ၦၤလိာ်ကွဲဖျၢၣ်ထူစဲၣ်နီၤ စၣ်ဒံၣ်ယိၣ် မၣ်န့ (Sadio Mane’) လၢကီၢ် ဆဲ(န)နံၣ်ကီၤ (Senegal) တဂၤန့ၣ် လိၥ်ကွဲဝဲဒၣ် လ့းဘၣ်ပူ (Liverpool) ဖျၢၣ်ထူကျးအဂီၢ်, လၢ English Premier League န့ၣ်လီၤ. အဝဲမ့ၢ် ၦၤအၤဖရံးကၤဖိ ၦၤလိၥ်ကွဲဖျၢၣ်ထူတဂၤ ဒီးလၢဟီၣ်ခိၣ်ဒီဘ့ၣ် ပှၤဒိးန့ၢ်စ့အအါကတၢၢ်အကျါတဂၤ, ဒီးတနံၣ်န့ၣ်, ဒိးန့ၢ်ဝဲဒၣ်ဒီလၣ်, လၢအကကွဲၢ်န့ၣ်လီၤ. ဖဲကမျၢၢ်တဖၣ် ထံၣ်ဝဲဒၣ် အတၢ်ဂီၤဖိလၢ အဖီၣ်ဃၥ် (iPhone) အကွဲၤဒီနၢ်တဖျၢၣ် လၢအမဲၥ်သၣ် တဲၤဖးအသးန့ၣ်ဒီး, မ့ၢ်လၢအစူးကါဝဲဒၣ် ပိးလီဖိလၢ အဟးဂီၤတမံၤအဃိ, တၢ်နံၤဘၣ်ဖၣ်လဲအီၤန့ၣ်လီၤ. အဝဲစံးဆၢဝဲဒၣ် လၢတၢ်ပာ်သးအမုာ်အခုၣ်အပူၤ, ဒီးသံကွၢ်ဝဲဒၣ်, “ဘၣ်မနုၤအဃိ, ယကဘၣ်သးလီ ဖၣ်ရၤရံၣ်(စ) (Ferraris) သိလ့ၣ် အခိၣ် ၁၀, နၣ်ရံၣ်လုၢ်ဒိၣ်ပှ့ၤဒိၣ် အဖျၢၣ် ၂၀, ဒီးကဘီယူၢ် ခံဆိ န့ၣ်လဲၣ်.” “ယသၣ်ဝံၣ်လီၤဒိ, ယဘၣ်မၤတၢ်လၢစံၣ်ပျီအပူၤ, ယလိၥ်ကွဲဖျၢၣ်ထူ လၢယခီၣ်ဘ့ၣ်ဆ့, ဒီးယတထီၣ်ဘၣ်ကၠိစ့ၢ်ကီးဘၣ်. အခဲအံၤ, ယမၤစၢၤၦၤဂၤသ့လံ. ယသးအိၣ် တ့သူထီၣ် ကၠိတဖၣ်, ဒီးၦၤဖှီၣ်ဖိယၥ်ဖိအဂီၢ် ယအဲၣ်ဒိးဟ့ၣ် တၢ်အီၣ်တၢ်အီ, (မ့) ဆ့ကူဆ့ကၤ…လၢယသးသမူအပူၤ, တၢ်လၢယဒိးန့ၢ်တဖၣ်န့ၣ် ယအဲၣ်ဒိးဟ့ၣ်နီၤလီၤယဲန့ၣ်လီၤ.”

လၢအထံကီၢ်န့ၣ်, ပှၤအိၣ်ဆိးလၢအဒူသဝီအပူၤ, ဒီးအခိၣ်အဃၢၤဒူသဝီတဖၣ်အါမးန့ၣ် ဘၣ်ဂဲၤပျုၢ်ကျဲးစၢးဝဲလၢ တၢ်ဃံးတၢ်စ့ၤအပူၤအဆၢကတီၢ်, တၢ်ဟံးဃာ်ပၥ်ဖှိၣ် အတၢ်ထူးတၢ်တီၤတဖၣ်န့ၣ် မ့ၢ်တၢ်အဲၣ်လီၤဒၣ်ထဲအနီၢ်ကစၢ်အသးလီၤန့ၣ် မၣ်န့ သ့ၣ်ညါဝဲဒၣ်န့ၣ်လီၤ. ၦၤကွဲးလံၥ်ဧ့ၤဘြံ ဒုးသ့ၣ်နီၣ်ၦၤလၢ တၢ်အိၣ်မူကျိၤကျဲလၢ အသးအိၣ်ဟ့ၣ်ညီတၢ်န့ၣ် မ့ၢ်ဒၣ်ပဝဲကိးဂၤဒဲးအဂီၢ်, ဒီးတမ့ၢ်ထဲလၢ ၦၤကဲဒိၣ်တဖၣ် ကဘၣ်မၤဝဲဒၣ်ဘၣ်. ဧ့ၤ ၁၃:၁၆ ပာ်ဖျါဝဲ “ဘၣ်ဆၣ်ဒီးတၢ်မၤဂ့ၤတၢ်, ဒီးတၢ်ဟ့ၣ်ညီတၢ်န့ၣ်, သးပ့ၤနီၣ်တဂ့ၤ, အဂ့ၢ်ဒ်အံၤ, တၢ်လုၢ်ဒ်န့ၣ်တဖၣ်န့ၣ်ဘၣ်ယွၤအသး”န့ၣ်လီၤ. တၢ်ဒုးဒိၣ်ထီၣ် သးလၢအဟ့ၣ်တၢ်ညီန့ၣ် တမ့ၢ်ထဲတၢ်မၤအဂ့ၤအဘၣ်, လၢပကဘၣ်မၤအီၤတမံၤဧိၤဘၣ်. လံၥ်စီဆှံပၥ်ဖျါဝဲလၢ တၢ်ဟ့ၣ်ညီတၢ် ဒုးအိၣ်ထီၣ် ယွၤအတၢ်နံၤကမှံစ့ၢ်ကီးန့ၣ်လီၤ. ပှၤလၢအတအဲၣ်ဒိးမၤမုၥ်ယွၤအသးန့ၣ် မ့ၢ်မတၤကအိၣ်ဝဲဒၣ်တဂၤလဲၣ်.

တၢ်ဟ့ၣ်တၢ်ညီ အခီပညီန့ၣ် တမ့ၢ်တၢ်ယိယိဖိလၢ ပကဘၣ်ဟ့ၣ်တၢ်ထဲလဲၣ်န့ၣ်ဘၣ်. လၢအလီၢ်န့ၣ်, တၢ်ဟ့ၣ်ညီတၢ်န့ၣ် မ့ၢ်ပဟ့ၣ်တၢ်လၢတၢ်အဲၣ်တၢ်သးအိၣ်န့ၣ်လီၤ. ဒ်သိးတၢ် “ကဘၣ်ယွၤအသး” (:၂၁) အဂီၢ်, ပမၤသ့ဝဲဒၣ်တမံၤန့ၣ် မ့ၢ်ဒၣ်ပကအိးထီၣ်ပစုတဖၣ်ယိယိဖိ. ဒီးဟ့ၣ်နီၤလီၤတၢ်လၢအိၣ်ဒီးၦၤန့ၣ်လီၤ.