အပူၤကွံာ်တဘျုးနံၣ်န့ၣ် ဖဲယလဲၤဟးကသုၣ်ဆူ ဝ့ၢ် ဖဲရ့း (Paris) န့ၣ်ဒီး, ဒ်သိးပကဟံးန့ၢ်သကိး ဟါတၢ်အီၣ်အဂီၢ်, တချုးယလဲၤထံၣ်လိာ်ယသးဒီးယတံၤသကိး ဖဲ အံၣ်ဖဲ တၢ်သူၣ်ထီၣ်ဖးထီ (Eiffel Tower) န့ၣ် ယလဲၤဟးလိာ်ကွဲကွၢ်ကီ ဝ့ၢ်လၢအမံၤဟူသၣ်ဖျါတဝ့ၢ်အံၤ ထဲဒၣ်ယၤတဂၤဧိၤန့ၣ်လီၤ. တချုးလၢယကွဲၤဒီနၢ် အဂံၢ်လၢာ်ကွံာ်ဝဲဒၣ်န့ၣ် တၢ်ခဲလၢာ်လဲၤအသးဂ့ၤဂ့ၤဘၣ်ဘၣ်န့ၣ်လီၤ. မ့ၢ်လၢ ဟီၣ်ခိၣ်ဂီၤ တအိၣ်ဒီးယၤအဃိ, ယလဲၤတုၤဖဲလဲၣ်န့ၣ် ယတသ့ၣ်ညါလီၤတံၢ်ယဲဘၣ်ဆၣ်,ဒ်ယမ့ၢ်ပှၤဝ့ၢ်မုၣ်ဖိတဂၤအသိး ယတပျံၤတၢ်ဘၣ်. ယလဲၤဟးဆူညါ, ဒီးပိာ်ထွဲယဲ စ့(န) ထံကျိ (Seine River), ဒီးကွၢ်ပညိၣ်ယဲဒၣ်ဆူ အံၣ်ဖဲ တၢ်သူၣ်ထီၣ်ဖးထီ လၢအအိၣ်ဖျိအိၣ်ဖျါအအိၣ်န့ၣ်လီၤ. တချုးလၢယလဲၤတုၤဆူတၢ်သူၣ်ထီၣ်ဖးထီန့ၣ် ယတၢ်လဲၤ ဘၣ်လိာ်ဘၣ်စးဝဲဘၣ်ဆၣ်, တၢ်သူၣ်ထီၣ်တဖၣ် အိၣ်ကဝီၤဃာ်အီၤအဃိ, အံၣ်ဖဲ တၢ်သူၣ်ထီၣ်ဖးထီန့ၣ် ဟါမၢ်ဝဲဒၣ်န့ၣ်လီၤ.
က့ၢ်ဂီၤဖးဒိၣ်ဒ်သိးအံၤန့ၣ် တအိၣ်ဖျါဝဲလၢယတၢ်ထံၣ်အဃိ, ယကမၢကမၣ်ယဲဒၣ်န့ၣ်လီၤ. အကတၢၢ်န့ၣ် ယသ့ၣ်ညါလၢ ယလိၣ်ဘၣ်တၢ်မၤစၢၤလံအဃိ, ယကဘၣ်လဲၤကျဲဒ်လဲၣ်န့ၣ် ယသံကွၢ်ပှၤဂၤ, ဒီးယထံၣ်လိာ်ယသးဒီးယတံၤသကိးန့ၣ်လီၤ.
တၢ်လၢပတဆိကမိၣ်န့ၣ် မၤအသးသ့ဝဲဒၣ် လၢပတၢ်အိၣ်မူအပူၤန့ၣ်လီၤ. ဖဲပဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲ, ဒီးတၢ်တၤပှၤတဖၣ်အကတီၢ်, ပဃ့ကစၢ်ယွၤ အတၢ်မၤစၢၤ, ဒီးအတၢ်နဲၣ်ကျဲသ့ဝဲဒၣ်န့ၣ်လီၤ. ပဃ့တၢ်မၤစၢၤလၢ ကစၢ်ယွၤအအိၣ်စံးတၢ်န့ၣ်, ဒ်သိးပတလီၤမၢ်လၢပတၢ်အိၣ်မူ အတၢ်လဲၤကျဲအဂီၢ်, မ့တမ့ၢ် ဒ်သိးပသုတလီၤဘၣ်တၢ်လ့ပစီလၢ ပကဟးဖျိးကျဲ, ဒီးတၢ်ပျၢ်စုပျၢ်ခီၣ်အဂီၢ်န့ၣ်လီၤ. လီၤဆီဒၣ်တၢ် ဖဲပတၢ်အိၣ်မူအိၣ်ဂဲၤ ဖျါလၢကီဝဲခဲဝဲ, မ့တမ့ၢ် အိၣ်ပှဲၤဒီးတၢ်သဘံၣ်ဘုၣ် အကတီၢ်, လၢတၢ်နဲၣ်ကျဲအဂီၢ်, ပဃၣ်က့ၤပသးဆူယွၤအအိၣ်သ့ဝဲဒၣ်န့ၣ်လီၤ.
ကတိၤ ၃:၅-၆ န့ၣ်, စီၤၡလိၤမိၤ ဟ့ၣ်ဂံၢ်ဟ့ၣ်ဘါ ပှၤဖးလံာ်ဖိတဖၣ်လၢ ‘သန့ၤနသးလၢယွၤလၢနသးဒီဖျၢၣ်ညါတက့ၢ်. ဒီးသုတသန့ၤနသးလၢ နတၢ်ကူၣ်တၢ်ဆးဒၣ်နဲတဂ့ၤ, သ့ၣ်ညါယွၤလၢနကျဲခဲလၢာ်အပူၤတက့ၢ်, ဒီးအဝဲဒၣ်ကမၤလိၤနကျဲ’ န့ၣ်လီၤ.
ပမ့ၢ်ဃုထံၣ်န့ၢ် ယွၤအတၢ်ကူၣ်သ့ ခီဖျိလၢတၢ်ထုကဖၣ်, ဒီးတၢ်ဖးလံာ်စီဆှံန့ၣ်, ကစၢ်ယွၤ ကနဲၣ်ဆှၢပှၤန့ၣ်လီၤ. မ်ပကနာ်သန့ၤအီၤဆူညါ, ဒီးလူၤပိာ်ထွဲကစၢ်ယွၤအတၢ်နဲၣ်ဆှၢပှၤန့ၣ်တက့ၢ်.
