အနံၣ်တဆံအတီၢ်ပူၤန့ၣ် မဲးကံၣ် (Meggie) သူဝဲကသံၣ်မူၤဘှိးအဃိ, ဘၣ်နုာ်လီၤဟးထီၣ်ဝဲဒၣ်လၢဃိာ်ပူၤတလီၢ်လီၢ်န့ၣ်လီၤ. မ့ၢ်တဆီတလဲ အတၢ်အိၣ်မူဘၣ်န့ၣ်ဒီး, တယံာ်ဘၣ်န့ၣ်ကက့ၤကဒါဝဲဒၣ်ဆူကျဲအလီၢ်လံၤန့ၣ်လီၤ. လၢခံအဝဲထံၣ်လိာ်အသးဒီး ဟါ(န)(စ) (Hans), လၢအပူၤကွံာ်န့ၣ် မ့ၢ်ပှၤလၢ အသူကသံၣ်မူၤဘှိးတဂၤ, မ့ၢ်လၢဆဲးနုာ်လီၤ ကသံၣ်ဆူအသွံၣ်မိၢ်ပှၢ်အကျိၤပူၤ အါတလၢအဃိ, ဘူးတ့ၢ်မးလၢအစုတခီကဘၣ်တၢ်မၤဟးဂီၤအီၤန့ၣ်လီၤ. ဟါ(န)(စ) စံးဘၣ်အီၤလၢ ‘အကတီၢ်ဖဲန့ၣ် ယကိးထီၣ် ကစၢ်ယွၤ အဆိကတၢၢ်တဘျီ’ န့ၣ်လီၤ. ကစၢ်ယွၤ စံးဆၢအီၤ, ဒီးကတဲာ်ကတီၤ ဒုးကဲထီၣ်အီၤလၢ ပှၤနၢ်ပၢၢ်တၢ် စဲၣ်နီၤတဂၤ (specialist) လၢတၢ်ကရၢကရိတဖု လၢအမၤသကိးတၢ် ဒ်သိးကမၤဂ့ၤမၤဘျါက့ၤ ပှၤသူကသံၣ်မူၤဘှိး, လၢအလီၤဃိာ်တဖၣ်အဂီၢ်န့ၣ်လီၤ.

တၢ်ရဲၣ်တၢ်ကျဲၤအံၤ ဘၣ်တၢ်ကိးအီၤလၢ Stone Soup, ဒီးမၤစၢၤဝဲ အမဲရကၤအဃိာ်တဖျၢၣ်, လၢကတဲာ်ကတီၤန့ၢ်ဝဲ ပှၤဘၣ်လီၤဃိာ်တဖၣ် ဒ်သိးကက့ၤနုာ်လီၤမၤသကိးက့ၤတၢ်, လၢအပှၤတဝၢအပူၤအဂီၢ်န့ၣ်လီၤ. ခီဖျိလၢတၢ်ရဲၣ်တၢ်ကျဲၤအံၤန့ၣ်, မဲးကံၣ် ဘၣ်လဲၤအိၣ်ဆိးဝဲဒၣ်လၢ ပှၤမၤစၢၤပှၤဟဲပတုာ်တၢ်သူကသံၣ်မူၤဘှိးတဖၣ်အဟံၣ်, ဒ်သိးဒီးကပတုာ်ကွံာ်တၢ်သူကသံၣ်မူၤဘှိးအဂီၢ်န့ၣ်လီၤ. ခဲကနံၣ်အံၤန့ၣ်, ဟါ(န)(စ) မၤစၢၤအီၤ,ဃုာ်ဒီးပှၤဂုၤပှၤဂၤတဖၣ် လၢတၢ်ဃုဖံးဃုမၤတၢ်, တၢ်ဃုထၢ တၢ်ကူၣ်ဘၣ်ကူၣ်သ့အကျိၤအကျဲ, တၢ်ကူစါယါဘျါအဂီၢ်, ဒီးဟံၣ်ဖိဃီဖိအတၢ်လိၣ်တဖၣ်အဂီၢ်- လၢတၢ်မၤသကိးတၢ်ဘူးဘူးတံၢ်တံၢ်အပူၤန့ၣ်လီၤ.

လံာ်စီဆှံပာ်ဖျါဝဲ တၢ်ဂံၢ်ဆူၣ်ဘၣ်ဃးဒီးတၢ်မၤသကိးတၢ်လၢတၢ်ကူၣ်သ့အပူၤန့ၣ်လီၤ. စံၣ်တဲၤတဲ ၄:၉-၁၀ စံးဝဲဒၣ် ‘ပှၤခံဂၤဂ့ၤန့ၢ်ပှၤတဂၤတက့ၢ်လီၤ. အဂ့ၢ်ဒ်အံၤ, အဘူးအလဲဂ့ၤ အိၣ်ဝဲလၢအမၤတၢ်အဂီၢ်လီၤ. အဂ့ၢ်ဒ်အံၤ, ပှၤတဂၤမ့ၢ်လီၤဃံၤဒီး, ပှၤတဂၤကဝံၣ်ဆၢထၢၣ်အသကိးလီၤ. ဘၣ်ဆၣ်, “မ့မ့ၢ်ပှၤအိၣ်တဂၤဃီ မ့ၢ်လီၤဃံၤဒီးပှၤခံဂၤတဂၤလၢအကဝံၣ်ဆၢထၢၣ်အီၤတအိၣ်ဘၣ်ဒီး ဘၣ်အဖှီၣ်” (:၁၀) န့ၣ်လီၤ.

လၢ “လၢၢ်ကသူထံ” (Stone Soap) အတၢ်စံၣ်ဃဲၤအပူၤန့ၣ်, ဒ်ပှၤလဲၤတၢ်ဖိ လၢအသၣ်ဝံၤလီၤဘဲတဂၤ ကွဲမုာ် ပှၤဝ့ၢ်ဖိတဖၣ် ကဟ့ၣ်နီၤအီၤ တၢ်အကံၢ်အစီဂၤမံၤဂၤမၠိ ဒ်သိးကဖီဝဲ “လၢၢ်ကသူထံ” အဝံၣ်အဘဲ, လၢပှၤကိးဂၤအဂီၢ်အသိး, အဆၢဖိ ၁၂ န့ၣ် လံာ်စီဆှံ မၤဂၢၢ်မၤကျၢၤဝဲဒၣ်လၢ ပမ့ၢ်မၤသကိးတၢ်န့ၣ်ဒီး, ပဂံၢ်ကဆူၣ်ထီၣ်, ဒီးပမၤတၢ်ကဂ့ၤအါထီၣ်ဝဲဒၣ်န့ၣ်လီၤ. ယွၤ အတၢ်တိာ် လၢပဂီၢ်န့ၣ် တၢ်အိၣ်မူအိၣ်ဂဲၤလၢပပှၤတဝၢအပူၤ, ဒီးမၤစၢၤပှၤဂၤ, ဒီးဒိးန့ၢ်ကဒါက့ၤတၢ်မၤစၢၤန့ၣ်လီၤ. တၢ်အံၤတမ့ၢ်တၢ်တဲမုာ်နၢ်ဘၣ်. မ့ၢ်သးသမူအတၢ်မ့ၢ်တၢ်တီန့ၣ်လီၤ.