နံၣ်လၢအပူၤကွံၥ်တဖၣ်န့ၣ်, ဖဲယလဲၤဆူတၢ်မၤလီၢ်, ဒ်သိးဒီးယကချုးန့ၢ်လ့ၣ်မ့ၣ်အူအဂီၢ်, ယဘၣ်လဲၤဟးလၢယခီၣ်န့ၣ်ဒီး, ယထံၣ် ပိၥ်မုၣ်တဂၤ,ဃုၥ်ဒီးအထွံၣ်အၢသီတဒု ဟဲဆူယအိၣ်လိၤလိၤန့ၣ်လီၤ. ယဒိၣ်ထီၣ်ညီနုၢ်ဝဲဒၣ်လၢ ပှၤဘုၣ်လိာ်ကွဲထွံၣ်ဖိတဖၣ်လၢ ဟံၣ်ခိၣ်ဟံၣ်ဃၢၤအဃိ, တံၤသကိးလၢအဆူၣ်အိၣ်ကပုၥ်လုးဖိတဖၣ်န့ၣ် ယတပျံၤယဲ ဘၣ်ဆၣ်, ထွံၣ်တဒုအံၤ ဖျါလီၤပျံၤလီၤဖုးဝဲဒၣ်န့ၣ်လီၤ. ထွံၣ်တဒုအံၤ ဖဲအဟဲဘူးဒီး ယၤအကတီၢ်န့ၣ်, မီၤယၤအဃိ, လၢတၢ်နံၤတၢ်အ့အပူၤန့ၣ် ယဂုာ်ကျဲးစၢးလၢယတကနၣ်ဃုာ်အီၤဘၣ်န့ၣ်လီၤ. ဘၣ်ဆၣ်, ထွံၣ်တဒုအံၤ ကစံၣ်ဖုအ့ၣ်ယၤအဃိ, ယကိးပသူယဲဒၣ်န့ၣ်လီၤ. ထွံၣ်တဒုအံၤ မၤဘၣ်ဒိယၤတန့ၢ်ဘၣ်, မ့ၢ်လၢအကစံၣ်ဖုဆူယအိၣ်အဂီၢ်န့ၣ်တတုၤဃီၤဝဲဒၣ်အဃိ, ယစံးဘျုးကစၢ်ယွၤန့ၣ်လီၤ. ထွံၣ်အကစၢ်န့ၣ် ဖီၣ်ဟံးဃၥ် ဝဲဒၣ်စ့ၢ်ကီး အထွံၣ်ပျံၤ လၢအစုဃံးဃံးအဃိန့ၣ်လီၤ.
ဒ်ပမ့ၢ် ၦၤစူၢ်က့ၤနၥ်က့ၤ ကစၢ်ယ့ၣ်ရှူးတဖၣ်အသိး, တၢ်ကွၢ်ဆၢၣ်မဲၥ်လီၤပျံၤလီၤဖုးတမံၤအံၤ ဒုးသ့ၣ်နီၣ်က့ၤယၤလၢ တၢ်ဖီၣ်ဟံးဃၥ်မုၣ်ကီၤလံၢ်လၢပျံၤ ဘၣ်ဆၣ်, ဒ်သိးကမၤဘၣ်ဒိဘၣ်ထံးၦၤအဂီၢ်, အိၣ်ခိးဝဲဒၣ်လၢ ပဟ့ၣ်အီၤခွဲးယၥ်န့ၣ်လီၤ. ၁ ပ့း ၅:၈ အပူၤန့ၣ်, ပှၤတၢ်မၢဖိ စီၤပ့းတရူး ဟ့ၣ်ပလီၢ်ၦၤလၢ, “ဒ်ခ့ယုၢ်ကညီၤရုၢ်ရုၢ်အသိးန့ၣ်, သုဒုၣ်သုဒါမုၣ်ကီၤလံၢ်ဟးဝ့ၤဝီၤဃုၦၤလၢအကယူၢ်လီၤဝဲ” န့ၣ်လီၤ. ဒ်သိးကဂုာ်ကျဲးစၢးမၤပျံၤမၤဖုးၦၤ, ဒီးကဒုးသံပှၤတခီပၤ, လၢတၢ်ပျံၤတၢ်ဖုးအပူၤအဂီၢ်, မုၣ်ကီၤလံၢ်န့ၣ် ကညီၤတၢ်, ဒီးကစံၣ်ဖုအ့ၣ်ဖှီပှၤဘၣ်ဆၣ်, ဒ်အဆၢဖိ ၉ စံးဘၣ်ပှၤ, “အိၣ်ဂၢၢ်အိၣ်ကျၢၤလၢတၢ်နာ်ပူၤ, ဒီးတြီအဝဲဒၣ်တက့ၢ်” အသိး, ပအိၣ်ဂၢၢ်ဆိးကျၢၤလၢတၢ်စူၢ်တၢ်နာ်အပူၤ သ့ဝဲဒၣ်န့ၣ်လီၤ.
ဖဲနသးကလၢၢ်ဘၣ်နဲလၢ နဒုၣ်နဒါ စံးကတိၤဒုၣ်ဒွဲၣ်နၤ (မ့) လ့ပစီနၤန့ၣ်ဒီး, သ့ၣ်နီၣ်ထီၣ်က့ၤနဲလၢ မုၣ်ကီၤလံၢ်န့ၣ် တၢ်ထိၣ်သတြီၤအီၤဒီးကစၢ်ယ့ၣ်ရှူး တန့ၢ်တသ့နီတမံၤဘၣ်န့ၣ်လီၤ. ပကိးပသူထီၣ်ဆူအအိၣ်သ့ဝဲဒၣ်, ဒီးကမၤစၢၤပှၤအဂ့ၢ်န့ၣ်, အဆၢဖိ ၁၀ စံးဘၣ်ပှၤလၢ “အကစၢ်ဒၣ်ဝဲ, ကမၤလၢထီၣ်ၦဲၤထီၣ်, ဂၢၢ်ထီၣ်ကျၢၤထီၣ်, ဆူၣ်ထီၣ်ချ့ထီၣ်သု, ဒီးသူၣ်ထီၣ်သုခၢၣ်သနၢၣ်” န့ၣ်လီၤ.
ဖဲပဘၣ်ကွၢ်ဆၢၣ်မဲာ်ဒီးတၢ်ဒုးတၢ်ယၤလၢ နီၢ်သးတကပၤအကတီၢ်န့ၣ်, မ့ၢ်လၢကစၢ်ယ့ၣ်ရှူး အိၣ်ဒီးၦၤထီဘိအဃိ, လၢတၢ်ပျံၤတၢ်ဖုးအလီၢ်န့ၣ် ပဃုထၢ အိၣ်ဂၢၢ်ဆိးကျၢၤ, လၢတၢ်စူၢ်တၢ်နၥ်အပူၤ သ့ဝဲဒၣ်န့ၣ်လီၤ.
