စၣ် ဖရူၣ်တူၢ်အီၣ်စိၣ် ခရံာ်ဖိသီခါဖၠၣ် (San Fruttuoso Abbey) န့ၣ် အိၣ်ဝဲဒၣ်လၢကီၢ်အံးတလံၣ် (Italy) ကလံၤစိး-မုၢ်နုၢ် အပီၣ်လဲၣ်က့ၣ်ကျီၤအနံၤ (cove), ဒီးပှၤလဲၤသ့ ဝဲဒၣ်လၢချံဖိ, မ့တမ့ၢ် တၢ်လဲၤလၢခီၣ်န့ၣ်လီၤ. တၢ်မျၢ်ပလဲတဖၣ် ဘၣ်တၢ်ပၣ်ခူသူၣ်အီၤဖဲန့ၣ်, ဒီးတၢ်ထူးတၢ်တီၤ လုၢ်ဒိၣ်ပှ့ၤဒိၣ်တဖၣ်န့ၣ် အိၣ်ခူသူၣ်ဝဲဒၣ် ဖဲပီၣ်လဲၣ်က့ၣ်ကျီၤအပူၤန့ၣ်လီၤ. ပှၤယူၤထံတဖၣ် ယူၤလီၤဝဲဒၣ်ဆူ ပီၣ်လဲၣ်ထံယိာ်, ဒီးမ့ၢ်တုၤဝဲဒၣ်ဆူ ယဲၢ်ဆံ ခီၣ်ယီၢ်န့ၣ်ဒီး, ကစးထီၣ်ထံၣ်ဝဲဒၣ် ပှၤကညီအက့ၢ်အဂီၤန့ၣ်လီၤ. က့ၢ်ဂီၤအံၤမ့ၢ်ဝဲဒၣ် ‘ကစၢ်ခရံာ် လၢထံယိာ်’ (Christ of the Abyss), မ့ၢ်က့ၢ်ဂီၤစိးပျၤအခီၣ်ထံးကတၢၢ်တခါ, ဘၣ်တၢ်ပာ်အီၤလၢ ထံယိာ်အပူၤ, ဖဲ ၁၉၅၄ နံၣ် န့ၣ်လီၤ. တိၢ်ဘီက့ၢ်ဂီၤအံၤ ပာ်ဖျါထီၣ်ဝဲ ကစၢ်ယ့ၣ်ရှူး အိၣ်လၢထံယိာ်ပူၤ, ဒီးယူၢ်ထီၣ်ဝဲဒၣ် အစုခံခီဆူမူခိၣ်န့ၣ်လီၤ.
တၢ်ယိာ်အပူၤန့ၣ်, နကလဲၤခီဖျိဘၣ် တၢ်အိၣ်အသးအပတီၢ်လၢအယိာ်တဖၣ် သ့ၣ်သ့ၣ်န့ၣ်လီၤ. စံး ၆၉:၂-၃ ပာ်ဖျါဝဲဒၣ်, ‘ယလီၤဘျၢလၢကပံာ်ယိာ်အကျါ,’ ဒီး ‘တၢ်ဘှံးယသးလၢယကိးထီၣ်အဃိ’ န့ၣ်လီၤ. အဆၢဖိ ၄, ၇-၁၂ ပာ်ဖျါဝဲလၢ အဒုၣ်အဒါတဖၣ်ဒုၣ်ဒွဲၣ်အီၤ, ဒီး ‘ယကဲထီၣ်ပှၤတမှံၤလၢ ယဒီပုၢ်ဝဲၢ်အမဲာ်ညါ,’ ဒီးအဆၢဖိ ၂၀ န့ၣ် ပှၤကွဲးထါ ကွၢ်လၢ်ပှၤလၢအကမၤမုာ်တၢ်အကျဲ, ဒီးတထံၣ်န့ၢ်ဝဲဘၣ်. ဒီးအဆၢဖိ ၁၅ ပာ်ဖျါဝဲဒၣ် ပှၤကွဲးထါ ဘၣ်ယိၣ်ဝဲလၢ အတၢ်ကီတၢ်ခဲတဖၣ် ‘ကယူၢ်လီၤကွံာ်’ အီၤ န့ၣ်လီၤ. တၢ်ဒဲးဘးအဃိ, မ့ၢ်ဂ့ၤ တၢ်သူၣ်အုးသးအုးမ့ၢ်ဂ့ၤ, တၢ်လၢအဒုးကဲထီၣ် ထံယိာ်ပူၤတဖၣ်န့ၣ် မ့ၢ်ဒၣ်ပတၢ်အိၣ်မူ တၢ်ခံးသူယိာ်အကတီၢ်တဖၣ်န့ၣ်လီၤ.
ဘၣ်ဃးဒီးတၢ်ယိာ်အပူၤန့ၣ် တမ့ၢ်တၢ်ကတိၤအကတၢၢ်ဘၣ်အဃိ, ပကဘၣ်စံးဘျုးယွၤန့ၣ်လီၤ. တၢ်ယိာ်အပူၤတဖၣ်န့ၣ် ကခုၣ်ဒိၣ်မး, ဒီးကအိၣ်သယုၢ်ဒၣ်ဝဲ ထဲလဲၣ်ဂ့ၤ, ထဲလဲၣ်ဂ့ၤ, စံး ၁၃၉:၈ ပာ်ဖျါဝဲလၢ, ဖဲထံယိာ်တဖၣ်အပူၤန့ၣ် ပဃုထံၣ်န့ၢ် ပှၤတဂၤ သ့ဝဲဒၣ်န့ၣ်လီၤ. ဒ် စံး ၃၀:၁-၃ ပာ်ဖျါဝဲ ‘ယကပာ်ထီၣ်ထီနၤ, ယွၤဧၢ, နဒုးဟဲထီၣ်ယသးလၢပျုၤပူၤ’ အသိး, ကမၤပူၤမၤဖျဲးပှၤလၢထံယိာ်အခုၣ်အပူၤန့ၣ်လီၤ.
ဖဲလၢဟီၣ်ခိၣ်အတၢ်ဝံဃၢတဖၣ် လုၣ်ဘၢပှၤအကတီၢ်န့ၣ်, တၢ်ဂီၤစိးပျၤအံၤ ဒုးသ့ၣ်နီၣ်ပှၤလၢ ပတအိၣ်ထဲတဂၤဧိၤဘၣ်. လၢပတၢ်ယိာ်တဖၣ်အပူၤန့ၣ်, ကစၢ်ယ့ၣ်ရှူးအိၣ်ဒီးပှၤ ခီဖျိလၢသးမုၢ်စီဆှံန့ၣ်လီၤ. အစုတဖၣ်ယူၢ်ထီၣ်ထီအသး- ဒ်သိးကသဂၢၢ်ပှၤ, ဒီးကမၤပူၤဖျဲးပှၤ ဘၣ်ဆၢဘၣ်ကတီၢ်အဂီၢ်, အိၣ်ကတဲာ်ကတီၤပာ်
အသးန့ၣ်လီၤ.
