တၢ်ဆိကမိၣ်မှံ, ဒီးဒုးကဲထီၣ် စံၣ်စိၤနုာ် တၢ်ဂီၤမူ “တၢ်မံမီၣ် အတၢ်လိာ်ကွဲအပျီ” (Field of Dreams) အပူၤန့ၣ် ခွါဂဲၤဒိ ရ့ ခ့စလၣ် (Ray Kinsella) ထံၣ်လိာ်အသးဒီးအပၢ်, လၢအသံတ့ၢ်လံတဂၤ, ဒ်ပှၤသးစၢ်လိာ်ကွဲတၢ်ဖိတဂၤအသိးန့ၣ်လီၤ. ဖဲအထံၣ်ဘၣ်ဝဲ အဆိကတၢၢ်တဘျီန့ၣ်, ရ့ တဲဝဲဒၣ် အမါ အဲနံၣ် လၢ, “ယထံၣ်ဘၣ်အီၤ ဖဲအနီၢ်ကစၢ် လီၤဘှံးလီၤဘှါ, ခီဖျိလၢသးသမူအတၢ်လဲၤခီဖျိ မၤဘၣ်ဒိဆါအီၤဝံၤအလီၢ်ခံန့ၣ်လီၤ. ယကွၢ်အီၤ…,ဒီးမ့ၢ်ယကဘၣ် တဲအီၤတၢ်မနုၤလဲၣ်” န့ၣ်လီၤ. လၢတၢ်ဂီၤမူအပူၤ တၢ်ဒုးနဲၣ်တတီၤအံၤဒုးအိၣ်ထီၣ် တၢ်သံကွၢ်- ပှၤလၢပအဲၣ်ဘၣ်အီၤတဂၤ, ခဲကနံၣ်အံၤ, မ့ၢ်သံတ့ၢ်လံဘၣ်ဆၣ်, ပမ့ၢ်ထံၣ်ဘၣ်လၢ အိၣ်မူဝဲ, ဒီးအိၣ်ဆူၣ်အိၣ်ချ့ ပှဲၤဂံၢ်ပျဲၤဘါန့ၣ်ဒီး တၢ်ကမၤအသးဒ်လဲၣ်.
နီၢ်မၤရံ မၤကဒါလ့ၣ် ထံၣ်ဝဲဒၣ် ကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤလၢ တၢ်သံအဆိကတၢၢ်န့ၣ်ဒီး, အသးကလၢၢ်ဘၣ်ဝဲဒ်သိးအံၤန့ၣ်လီၤ. ယိၤ ၂၀:၁၄ န့ၣ် နီၢ်မၤရံ ဟီၣ်ဝဲဒၣ်လၢ လၢၢ်ကအိ အိၣ်ကလီတပူၤအကပၤ, “ဒီးဃၣ်ဃီၤအသးဆူ အလီၢ်ခံ, ဒီးထံၣ်ယ့ၣ်ရှူး ဆၢထၢၣ်, ဒီးတသ့ၣ်ညါဘၣ်လၢ အမ့ၢ်ယ့ၣ်ရှူးဘၣ်” န့ၣ်လီၤ. ဘၣ်မနုၤအဃိ တသ့ၣ်ညါနီၣ်ဝဲ ကစၢ်ယ့ၣ်ရှူးန့ၣ်လဲၣ်. ဘၣ်သ့ၣ်သ့ၣ်, ကမ့ၢ်ဝဲဒၣ် မဲာ်ထံတဖၣ်လၢ အမဲာ်ချံအပူၤအဃိ, မ့တမ့ၢ် ဒ်အဆၢဖိ ၁ ပာ်ဖျါဝဲအသိး, ကမ့ၢ်ဝဲလၢ “တၢ်ခံးဒံး” အဃိန့ၣ်လီၤ. အါန့ၢ်အန့ၣ်, ကမ့ၢ်ဝဲဒၣ် ဖဲအထံၣ်ဘၣ် ကစၢ်ယ့ၣ်ရှူး လၢခံကတၢၢ်န့ၣ်, အနီၢ်ကစၢ် ဒီတဂၤ, လုၣ်ဘၢဝဲဒီးအသွံၣ်, ဒီးဘၣ်တၢ်ဒိတီၢ်, မၤဆါအီၤနးနးကျံၤကျံၤ, တုၤအသံတစုအဃိန့ၣ်လီၤ. နီၢ်မၤရံ တမုၢ်လၢ်ဆိကမိၣ် ဝဲလၢ ကထံၣ်ဘၣ်က့ၤ ကစၢ်ယ့ၣ်ရှူး အိၣ်မူအိၣ်ဂဲၤဒံးဘၣ်အဃိ, ဒ်သိးဒီးကနၢ်ဝဲဒၣ် ကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤ အတၢ်မ့ၢ်တၢ်တီလီၤလီၤဆီဆီအဂ့ၢ်အံၤအဂီၢ်, နီၢ်မၤရံ ဘၣ်ဟံးန့ၢ်တၢ်ဆၢကတီၢ်န့ၣ်လီၤ.
ဘၣ်ဆၣ်, ဖဲတၢ်လီၢ်အံၤန့ၣ် ၁ ကရံၣ် ၁၅:၄၂ ပာ်ဖျါဝဲလၢ ကစၢ်ယ့ၣ်ရှူး “ဂဲၤဆၢထၢၣ်က့ၤဒီးတၢ်တအုၣ်သံဘၣ်အပူၤ” န့ၣ်လီၤ. ဒီးအကတီၢ်ဖိ ဖဲကစၢ်ယ့ၣ်ရှူးကိးအီၤလၢ အမံၤန့ၣ်ဒီး, နီၢ်မၤရံ သ့ၣ်ညါနီၣ်က့ၤအီၤ, ဒီး ယိၤ ၂၀:၁၆ ပာ်ဖျါဝဲလၢ, တမ့ၢ်ဝဲဒ် ထဲလၢအတံၤသကိးအတီအလိၤ, ဒီး “သရၣ်” တဂၤအသိးဘၣ်. မ့မ့ၢ် ဒ်အသးသမူအကစၢ်, လၢအဂဲၤဆၢထၢၣ်သမူထီၣ်က့ၤတဂၤအသိးန့ၣ်လီၤ. လၢအတၢ်မၤလီၤလးတဖၣ်အပူၤန့ၣ် ကစၢ်ယွၤ အိၣ်ဒီးကျိၤကျဲတဖၣ်ထီဘိ, လၢအမၤကမၢကမၣ်ပှၤန့ၣ်လီၤ. အဝဲမၤနၢၤတၢ်သံလၢပဂီၢ်န့ၣ် တၢ်လီၤကမၢကမၣ်အါမးတဖၣ်အကျါ မ့ၢ်တၢ်အဒိၣ်ကတၢၢ်န့ၣ်လီၤ.
