ယတံၤသကိးအမါ, မ့ၢ်ပှၤဆးတၢ်စဲၣ်နီၤတဂၤန့ၣ်, အတၢ်အိၣ်ဆူၣ်အိၣ်ချ့တဂ့ၤဝဲဒၣ် အါနံၣ်အါလါအပူၤအဃိ, တချုးလၢအသံန့ၣ် မၤတ့ၢ်ဝဲတၢ်ရဲၣ်တၢ်ကျဲၤလၢ အလီၤအဲၣ်လီၤကွံတမံၤန့ၣ်လီၤ. အဝဲဟ့ၣ်လီၤတဲာ်တ့ၢ်ဝဲ အတၢ်ဆးစဲးဖီကဟၣ်တဖၣ်ခဲလၢာ်- ဒ်အမ့ၢ် စဲးဆးတၢ်တဖၣ်, စီၢ်နီၤခိၣ်လၢတၢ်တံာ်တၢ်ကံးညာ်တဖၣ်, အါန့ၢ်အန့ၣ်, ပှၤတခီဘီမုၢ်ဖိ သုးလီၢ်သုးကျဲ, ဒီးအိၣ်ဟဲဝဲလၢထံဂုၤကီၢ်ဂၤတဖၣ်အဂီၢ် ပာ်လီၤတဲာ်တ့ၢ်ဝဲဒၣ် တၢ်သိၣ်လိတၢ်ဆးအလီၢ်တဖၣ်ဆူ ပဝ့ၢ်ပှၤဆးတၢ်ဖိအကရၢန့ၣ်လီၤ. အဝၤ စံးဘၣ်ပှၤလၢ ‘ယဂံၢ်ကွၢ်ဒွးကွၢ်ဝဲဒၣ် တၢ်ကံးညာ်အတလါန့ၣ် အိၣ်ဝဲ ၂၈ ဖျၢၣ်န့ၣ်လီၤ. ပိာ်မုၣ်ဃုဂၤ ဟဲဟံးန့ၢ်ဝဲဒၣ် တၢ်ပိးတၢ်လီတဖၣ်ခဲလၢာ်န့ၣ်လီၤ. အဝဲသ့ၣ်အပျဲၢ်ဖိတဖၣ် မ့ၢ်ပှၤလၢကျဲးစၢးမၤတၢ်ဆူၣ်ဆူၣ်, ဒီးအသးဆူၣ်မၤလိန့ၢ်တၢ်သ့တၢ်ဘၣ်န့ၣ်လီၤ.’
ပှၤအိၣ်ဝဲတနီၤလၢ တအဲၣ်ဒိးတူၢ်လိာ်မုာ် ပှၤအသီဟဲနုာ်လီၤအိၣ်ဆိးတၢ် ဒ်သိးအံၤတဖၣ်အဃိ, ပှၤသုးလီၢ်သုးကျဲ, အိၣ်ဟဲလၢထံဂုၤကီၢ်ဂၤတဖၣ် အတၢ်အိၣ်အသးအကီအခဲ, ဒီးအလီၤသးအုးတဖၣ်န့ၣ် ကဲထီၣ်တၢ်လၢ အမၤလီၤဖးတၢ်န့ၣ်လီၤ.
ဘၣ်ဆၣ်, ၂မိၤ ၂၃:၉ န့ၣ် စီၤမိၤရှ့ ပာ်ဖျါထီၣ် ကစၢ်ယွၤ အတၢ်ပာ်သူၣ်ပာ်သး လၢ ‘မၤနးမၤဖှီၣ်ပှၤတခီဘီမုၢ်ဖိတဂ့ၤ. အဂ့ၢ်ဒ်အံၤ သုသ့ၣ်ညါပှၤတခီဘီမုၢ်ဖိအသး’ န့ၣ်လီၤ. စီၤမိၤရှ့ ဟ့ၣ်လီၤအါထီၣ်ဝဲ ကစၢ်ယွၤ အတၢ်သိၣ်တၢ်ဘျၢ ဘၣ်ဃးဒီးပှၤတခီဘီမုၢ်ဖိတဖၣ်အဂီၢ်န့ၣ် ဖျါဖဲ ၃ မိၤ ၁၉:၉-၁၀ အပူၤ, “ဒီးတုၤသုကူးသုဟီၣ်ခိၣ်အဘုဒီး ……… ထၢထီၣ်တၢ်လီၤတဲာ်လၢ နစပံးလီၢ်ပူၤတဂ့ၤ…… နဘၣ်ပာ်လီၤတဲာ်တၢ်လၢ ပှၤဖှီၣ်ဖိယာ်ဖိ, ဒီးပှၤတခီဘီမုၢ်ဖိအဂီၢ်လီၤ. ယဲဒၣ်အံၤယမ့ၢ်ယွၤ သုကစၢ်လီၤ” န့ၣ်လီၤ.
အဆၢဖိ ၃၃-၃၄ န့ၣ် ကစၢ်ယွၤ ဘိးဘၣ်သ့ၣ်ညါစ့ၢ်ကီးဝဲလၢ, ‘ဒီးပှၤတခီဘီမုၢ်ဖိ မ့ၢ်အိၣ်မ့ၢ်ဆိးလၢသုကီၢ်ပူၤဒီး, သုတမၤနးမၤဖှီၣ်အီၤတဂ့ၤ. ဒီးပှၤတခီဘီမုၢ်ဖိ လၢအအိၣ်အဆိးဒီးသုန့ၣ် ဘၣ်ကဲထီၣ်လၢသုမဲာ်ညါ ဒ်ပှၤအိၣ်ဖျဲၣ်လၢသုကျါအသိးန့ၣ်လီၤ. ဒီးနဘၣ်အဲၣ်အီၤ ဒ်နအဲၣ်လီၤနကစၢ်ဒၣ်နဲအသိးန့ၣ်လီၤ. အဂ့ၢ်ဒ်အံၤ, သုမ့ၢ်တ့ၢ် ပှၤတခီဘီတခီမုၢ်ဖိ လၢကီၢ်အဲၤကူပတူးအပူၤလီၤ. ယဲဒၣ်အံၤ ယမ့ၢ်ယွၤသုကစၢ်လီၤ’ န့ၣ်လီၤ.
ယွၤပာ်လီၤဝဲ နီၣ်ထိၣ်အပတီၢ်န့ၣ်လီၤ. မ်ယွၤကဆိၣ်ဂ့ၤ ပသူၣ်ပသးတဖၣ် ဒ်သိးပကဒုးနဲၣ်ဖျါထီၣ်တၢ်အဲၣ်ဆူ ပှၤတခီဘီမုၢ်ဖိတဖၣ်, လၢအအိၣ်ဆိးလၢပသိးပကျါ န့ၣ်တက့ၢ်.
