဝဲအံၤ ဖျါလၢ ကလၤ ၃:၂၈ အပူၤ, ဒီးကွဲးပာ်ဖျါဝဲ, “ ၦၤယူဒၤဖိတအိၣ်, ၦၤဟ့းလ့ၣ်ဖိတအိၣ်, ၦၤကုၢ်ဖိတအိၣ်, ၦၤသဘျ့ဖိတအိၣ်, ၦၤပိၥ်မုၣ်တအိၣ်, ၦၤပိၥ်ခွါတအိၣ်ဘၣ်. အဂ့ၢ်ဒ်အံၤ, သုမ့ၢ်တၢ်တမံၤဃီခဲလၢၥ်လၢ ယ့ၣ်ရှူးခရံၥ်အပူၤလီၤ.” အဆၢဖိ ၂၆ စံးဘၣ်ပှၤလၢ ပမ့ၢ် “ယွၤအဖိလၢတၢ်နၥ်ယ့ၣ်ရှူးခရံၥ်အဃိ,” တၢ်လီၤဆီလိာ်သးတဖၣ်, ဒ်အမ့ၢ် ပှၤကညီအကလုၥ်, ပှၤကလုာ်ဒူၣ်, မုၣ်ခွါ, (မ့) တၢ်ရ့လိၥ်ဘၣ်ထွဲလိာ်သးအပတီၢ်တဖၣ်န့ၣ် တမ့ၢ်တၢ်လၢ အကြၢးဒုးအိၣ်ထီၣ် တၢ်မၤလီၤဖးတၢ်အဒူၣ်အဆၢလၢ ခရံာ်တၢ်အိၣ်ဖှိၣ်အပူၤဘၣ်န့ၣ်လီၤ.

ပမ့ၢ်ၦၤတဖၣ်လၢအဒိးန့ၢ် ယွၤအတၢ်အဲၣ်ဒ်သိးသိးဒၣ်လဲာ်, ပဘၣ်ကျဲးစၢးအိၣ်မူ ပိာ်ထွဲ တၢ်ဘျၢသနူတမံၤအံၤအဖၢမုၢ်န့ၣ်လီၤ. ဘၣ်ဆၣ်, လံၥ်စီဆှံ နဲၣ်လိၦၤလၢ ၦၤကလုၥ်တဖၣ် မ့ၢ်ပၥ်ဖှိၣ်ထီၣ်အသး, ခီဖျိလၢတၢ်နၥ်ကစၢ်ခရံၥ်န့ၣ်ဒီး, လၢတၢ်ဆဲးကပီၤဖျါထီၣ်က့ၤ ယွၤအသး, ဒီးယွၤအတၢ်ရဲၣ်တၢ်ကျဲၤလၢ သးသမူအထူအယိၥ်အဂီၢ်, ကမ့ၢ်တၢ်အဂ့ၤကတၢၢ်န့ၣ်လီၤ. ခဲကနံၣ်အံၤ, ဒ်သိးပကပာ်ပနီၣ်မၤလၤကပီၤ တၢ်လီၤဆီလိၥ်သးတဖၣ်လၢပတၢ်စူၢ်တၢ်နၥ် အပှၤတဝၢအပူၤအဂီၢ်န့ၣ် တၢ်မ့ၢ်တၢ်တီအံၤ မၤစၢၤၦၤသ့ဝဲဒၣ်န့ၣ်လီၤ.