အဲလံယီး (Elliot) န့ၣ် အသူၣ်ဆူၣ်သးဂဲၤဝဲလၢ တၢ်စံၣ်တဲၤတဲလီၤ ကစၢ်ယ့ၣ်ရှူးအဂ့ၢ်ဆူ ပှၤဂုၤပှၤဂၤန့ၣ်လီၤ. အဝဲသိၣ်လိ လံာ် ၂ တံၤမသ့း ဆူ တၢ်အိၣ်ဖှိၣ်ခိၣ်နၢ်တဖၣ်လၢ အ့ၡၢၣ် ကလံၤထံးတကပၤ (South Asia) အဂီၢ်, လၢတနွံတၢ်မၤလိအကတီၢ်န့ၣ်, အဝဲဒုးသ့ၣ်နီၣ်ထီၣ်ဝဲဒၣ်ခိၣ်နၢ်တဖၣ် လၢစီၤပီလူး အတၢ်စံးကတိၤဆၢဂ့ၤဆၢဝါ စီၤတံၤမသ့း တချုးအတၢ်ဟးဖးဒီးအီၤအဂ့ၢ်န့ၣ်လီၤ. ဒ် ၂ တံၤ ၁:၈-၉ ပာ်ဖျါဝဲအသိး, အဲလံယီး ဟ့ၣ်ဂံၢ်ဟ့ၣ်ဘါဝဲတၢ်အိၣ်ဖှိၣ်ခိၣ်နၢ်တဖၣ်, မ်အသုတမဲာ်ဆှးလၢတၢ်စံၣ်တဲၤတဲလီၤ တၢ်သးခုကစီၣ်အဃိတဂ့ၤ, ဒီးမ့မ့ၢ်လၢတၢ်သးခုကစီၣ်အဃိ, ကဒိးဃုာ်တၢ်နးတၢ်ဖှီၣ်, ဒီးတၢ်မၤအၢမၤနးတဖၣ် ဒ် စီၤပီလူးအသိးန့ၣ်လီၤ. စှၤသီပူၤကွံာ်န့ၣ်ဒီး, အဲလံယီး သ့ၣ်ညါဘၣ်ဝဲလၢ ထံကီၢ်တဘ့ၣ်အံၤ တြီဃာ်ဝဲဒၣ် တၢ်မၤတၢ်သးခုကစီၣ်, ဒီးတၢ်ဆီတလဲဆူ ပှၤခရံာ်ဖိအတၢ်စူၢ်တၢ်နာ်န့ၣ်လီၤ. တၢ်အိၣ်ဖှိၣ်ခိၣ်နၢ်တဖၣ်လၢထံကီၢ်တဘ့ၣ်အံၤအပူၤအဂီၢ်, အသးဘၣ်ယိၣ်ဘၣ်ဘီဝဲဒၣ်နီၢ်နီၢ်အဃိ, အဲလံယီး ဃ့ဘါထုကဖၣ်ဝဲဒၣ်, ဒ်သိးအဝဲသ့ၣ်ကအိၣ်ဒီးတၢ်ပာ်သးစွံကတုၤ, ဒီးတၢ်သူၣ်ဒူသးဒူလၢ, တၢ်စံၣ်တဲၤတဲလီၤတၢ်သးခုကစီၣ် ဆူညါကွ့ၢ်ကွ့ၢ်အဂီၢ်န့ၣ်လီၤ.
တၢ်စံၣ်တဲၤတဲလီၤတၢ်သးခုကစီၣ်အဃိ, တၢ်ဘၣ်ယိၣ်အလီၢ် အိၣ်ဝဲဒၣ်လီၤန့ၣ် စီၤပီလူး သ့ၣ်ညါနၢ်ပၢၢ်ဝဲဒၣ်န့ၣ်လီၤ. အဆၢဖိ ၈, ၁၆ ပာ်ဖျါဝဲလၢ စီၤပီလူး ဘၣ်အိၣ်ဝဲဒၣ်လၢဃိာ်ပူၤ, ဒီးအဆၢဖိ ၁၁-၁၂ ပာ်ဖျါဝဲလၢ အတၢ်သိၣ်လိတဖၣ်အဃိ, တူၢ်ဘၣ်ခီၣ်ဘၣ် တၢ်နးတၢ်ဖှီၣ်အါမး လၢကျိၤကျဲအကလုာ်ကလုာ်လီၤ. ၂ကရံၣ် ၁၁:၂၃-၂၉ အပူၤန့ၣ် ပာ်ဖျါဝဲ တၢ်တီၢ်အီၤ, ဖျ့အီၤ, ဒီးတၢ်ကွံာ်အီၤလၢလၢၢ်န့ၣ်လီၤ. ဘၣ်ဆၣ်, ဒ်သိးစီၤပီလူး အသုတစံၣ်တဲၤတဲလီၤ ကစၢ်ယ့ၣ်ရှူးခရံာ်အဂ့ၢ်, တၢ်လၢအကဒုးဆိကတီၢ်အီၤအဂီၢ်န့ၣ် တၢ်တအိၣ်နီၤတမံၤဘၣ်န့ၣ်လီၤ. ဖံ ၁:၂၁ ပာ်ဖျါထီၣ်ဝဲစီၤပီလူး အတၢ်ပာ်သူၣ်ပာ်သး လၢ, ‘ယဂီၢ်ယမူမ့ၢ်ခရံာ်, ယသံမ့ၢ်တၢ်ဘျုး’ န့ၣ်လီၤ. ဒ်သိးကစံၣ်တဲၤတဲလီၤ ကစၢ်ခရံာ်အဂ့ၢ်ဆူ ပှၤဂုၤပှၤဂၤအဂီၢ်, စီၤပီလူး အိၣ်မူအိၣ်ဂဲၤဝဲဘၣ်ဆၣ်, မ့ၢ်သံန့ၣ်, ကအိၣ်ဘၣ်ဝဲဒီးကစၢ်ခရံာ်အဂ့ၢ်န့ၣ် သ့ၣ်ညါဝဲဒၣ်န့ၣ်လီၤ. ၂တံၤ ၁:၇ အပူၤန့ၣ် စီၤပီလူး ဒုးသ့ၣ်နီၣ် စီၤတံၤမသ့းလၢ သးစီဆှံကဟ့ၣ်ဂံၢ်ဟ့ၣ်ဘါအီၤန့ၣ်လီၤ.
ဖဲပအိၣ်တၢ်လီၢ်တပူၤလၢ်လၢ်- လၢဟံၣ်လၢဃီမ့ၢ်ဂ့ၤ, ထံဂုၤကီၢ်ဂၤမ့ၢ်ဂ့ၤ- ဒ်သိးပကစံၣ်တဲၤတဲလီၤပှၤဂၤလၢ ကစၢ်ခရံာ်အဂ့ၢ်အဂီၢ်န့ၣ်, ကစၢ်ယွၤ ကွဲမုာ်ဝဲဒၣ် ပဝဲပှၤစူၢ်က့ၤနာ်က့ၤတၢ်ဖိတဖၣ်ခဲလၢာ်န့ၣ်လီၤ. ပကတူၢ်ဘၣ်ခီၣ်ဘၣ်တၢ်နးတၢ်ဖှီၣ်ဘၣ်ဆၣ်, ထီဘိ ကစၢ်ယွၤအိၣ်ဒီးပှၤဖဲန့ၣ်လီၤ.
