သံဧၣ် (Thai) တဂၤ အသးတမံဝဲဒၣ်ဘၣ်. အဖိခွါလၢအသးအိၣ် ၁၈ နံၣ်တဂၤန့ၣ် ဘၣ်မနုၤအဃိ မၤလၢာ်၀ဲဒၣ်အတၢ်ဆၢကတီၢ်တဖၣ် လၢလံာ်ရိဖှိၣ်န့ၣ်လဲၣ်? အဖိခွါမ့ၢ်ပှၤအီၣ်တ့းစၣ်ဖိ (Autistic)တဂၤ ဒီးတကတိၤတၢ်ဒီးပှၤဂၤကဲၣ်ဆိးဘၣ်, ဒီးအကၠိမ့ၢ်ပျၢ်န့ၣ် ဟဲက့ၤဝဲဒၣ်ဆူဟံၣ်ထီဘိန့ၣ်လီၤ. မ့ၢ်တၢ်မနုၤလဲလိာ်အီၤလဲၣ်? ဖဲဘၣ်တၢ်သံကွၢ်အီၤန့ၣ်ဒီး, စံးဆၢဝဲဒၣ်လၢ ‘ယမၤသကိးလံာ်ဒီး နဘံ (Navin)’ န့ၣ်လီၤ.
နဘံ (Navin)န့ၣ် မ့ၢ်ဝဲဒၣ် သံဧၣ် (Thai) အဖိခွါအတံၤသကိးတဂၤ တၢ်မၤလိတီၤဒၢးအပူၤန့ၣ် ထံၣ်၀ဲဒၣ်လၢ သံဧၣ် (Thai) အဖိခွါ ဘၣ်ဂုာ်ကျဲးစၢးမၤလိတၢ်အဃိ ဒ်သိး ကမၤလိသကိး လံာ်ဒီးအီၤအဂီၢ် ကွဲမုာ်ဝဲဒၣ်န့ၣ်လီၤ. ၁၈ နံၣ်အတီၢ်ပူၤ, တၢ်ရ့လိာ်ဘၣ်ထွဲလိာ်သးသီသီဖိ ဒ်အမ့ၢ်တၢ်အခီၣ်ထံးကတၢၢ်တဘျီအံၤ ဟ့ၣ်ဂံၢ်ဟ့ၣ်ဘါပၢ်တဂၤလၢ အသးဟးဂီၤတဂၤ ဒီးဆိကမိၣ်ဝဲလၢ အဖိခွါတဂၤအံၤ တမ့ၢ်လၢ ကဒိးန့ၢ်ဘၣ် တံၤသကိးလၢၤဘၣ်အဃိန့ၣ်လီၤ.
ပှၤလၢအလိၣ်ဘၣ် တၢ်မၤစၢၤတဂၤအကပၤန့ၣ် ပှၤလၢ အကမၤစၢၤကဟုကယာ်တၢ်တဂၤ မ့ၢ်အိၣ်ဝဲဒၣ်န့ၣ်ဒီး မ့ၢ်တၢ်မၤသီထီၣ်က့ၤတၢ်မုၢ်လၢ်န့ၣ်လီၤ. စီၤပီလူးမၤ၀ဲတၢ်သးခုကစီၣ် ဆူတၢ်အိၣ်ဖှိၣ်လၢသီတဖၣ်အကတီၢ်န့ၣ်, တၢ်ဂ့ၢ်အံၤ တၢ်စူးကါအီၤသ့စ့ၢ်ကီးလၢ တၢ်အိၣ်ခိးကွၢ်လၢ် တၢ်အုၣ်က့ၤခီၣ်က့ၤအဂီၢ်န့ၣ် စီၤပီလူးသ့ၣ်ညါဝဲဒၣ်န့ၣ်လီၤ. လံာ် ၁ သ့း ၅:၆ ပာ်ဖျါဝဲလၢ ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ကဆိးသီဒီးကီၤသူၣ်ကီၤသး ဒီးအိၣ်မူအိၣ်ဂဲၤလၢ တၢ်အိၣ်ခိးကွၢ်လၢ် ကစၢ်ခရံာ် ဟဲက့ၤကဒါက့ၤ အကတီၢ် လီၤဆီဒၣ်တၢ်ပှၤလၢ အဘၣ်ကျဲးစၢးဂဲၤလိာ်အသးတဖၣ်အဂီၢ် အဆၢဖိ ၁၁ ပာ်ဖျါ၀ဲလၢ မၤမုာ်ထီၣ်လိာ်သုသး ဒီးမၤထီၣ်မၤထီလိာ် သုသးတက့ၢ်န့ၣ်လီၤ.
လၢတၢ်န့ၣ်အဃိ လံာ် ၁ သ့း ၄:၁, ၁၀ ပာ်ဖျါဝဲလၢ ပှၤစူၢ်က့ၤနာ်က့ၤတၢ်ဖိတဖၣ် အိၣ်မူအိၣ်ဂဲၤလၢတၢ်အဲၣ်အပူၤ လၢအဘၣ်ယွၤအသးဒၣ်လဲာ် လံာ် ၁ သ့း ၅:၁၄ အပူၤန့ၣ် စီၤပီလူးမၤသ့ၣ်နီၣ် အဝဲသ့ၣ်လၢ ပှၤလၢ အတသးခုဘၣ်တဖၣ်န့ၣ် မၤမုာ်ထီၣ်အီၤတက့ၢ်. ပှၤလၢအဂံၢ်စၢ်ဘါစၢ်တဖၣ်န့ၣ် မၤစၢၤအီၤတက့ၢ်န့ၣ်လီၤ. ဖဲပထံၣ်ဘၣ်ပှၤစူၢ်က့ၤနာ်က့ၤကစၢ်ခရံာ်တဖၣ် အတၢ်ပျံၤတၢ်ဖုး အတၢ်သူၣ်ကိၢ်သးဂီၤ မ့တမ့ၢ် အတၢ်မုၢ်လၢ်မ့ၢ်လီၤမၢ်န့ၣ်ဒီး ပကလဲၤသကိးတၢ်ဒီးအဝဲသ့ၣ် ခီဖျိလၢ တၢ်ခိးကနၣ်အဝဲသ့ၣ်အတၢ်ကတိၤ, စံးကတိၤမၤမုာ်ထီၣ်က့ၤအ၀ဲသ့ၣ်အသး မ့တမ့ၢ်ဆ့ၣ်နီၤလၢအကပၤ ဘှ့ၣ်ဘှ့ၣ်ဘှီၣ်ဘှီၣ်ဖိ – ဒ်သိးပကဟ့ၣ်အဝဲသ့ၣ် ဂံၢ်ဘါ, ဒီးတၢ်သူၣ်ဒူသးဒူလၢ ကဟံးဃာ်ဂၢၢ်ကျၢၤ အတၢ်မုၢ်လၢ်လၢ ကစၢ်ခရံာ်အပူၤအဂီၢ်, ကစၢ်ယွၤစူးကါပှၤသ့ဝဲဒၣ်န့ၣ်လီၤ.
