ပထံဖိကီၢ်ဖိတဖၣ် ဒ်သိးကနၢ်ဟူ ကစၢ်ယွၤအတၢ်အဲၣ်အဂီၢ်, ပဃ့ထုကဖၣ်သကိးတၢ်လၢပကျိာ်တၢ်ကတိၤဒီးပကစၢ်ဒၣ်ဝဲအကျိာ်န့ၣ်, သီၣ်ဟူထီၣ်ဝဲလၢ အၤစံ လီၢ်ခၢၣ်သး တၢ်ဘါသရိာ် (central Athens church ) အကတီၢ်, ယနၢ်ဟူ “ကစၢ်ယွၤသးဘိဧၢ” လၢ “ဖြၣ်စ့ၣ်ကျိာ်,” “စလိၣ်ဘဲးကျိာ်,” “ဟ့းလ့ၣ်ကျိာ်,” ဒီး “ကိၤလၤကျိာ်” တဖၣ်န့ၣ်လီၤ. ဖဲပသ့ၣ်ညါနၢ်ပၢၢ် ပတၢ်ပာ်ဖှိၣ်ထီၣ်သးအံၤ မၤအသးဖဲ ဘူၣ်ယဲၢ်ဆံ အမုၢ်နံၤန့ၣ်ဒီး, ပတၢ်ပာ်ဖှိၣ်ထီၣ်သးအဃံအလၤန့ၣ် အခီပညီဖျါဒိၣ်အါထီၣ်ဝဲဒၣ်န့ၣ်လီၤ.

လံာ်စီဆှံအလီၢ်လံၤအပူၤ, ၃ မိၤ ၂၃:၁၅-၂၁ ပာ်ဖျါထီၣ်ဝဲလၢ တၢ်မၤလၤကပီၤ ဘူၣ်ယဲၢ်ဆံ ဖဲဘူၣ်ကူးတၢ်အမူး, ဖဲလၢတၢ်မၤလၤကပီၤ ဘူၣ်လဲၤကပာ်အမူးဝံၤ, မုၢ်နံၤပိာ်ထွဲထီၣ်အခံ အသီ ယဲၢ်ဆံအကတီၢ်န့ၣ်လီၤ. ကစၢ်ယ့ၣ်ရှူး အတၢ်သံ, ဒီးဂဲၤဆၢထၢၣ်သမူထီၣ်က့ၤဝံၤ, အဆိကတၢၢ် ဘူၣ်ယဲၢ်ဆံအနံၤန့ၣ်, ပှၤစူၢ်က့ၤနာ်က့ၤတၢ်ဖိတဖၣ် ပာ်ဖှိၣ်ထီၣ်အသး ဖဲဝ့ၢ်ယရူၤရှလ့ၣ်န့ၣ်လီၤ. မၤ ၂ :၂-၄ ပာ်ဖျါဝဲလၢ “တၢ်သီၣ်လီၤဝဲသတူၢ်ကလာ်လၢမူခိၣ်, ဒ်ကလံၤမုၢ်ဟဲသီၣ်ဝဲအသိးန့ၣ်,” အိၣ်ဖျါဝဲဒ် “တၢ်အပျ့ၤတဖၣ်နီၤဖးလီၤအသး,…. ဒ်မ့ၣ်အူလၣ်” အသိး, ဒီးအပျဲၢ်အဘီၣ်တဖၣ် လၢထီၣ်ပှဲၤထီၣ်ဒီးသးစီဆှံ, ဒီးစးထီၣ် “ကတိၤတၢ်လၢအပျ့ၤအဂၤတဖၣ်, ဒ်သးန့ၣ်ဒုးကတိၤအီၤအသိး” န့ၣ်လီၤ. အဆၢဖိ ၁၁ ပာ်ဖျါထီၣ်ဝဲဒၣ်, ပှၤအိၣ်ဟဲလၢ ထံကီၢ်အဂုၤအဂၤတဖၣ် နၢ်ဟူဝဲ “ယွၤအတၢ်လီၤလိၢ်လီၤလး” လၢအကလုၢ်ဒၣ်ဝဲစူာ်စူာ်အဂ့ၢ်န့ၣ်လီၤ. ဒီးအဆၢဖိ ၁၄ စံးဘၣ်ပှၤလၢ စီၤပ့းတရူး ဂဲၤဆၢထၢၣ် “ဒီးထုထီၣ်အကလုၢ်ဒီးကတိၤဖျါထီၣ်တၢ်” ဝံၤ, အဆၢဖိ ၂၂-၄၁ န့ၣ် ပကထံၣ်ဘၣ်လၢ ပှၤဂီၢ်မုၢ်တဖၣ် စူၢ်က့ၤနာ်က့ၤဝဲတၢ်ကစီၣ် လၢအမ့ၢ်, ဒ်သိးကစၢ်ယ့ၣ်ရှူး ကဟ့ၣ်လီၤဝဲ တၢ်ပျၢ်တၢ်ဒဲးဘးအဂီၢ်, အဝဲ ဘၣ်တၢ်မၤအၢမၤသီ, တၢ်မၤသံအီၤ, ဒီးဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤအဂ့ၢ်န့ၣ်လီၤ.

တၢ်သးခုကစီၣ်ခိၣ်နၢ်တဖၣ် ပာ်ဖှိၣ်ထီၣ်အသးလၢ ဝ့ၢ်အၤစံ ဒီးဃ့ထုကဖၣ်တၢ်လၢ ကျိာ်တၢ်ကတိၤအါကလုာ်န့ၣ် ဒုးသ့ၣ်နီၣ်ထီၣ်ယၤလၢ စီၤပ့းတရူး အတၢ်ကစီၣ်လၢ ဘူၣ်ယဲၢ်ဆံ အကတီၢ်အံၤ ဘၣ်တၢ်နၢ်ဟူဆူညါ ဒ်သိးတၢ်ကနီၤဟ့ၣ်ခီဆူ ဟီၣ်ခိၣ်ဒီဘ့ၣ်, ဖဲပှၤဂီၢ်မုၢ်တဖၣ် စံးဆၢ စူၢ်က့ၤနာ်က့ၤဝဲ အဖၢမုၢ်န့ၣ်လီၤ.

ဒ်သိးသးစီဆှံ ဟ့ၣ်စိဟ့ၣ်ကမီၤ, လၢသီပှၤစူၢ်က့ၤနာ်က့ၤ ကစၢ်ယ့ၣ်ရှူး, လၢဘူၣ်ယဲၢ်ဆံအကတီၢ်အသိး, သးစီဆှံ ကဟ့ၣ်စိဟ့ၣ်ကမီၤပှၤအဂီၢ် မ်ပကဃ့ထုကဖၣ်သကိးန့ၣ်တက့ၢ်. တၢ်စံးကတိၤတၢ်သးခုကစီၣ်လၢကယဲၢ်ကျိာ်တၢ်ကတိၤတဖၣ်န့ၣ် ဒ်သိး ဟီၣ်ခိၣ်ဒီဘ့ၣ်ကနၢ်ဟူဘၣ်ဝဲအဂီၢ် မ်ပကဃ့ထုကဖၣ်သကိးန့ၣ်တက့ၢ်.