ကၠဲး (Jack) သးဟ့ဝဲဒၣ်ကၠိန့ၣ်လီၤ. တၢ်မၤလိ တၢ်ဒွးတဖၣ်, ကျိာ်ဂံၢ်ထံး (Grammar), ဒီးတၢ်မၤလိဃုသ့ၣ်ညါ ဂာ်စီ (Chemistry) သ့ၣ်တဖၣ်န့ၣ် တလီၤသးစဲလၢအဂီၢ်ဘၣ်.ဘၣ်ဆၣ်, အဝဲအဲၣ် တၢ်တ့ဟံၣ်ဃီတဖၣ်န့ၣ်လီၤ. ဖဲတၢ်ကိၢ်ခါအကတီၢ်, အပၢ်လဲၤကိးအီၤဆူအတၢ်မၤလီၢ်, ဒီး ကၠဲး တသးမံဝဲဒၣ်ဘၣ်န့ၣ်လီၤ. အသးန့ၣ် အိၣ်ဒံးဒၣ် ၁၆ နံၣ် ဘၣ်ဆၣ်, အဝဲသ့ၣ်ညါ အီကတဲကမူၣ် (Cement), ဒီးလၢၢ်ဖိပြံတဖၣ်အဂ့ၢ်, ဒီးကဘၣ်မၤဝဲတၢ်အဒူၣ်တဖၣ်ဒ်လဲၣ်န့ၣ်လီၤ. ကၠိ, ဒီးတၢ်တ့တၢ်သူၣ်ထီၣ်အလီၢ် အတၢ်လီၤဆီန့ၣ် ကမ့ၢ်တၢ်မနုၤလဲၣ်? မ့ၢ်ဒၣ်တၢ်အဲၣ်တူၢ်လိာ်တၢ်န့ၣ်လီၤ. ကၠဲး အဲၣ်တူၢ်လိာ်မၤဝဲဒၣ် တၢ်တ့တၢ်သူၣ်ထီၣ်, ဒီးတၢ်လဲၤထီၣ်ကၠိန့ၣ် တအဲၣ်ဒိးမၤဝဲဘၣ်. တၢ်အဲၣ်တူၢ်လိာ်မၤတၢ်န့ၣ် ထိၣ်သဆၣ်ထီၣ် အတၢ်သ့ၣ်ညါနၢ်ပၢၢ်တဖၣ်န့ၣ်လီၤ.

၁ သ့း ၂:၁၀ ပာ်ဖျါဝဲလၢ ပဝဲပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ပကဘၣ်အဲၣ် ‘တၢ်မ့ၢ်တၢ်တီ’ န့ၣ်လီၤ. အဆၢဖိ ၉ န့ၣ် စီၤပီလူး စံးဝဲဒၣ် မုၣ်ကီၤလံၢ်အက့ၢ်အဂီၤ, ဒ်အမ့ၢ် တၢ်စူးကါ ‘တၢ်စိတၢ်ကမီၤ, ဒီးတၢ်လီၤလိၢ်လီၤလးကဘျံးကဘျၣ်တဖၣ်,’ ဒီးအဆၢဖိ ၁၀ ပာ်ဖျါဝဲ ဒ်သိးကလီန့ၢ်ပှၤ ‘တုၤလၢတၢ်ဟးဂီၤတဖၣ်အကျါ’ န့ၣ်လီၤ. ဘၣ်မနုၤအဃိလဲၣ်န့ၣ်, အဆၢဖိ ၁၀ စံးဘၣ်ပှၤ ‘အဂ့ၢ်ဒ်အံၤ, တတူၢ်လိာ်ဘၣ် တၢ်အဲၣ်ဒိးတၢ်မ့ၢ်တၢ်တီ, ဒ်သိးအကတုၤလၢ တၢ်အုၣ်က့ၤခီၣ်က့ၤအီၤဘၣ်’ န့ၣ်လီၤ. အဝဲသ့ၣ် လီၤတူၢ်လီၤကာ်လၢ တၢ်အဲၣ်တၢ်မ့ၢ်တၢ်တီန့ၣ် မၤဘျီၣ်အဝဲသ့ၣ်အတၢ်ထံၣ် လၢကသ့ၣ်ညါတၢ်မ့ၢ်တၢ်တီအဂီၢ်န့ၣ်လီၤ. အဆၢဖိ ၁၁ပာ်ဖျါဝဲလၢ တၢ်ကလီန့ၢ်ဝ့ၤန့ၢ်အဝဲသ့ၣ်န့ၣ်လီၤ.

မ့ၢ်ပသ့ၣ်ညါတၢ်မနုၤတမံၤလဲၣ်? တၢ်သံကွၢ်အကါဒိၣ်တမံၤန့ၣ် သန့ၤထီၣ်အသးလၢတၢ်သံကွၢ်အဂံၢ်ထံး, လၢအမ့ၢ်, “ယအဲၣ်တၢ်မနုၤလဲၣ်” န့ၣ်လီၤ. ပတၢ်သူၣ်ဆူၣ်သးဆူၣ်န့ၣ် ထုးန့ၢ်ပသး, ဒီးနဲၣ်ပတၢ်ဆိကမိၣ်န့ၣ်လီၤ. တၢ်လၢပအဲၣ်အီၤန့ၣ် ပပာ်လုၢ်ပာ်ပှ့ၤဝဲဒၣ်န့ၣ်လီၤ. တၢ်လၢပအဲၣ်အီၤန့ၣ် ပဒီဒၣ်အီၤ, ဒီးပဃုထံၣ်န့ၢ်အါထီၣ်အီၤန့ၣ်လီၤ. ပမ့ၢ်အဲၣ်တၢ်မ့ၢ်တၢ်တီ, ဒီးတၢ်ကူၣ်သ့န့ၣ် ကတိၤ ၃:၁၃-၁၄; ၄:၇-၉ စံးဘၣ်ပှၤလၢ ပကဃုအီၤ ဒ်ထူလုၢ်ဒိၣ်ပှ့ၤဒိၣ်န့ၣ်လီၤ. တၢ်မ့ၢ်တၢ်တီ, ဒီးတၢ်ကူၣ်သ့ ကပၢၤဃာ်ပှၤန့ၣ်လီၤ. ကတိၤ ၄:၆ စံးဘၣ်ပှၤလၢ ‘လဲၤသဒၣ်အီၤတဂ့ၤ, ဒီးကအံးက့ၤကွာ်က့ၤနၤလီၤ. အဲၣ်အီၤတက့ၢ်, ဒီးကပၢၤနၤလီၤ.’

တၢ်ကူၣ်သ့နီၢ်နီၢ်န့ၣ် ကမ့ၢ်တၢ်မနုၤလဲၣ်. ကစၢ်ယ့ၣ်ရှူး မ့ၢ်တၢ်ကူၣ်သ့န့ၣ် ယိၤ ၁၄:၆ ပာ်ဖျါဝဲဒၣ် ‘ယဲဒၣ်အံၤယမ့ၢ်ကျဲ, ဒီးတၢ်မ့ၢ်တၢ်တီ, ဒီးတၢ်မူ’ န့ၣ်လီၤ. လၢပဂီၢ် တၢ်သံကွၢ်အကါဒိၣ်ကတၢၢ်န့ၣ် မ့ၢ်ပအဲၣ်မတၤတဂၤလဲၣ်. ပကမၤလိန့ၢ်အကျဲအဂီၢ်, ပကဘၣ်အဲၣ် ကစၢ်ယ့ၣ်ရှူး, ဒီးအဝဲကပၢၤပတၢ်အိၣ်မူ ခီဖျိအတၢ်နဲၣ်ပှၤဆူ အတၢ်မ့ၢ်တၢ်တီန့ၣ်လီၤ.