နံလ် ဒီးကလဲးစ် ကလဲၤဝဲဆူ ကီၢ် အၤရလဲ(န) (Ireland) အဂီၢ်, ဒိးထီၣ်ဝဲဒၣ် ကဘီယူၤအကတီၢ်န့ၣ်, ထံၣ်ဝဲဒၣ်လၢ ၦၤလဲၤတၢ်ဖိအဂၤတဂၤ ဆ့ၣ်နီၤဝဲဒၣ်လၢ အခးဆ့ၣ်နီၤအဃိ, ဒ်သိးကဃုသ့ၣ်ညါ တၢ်တဘၣ်လိၥ်ဘၣ်စးတမံၤအံၤအဂီၢ်, အဝဲစးထီၢ်ကတိၤတၢ်န့ၣ်လီၤ. ဖဲ ၦၤလဲၤတၢ်တဂၤအံၤ ကွၢ်ထီၣ်အီၤန့ၣ်ဒီး, နံလ် ထံၣ်ဝဲဒၣ် ၦၤလၢအမဲာ်သၣ်လီၤဂၥ်လိာ် အသးဒီးအီၤတဂၤ မဲၥ်သကိးမဲၥ်န့ၣ်လီၤ. ၦၤလဲၤတၢ်အဂုၤအဂၤတဖၣ် ဖဲအထံၣ်ဝဲဒၣ် ၦၤလၢအမဲာ်သၣ်လီၤဂာ်လိာ်အသးခံဂၤ ဒိသကိးတၢ်ဂီၤ ဆဲ(လ)ဖံၣ် (selfie) န့ၣ်ဒီး, နံၤဘၣ်အဝဲသ့ၣ်န့ၣ်လီၤ. လၢခံ, ထံၣ်လိၥ်ကဒီးအသး, ဖဲလဲၤအိၣ်ဆိးဝဲဒၣ်လၢ သမှံၤဟံၣ်ဒွဲ (hotel) တဖျၢၣ်ဃီ, ဒီးထံၣ်လိာ်ကဒီးအသး သၢဘျီတဘျီလၢ တၢ်အီသံးအကျးန့ၣ်လီၤ. မ့ၢ်လၢအမဲၥ်သၣ်လီၤဂၥ်လိၥ်သးအဃိ, အဝဲသ့ၣ်အတၢ်ဂီၤန့ၣ် အမံၤဟူသၣ်ဖျါဝဲဒၣ်လၢ ဆဲးကျိးန့ၢ်တီၤ (social media) အလိၤန့ၣ်, သ့ၣ်ညါထွဲဝဲဒၣ် လၢခံတဂီၤန့ၣ်လီၤ.

ပတမ့ၢ် ဒီပုၢ်ဝဲၢ်အတဃံၥ်ဒၣ်လဲာ်, ပမဲာ်သၣ်လီၤဂၥ်လိၥ်သးဒီးၦၤအဂၤတဂၤန့ၣ် ကမ့ၢ်တၢ်လီၤကမၢကမၣ် လၢပဂီၢ်ဘၣ်ဆၣ်, လံၥ်စီဆှံ စံးဘၣ်ပှၤလၢ ပမ့ၢ်အိၣ်မူပိာ်ထွဲယွၤအခံန့ၣ်ဒီး, ပကလီၤဂၥ်အါထီၣ်ဒီးကစၢ်ယွၤ အဂ့ၢ်န့ၣ်လီၤ. လၢလံၥ်စီဆှံအလီၢ်လံၤအပူၤန့ၣ်, စီၤမိၤရှ့ အမဲၥ်ဖံးကပီၤကပြုၢ်ကပြီၤ, ဖဲအထံၣ်လိၥ်သး မဲၥ်သကိးမဲၥ်ဒီးကစၢ်ယွၤ- ဒီး၂ ကရံၣ် ၃:၇ ပာ်ဖျါဝဲဒၣ် “အိၣ်ဒီးအလၤအကပီၤတုၤဒၣ်လဲၥ်ၦၤအံၣ်စရ့လးဖိ ကွၢ်ထံကွၢ်ဆး စီၤမိၤရှ့အမဲၥ်တကဲဘၣ်လၢ အမဲၥ်အလၤကပီၤလၢအကဟါမၢ်တ့ၢ်ဝဲအဃိ,” (ကွၢ် ၂ မိၤ ၃၄:၃၃-၃၅) န့ၣ်လီၤ.

တနံၤအံၤ, ခီဖျိလၢသးစီဆှံအတၢ်မၤအပူၤန့ၣ် ပကထံၣ်ဘၣ် ကစၢ်ယ့ၣ်ရှူး အလၤကပီၤ လီၣ်ဖျါထီၣ်အသး, ခီဖျိၦၤဂီၢ်မုၢ်လၢ, “အဘၣ်တၢ်လဲလိၥ်သးဆူ တၢ်အက့ၤအဂီၤတမံၤဃီ” တဖၣ် (၂ ကရံၣ် ၃:၁၈, ကွၢ် အဆၢဖိ ၈) န့ၣ်လီၤ. ပတၢ်သ့ၣ်ညါယွၤ, ဒီးပတၢ်အဲၣ်ယွၤ ဒိၣ်ထီၣ်အါထီၣ်တၢ်န့ၣ် လဲၤကတၢၢ်ဝဲဒၣ် လၢပတၢ်အိၣ်မူလုၢ်လၢ်အဂ့ၤအဝါ, ဒီးလၢသူၣ်ဂ့ၢ်သးကျိၤ အတၢ်ဆီတလဲအသးတဖၣ်န့ၣ်, အိၣ်ဖျါထီၣ်ဝဲဒၣ် လၢသူၣ်လၢသး, ဒီးလၢနီၢ်ခိက့ၢ်ဂီၤ ခံမံၤလိာ်န့ၣ်လီၤ. ဖဲကစၢ်ယွၤ “ဆီတလဲ” ပသူၣ်ပသး, ဒီးပသးအတၢ်သ့ဆိကမိၣ်တၢ်တဖၣ်န့ၣ် ကကဲထီၣ်တၢ်အုၣ်အသးလၢ ၦၤလဲၤသကိးတၢ်ဒီးၦၤတဖၣ်အမဲၥ်ညါ, လၢပသးသမူအတၢ်လဲၤတဖၣ်အပူၤန့ၣ်လီၤ.