လၢတၢ်ကမၢကမၣ်အပူၤန့ၣ် တၢ်ကလုၢ်ဟဲသီၣ်ထီၣ် ‘ဝိ’ (Wow) လၢပကရူၢ်ဖိတဖၣ် ဖဲအလဲၤတုၤဝဲဒၣ် တၢ်လီၢ်လၢအဘၣ်တၢ်ကတဲာ်ကတီၤအီၤ ဒ်သိးပှၤကအိၣ်ဘှံး မၤသီထီၣ်က့ၤဂံၢ်ဘါ အလီၢ်ခၢၣ်သးန့ၣ်လီၤ. ပှၤတဂၤ ပှ့ၤန့ၢ်ဝဲဒၣ် တၢ်လီၢ်အံၤ, ဒီးဘၣ်ဟ့ၣ်အပှ့ၤကလံၤဒိၣ်ဒိၣ်ကလဲာ်, အိၣ်ဒီးအတၢ်ပညိၣ် လၢကဒုးအိၣ်ထီၣ်ဝဲ တၢ်အိၣ်ဘှံးအိၣ်ကသုၣ်, တၢ်မၤသီထီၣ်က့ၤ နီၢ်ခိနီၢ်သးဂံၢ်ဘါအလီၢ်တတီၤ, လၢပှၤမၤတၢ်သးခုကစီၣ်တဖၣ်အဂီၢ်န့ၣ်လီၤ. ဖဲပထံၣ်ဘၣ် လီၢ်မံခးခံကထၢတဖၣ်, လီၢ်မံခးလၢ အဘၣ်တၢ်ဘျးလီၤစဲၤတဖၣ်, ဒီးလီၢ်မံဒၢးဖးဒိၣ်တဖၣ်န့ၣ်ဒီး, ပဝဲကိးဂၤ တၢ်လီၤကမၢကမၣ်ဘၣ်ပသးန့ၣ်လီၤ. တၢ်စူးကါ တၢ်ဖီအီၣ်ဖီအီတၢ်အလီၢ်, ဒီးတၢ်အီၣ်မ့ၤအလီၢ် ပိးလီတဖၣ်န့ၣ် ကဲထီၣ်တၢ်သးပ့ၢ်နီၣ် ဖျးတဆံးပမဲာ်ချံ လၢပဂီၢ်စ့ၢ်ကီးန့ၣ်လီၤ. ဖဲပဆိကမိၣ်ထီၣ် တၢ်လၢပထံၣ်တ့ၢ်လံတဖၣ်န့ၣ်, လၢာ်လံန့ၣ်ဒီး, တၢ်လၢအလီၤကမၢကမၣ်အဂၤတဖၣ်အိၣ်ဒံးဝဲဒၣ်အါမး- ပာ်ဃုာ်ဒီး တၢ်လိၣ်ကွဲ ဖျၢၣ်သွ့နီၢ်နီၢ်အပျီတပျီ လၢတၢ်သူၣ်ထီၣ်အပူၤန့ၣ်လီၤ. တၢ်ကမၢကမၣ်ခဲလၢာ်, မ့ၢ်တၢ်လၢအမၤကမၢကမၣ်တၢ်နီၢ်နီၢ်န့ၣ်လီၤ.

လၢပျၢၤ, ဖဲ နီၢ်ပၤမုၣ် ၡဘၤ လဲၤအိၣ်သကိးဝဲ စီၤပၤၡလိၤမိၤ ဖဲဝ့ၢ်ယရူးၡလ့ၣ် အကတီၢ်န့ၣ်, အသးကလၢၢ်ဘၣ် တၢ်ကမၢကမၣ်ဒ်သိးအံၤန့ၣ်လီၤ. ၁ စီၤ ၁၀:၄-၅ ပာ်ဖျါဝဲလၢ ‘ဖဲအထံၣ်ဘၣ် ကယဲၢ်စီၤၡလိၤမိၤ အတၢ်ကူၣ်သ့, ဒီးဟံၣ်လၢအမၤဝဲန့ၣ်, …… အသးတအိၣ်လၢၤဘၣ်လၢအပူၤဘၣ်’ န့ၣ်လီၤ. နံၣ်လၢအကယၤတဖၣ်, လဲၤပူၤကွံာ်ဝံၤအလီၢ်ခံ, စီၤလိၣ်စီၤပၤအတၢ်ဟဲလီၤစၢၤ စီၤပၤဒၤဝံး အဖိခွါ- ကစၢ်ယ့ၣ်ရှူး ဟဲအိၣ်ထီၣ်, ဒီးမၤကမၢကမၣ်ဝဲဒၣ် ပှၤဟီၣ်ခိၣ်ဖိတဖၣ်လၢ ကျိၤကျဲအဂၤတဖၣ် န့ၣ်လီၤ. လူၤ ၄:၃၆ ပာ်ဖျါဝဲ ဖဲ ကစၢ်ယ့ၣ်ရှူး လဲၤတၢ်တပူၤလၢ်လၢ်န့ၣ်, ပှၤဂီၢ်မုၢ် တဖၣ် အၢၣ်လီၤတူၢ်လိာ်ဝဲ အတၢ်ကူၣ်သ့, ဒီးအတၢ်မၤတဖၣ် ဒ်အမ့ၢ်တၢ်လီၤကမၢကမၣ်, ဒီးလူၤ ၁၁:၃၁ န့ၣ် ကစၢ်ယ့ၣ်ရှူး ဟ့ၣ်သဆၣ်ထီၣ်ပှၤဂီၢ်မုၢ် ဒ်သိးကထံၣ်ဝဲ, ‘ပှၤလၢအဒိၣ်န့ၢ်စီၤၡလိၤမိၤ အိၣ်ဝဲဖဲအံၤတဂၤ’ အဂ့ၢ်န့ၣ်လီၤ. ကစၢ်ယ့ၣ်ရှူး ဟဲလီၤမၤ ကစၢ်ယွၤအတၢ်မၤ လၢအလီၤကမၢကမၣ်န့ၣ် မ့ၢ်ဒၣ်ဟဲဟ့ၣ်လီၤပှၤ တၢ်ပျၢ်တၢ်ဒဲးဘး, ဘၣ်တၢ်ပှ့ၤန့ၢ်အီၤလၢ တၢ်အပှ့ၤကလံၤဒိၣ်ဒိၣ်ကလဲာ်, တၢ်စူးကွံာ်ညိကွံာ်အသးသမူန့ၣ်လီၤ. အဝဲကွဲမုာ် ပှၤအသးအိၣ်ဟဲဆူအအိၣ်ကိးဂၤဒဲးန့ၣ်လီၤ. ဒီးပှၤလၢအဟဲတဖၣ် ကလဲၤခီဖျိကလၢၢ်ဘၣ် အတၢ်ဃံတၢ်လၤ, ဒီးအတၢ်ဘျုးတၢ်ဖှိၣ်, ဒီးကသးဝံၣ်စံးပတြၢၤအီၤ ခဲအံၤဒီးဆူညါ လီၤထူလီၤယိာ်န့ၣ်လီၤ. ဝိ!