စီၢ်နီၤခိၣ် အိၣ်ဒီးလီခီ တဆံသၢဖျၢၣ် အက့ၢ်ဂီၤ ဖျါကဆှီဒီဖိအံၤ ဘၣ်တၢ်တ့ခဲၣ်အီၤ, လၢတၢ်ဘ့ၣ်ဘၣ်တဖၣ်အလိၤ, ဒီးဒုးကဲထီၣ်ခ့ခါတၢ်ဂီၤန့ၣ်လီၤ. အလိၤန့ၣ် လံာ်ကျိၤ “ဒ်သိးအဝဲသ့ၣ် ကမ့ၢ်တၢ်တမံၤဃီ,” အိၣ်ဝဲ, ဒီးဘၣ်တၢ်ဘျးလီၤစဲၤအီၤလၢ အီးစဖိး (Oxford)ဖၠၣ်စိမိၤ, ဝူး(ဖ)စဲၣ် (Wolfson)ခီလ့ၣ်ကၠိ န့ၣ်လီၤ. တၢ်ဂီၤအက့ၢ်အဂီၤ ကဆှီဒီဖိအံၤ, နီၢ်နီၢ်န့ၣ် ပညိၣ်ပာ်ဖျါဝဲ တၢ်ဂ့ၢ်လီၤဆီ- ကစၢ်ယ့ၣ်ရှူး ဟံးန့ၢ်ဟါတၢ်အီၣ် အကတၢၢ် တဘျီ လၢအပျဲၣ်အဘီၣ်တဖၣ်အဂ့ၢ်န့ၣ်လီၤ. တၢ်ဂီၤဘ့ၣ်ဘၣ်လၢ အဖျါလီၤဆီန့ၣ် မ့ၢ်ကိၣ်ဒီးလီခီတဖျၢၣ်, ဒ်အမ့ၢ် ကစၢ်ယ့ၣ်ရှူး အခၢၣ်စး, ဒီးတၢ်ဂီၤဘ့ၣ်ဘၣ် ၁၂ ဘ့ၣ်လၢအအိၣ်ဒီးလီခီတဖျၢၣ်စူၢ်စူၢ်, အိၣ်ကဝီၤဃာ်ဝဲ, တၢ်ပနီၣ်တမံၤလၢ အပျဲၢ်အဘီၣ်တဖၣ် အိၣ်ဆိးဒီးအီၤန့ၣ်လီၤ.

တၢ်ဂီၤတ့ခဲၣ်တထံၣ်အံၤ, မ့ၢ်တၢ်ဒုးသ့ၣ်နီၣ်ထီၣ်က့ၤ တၢ်အဃံအလၤတမံၤ, ဖဲကစၢ်ယ့ၣ်ရှူး ဟံးန့ၢ် ကိၣ်ဒီးလီခီ, လၢတၢ်အီၣ်အီသကိးတၢ်ဒီးအပျဲၢ်အဘီၣ်တဖၣ်, ကယဲၢ်ပှၤလၢအပိာ်အခံသ့ၣ်တဖၣ်အဂီၢ်, ဒ်သိးကစးထီၣ် တၢ်မၤလၤကပီၤမူးအသီ, လၢတၢ်ဟံးန့ၢ်သကိးဘူၣ်စီဆှံန့ၣ်လီၤ. ဒီးယတူၢ်လိာ်တၢ်ဂီၤဘ့ၣ်ဘၣ်လီၤဟိတဖၣ် လၢအမၤလၢပှဲၤဝဲတၢ်ဂီၤအက့ၢ်အဂီၤ, မ့ၢ်လၢတၢ်လီၤဟိန့ၣ် ဖျါလၢ အကွဲမုာ် ပှၤကွၢ်တၢ်ဖိတဖၣ် ဒ်သိးကဟဲပာ်ဖှိၣ်ထီၣ်အသးလၢ စီၢ်နီၤခိၣ်အံၤန့ၣ်လီၤ.

၁ ကရံၣ် ၁၁:၂၆ အပူၤန့ၣ် စီၤပီလူး ဟ့ၣ်ဂံၢ်ဟ့ၣ်ဘါပှၤ “ဖဲသုအီၣ်ကိၣ်အံၤ, ဒီးအီလီခီအံၤတစုစုန့ၣ် သုဒုးနဲၣ်ဖျါထီၣ်ကစၢ်အဒိးသံအသး, တုၤအဟဲ” န့ၣ်လီၤ. ကယဲၢ် ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူး အတၢ်သံဒီးဂဲၤဆၢထၢၣ်သမူထီၣ်က့ၤအဂ့ၢ်တဂၤလၢ်လၢ်အဂီၢ်, တၢ်ကတဲာ်ကတီၤန့ၢ်ကျိၤကျဲလၢ ကအိၣ်ဃူအိၣ်ဖိးလိာ်သးဒီးကစၢ်ယွၤ, ဒီးတၢ်လီၢ်လီၤဟိလၢစီၢ်နီၤခိၣ်န့ၣ် အိၣ်ခိးပာ်အဝဲသ့ၣ်န့ၣ်လီၤ.

ဖဲပဟံးန့ၢ်သကိး ဘူၣ်စီဆှံ, ဒီးဘိးဘၣ်သ့ၣ်ညါ, မ့တမ့ၢ်, သ့ၣ်နီၣ်ထီၣ်က့ၤ ကစၢ်ယ့ၣ်ရှူး အတၢ်စူးကွံာ်ညိကွံာ်အသးန့ၣ်ဒီး, လၢဟီၣ်ခိၣ်ဒီဘ့ၣ်, လၢတၢ်ဆၢကတီၢ် အစိၤစိၤအဃာ်ဃာ်, ဒ်အမ့ၢ် ပမၤပှၤစူၢ်က့ၤနာ်က့ၤတၢ်ဖိတဖၣ်အတဝၢ တမံၤဃီအသိးန့ၣ်လီၤ. တၢ်မၤအံၤ ကစၢ်ယ့ၣ်ရှူးခရံာ်အတၢ်အိၣ်ဖှိၣ် အတၢ်ဃူတၢ်ဖိး, က့ၢ်ဂီၤဃံလၤတမံၤန့ၣ်လီၤ.