ဖဲထံခုၣ်လီၤသကၤကလံၤမုၢ်ဖးဒိၣ် မၤဟးဂီၤကွံာ်လီအဂံၢ်အပျံၤတဖၣ်န့ၣ် အထီကအိၣ်ဝဲဒၣ်လၢ မံးလာ်တဖၣ်မံးလာ်အဃိ, ပဝ့ၢ်ဒီတဝ့ၢ်န့ၣ် တၢ်ကပီၤတဖၣ်လီၤပံာ်ဝဲဒၣ်, ဒီးဖဲတၢ်ခုၣ်ဆူၣ်ဒိၣ်မးအကတီၢ်န့ၣ် ပတံၤသကိးတဖၣ် ကမၤကိၢ်မၤလၢၤအဟံၣ်အဂီၢ်, တဒိးန့ၢ် လီအဂံၢ်လၢၤဘၣ်န့ၣ်လီၤ. ဟံၣ်ဒူၣ်ဃီထၢတဖၣ် ဆၢထံၣ်န့ၢ်ဝဲဒၣ် သိလ့ၣ်လၢ ကဟဲဘှီမၤဂ့ၤထီၣ်က့ၤ လီအဂံၢ်အပျံၤတဖၣ်လၢ အဝဲသ့ၣ်အလီၢ်ကဝီၤန့ၣ်လီၤ. ဒ်သိးကမၤစၢၤပှၤလၢအလိၣ်ဘၣ်တၢ်မၤစၢၤတဖၣ်အဂီၢ်, လၢခံ ယသ့ၣ်ညါထွဲလၢ တၢ်စူးကါ တၢ်ဘါသရိာ် တၢ်အိၣ်ကတီၢ်သိလ့ၣ်အလီၢ်အကျဲလၢ တၢ်ကပာ် တၢ်ဆှၢလီၤသိလ့ၣ်တဖၣ်အဂီၢ်, ဒ်တၢ်မၢစၢၤတစိၢ်တလီၢ် အလီၢ်ခၢၣ်သးန့ၣ်လီၤ.
ဖဲယနၢ်ဟူ သိလ့ၣ်လၢ ဟဲဘှီမၤဂ့ၤထီၣ်က့ၤတၢ်အဂ့ၢ်န့ၣ် ဒုးသ့ၣ်နီၣ်ယၤလၢ ကစၢ်ယ့ၣ်ရှူး မၤလိာ်ဝဲဒၣ် အပျဲၢ်အဘီၣ်တဖၣ်, ဖျါဖဲလံာ်မၤတၢ်အပူၤန့ၣ်လီၤ. မၤ ၁:၃ န့ၣ် ဖဲကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤဝံၤအလီၢ်ခံ, အနံၤလွံၢ်ဆံန့ၣ်, လီၣ်ဖျါထီၣ်အသးဆူ အပျဲၢ်အဘီၣ်တဖၣ်, ဒ်သိးကဟ့ၣ်ဂံၢ်ဟ့ၣ်ဘါ, ဒီးသိၣ်လိဝဲဒၣ် ကစၢ်ယွၤ အဘီအမုၢ်အဂ့ၢ်န့ၣ်လီၤ. တချုးလၢကစၢ်ယ့ၣ်ရှူး က့ၤထီၣ်ဝဲဆူမူခိၣ်န့ၣ်, အဆၢဖိ ၈ ပာ်ဖျါဝဲဒၣ် ‘ဖဲသးစီဆှံဟဲလီၤလၢသု လိၤဝံၤဒီး, သုကဒိးန့ၢ်တၢ်အစိအကမီၤ,’ လၢအမ့ၢ် ကစၢ်ယ့ၣ်ရှူး အတၢ်အၢၣ်လီၤ, လၢခံအကတၢၢ်တမံၤန့ၣ်လီၤ.
ကစၢ်ခရံာ် အၢၣ်လီၤတ့ၢ်ဝဲလၢ ယွၤအစိအကမီၤ လၢတၢ်ထိၣ်သတြီၤအီၤတသ့န့ၣ်ကအိၣ်ဆိးဒီးအပျဲၢ်အဘီၣ်တဖၣ်, ခီဖျိလၢယွၤအသးမုၢ်စီဆှံန့ၣ်လီၤ. ဘၣ်ဆၣ်, တၢ်ဒိးန့ၢ်တၢ်စိတၢ်ကမီၤ အတၢ်ပညိၣ်န့ၣ် တမ့ၢ်လၢ ကဟံးဃာ်ပၢၤဃာ်ဝဲလၢ အဝဲသ့ၣ်အနီၢ်ကစၢ်ဒၣ်ဝဲအဂီၢ်ဘၣ်. လၢအလီၢ်န့ၣ်, အပျဲၢ်အဘီၣ်တဖၣ် ကပျဲဝဲဒၣ် ကစၢ်ယွၤဟ့ၣ်စိဟ့ၣ်ကမီၤအဝဲသ့ၣ်လၢ ယွၤအတၢ်မၤအပူၤ, တၢ်မၤလၢကဒုးသ့ၣ်ညါပှၤဂၤ, ဘၣ်ဃးဒီးတၢ်ဒိးန့ၢ်က့ၤကဒီး တၢ်လဲၤခီဖျိကလၢၢ်ဘၣ် ကစၢ်ယွၤအစိအကမီၤဒီးယွၤအတၢ်အဲၣ် အတၢ်ဘၣ်ထွဲလိာ်အသး, လၢအဘၣ်တၢ်မၤဟးဂီၤအီၤလၢတၢ်ဒဲးဘးအဃိန့ၣ်လီၤ.
ဖဲပလဲၤမၤတၢ်သးခုကစီၣ်လၢ ပပှၤတဝၢအပူၤအကတီၢ်, ပဒိးန့ၢ် တၢ်စိတၢ်ကမီၤ, ဒီးတၢ်ကိးတမံၤဃီန့ၣ်လီၤ. ခီဖျိလၢကစၢ်ယွၤအသးစီဆှံ ဟ့ၣ်စိဟ့ၣ်ကမီၤအပူၤန့ၣ်, ပကဟုကယာ် ပှၤဘၣ်နးဘၣ်ဖှီၣ်တဖၣ်သ့ဝဲဒၣ်, ဒီးဟ့ၣ်ခီဟ့ၣ်နီၤလီၤတၢ်လၢ အဝဲသ့ၣ်စ့ၢ်ကီးဒိးန့ၢ် ကစၢ်ယွၤအစိအကမီၤသ့ဝဲဒၣ်စ့ၢ်ကီးန့ၣ်လီၤ.
