တၢ်အိၣ်ဖှိၣ်သရၣ်လၢ အဘၣ်တၢ်အဲၣ်အီၤ အဲၣ်ဒရူ မၢၤရ့ (Andrew Murray 1828-1917) န့ၣ် ဟ့ၣ်နီၤလီၤဝဲ တၢ်ဆူးတၢ်ဆါ အကလုာ်အါမံၤလၢ အမၤဟးဂီၤ စူာ်ဝံာ်သၣ် (Orange) အမုၢ်သ့ၣ်တဖၣ် ဖဲ အၤဖြံၤကၤ-ကလံၤထံး ထံကီၢ် လၢအအိၣ်ဖျဲၣ်တ့ၢ်ဝဲ န့ၣ်လီၤ. ပှၤလၢအတမၤညီနုၢ်သ့ၣ်မုၢ်ဝၣ်ဘိတဖၣ်အဂီၢ်, ကထံၣ်ဝဲဒၣ် ဒ်တၢ်ဂ့ၢ်ကီတအိၣ်နီတမံၤဘၣ်ဆၣ်, ပှၤလၢအနၢ်ပၢၢ်တၢ်မုၢ်တၢ်ဘိတဂၤန့ၣ် ထံၣ်သ့ၣ်ညါ တၢ်အုၣ်သံကျၣ်သံ, လၢအကမၤသံ တၢ်မုၢ်တၢ်ဘိ ကယီကယီန့ၣ်လီၤ. တၢ်ကမၤဂ့ၤထီၣ် သ့ၣ်လၢတၢ်ဆါလီၤဘၣ်အီၤအဂီၢ်န့ၣ်, ကျဲအိၣ်ထဲတဘိဧိၤ, ဒီးမ့ၢ်ဝဲ တၢ်ပဲာ်ကျီကွံာ် သ့ၣ်အမုၢ်, ဒီးအဒ့တဖၣ် တုၤဒၣ်လဲာ်အဂံၢ်တဖၣ်, ဒီးတၢ်ကဘၣ်သုးကွံာ် သူၣ်လီၤအီၤလၢ သ့ၣ်အမုၢ်အသီအလိၤန့ၣ်လီၤ. ဝံၤန့ၣ်ဒီး, သ့ၣ်အမုၢ်န့ၣ် ကမူဝဲဒၣ်, ဒီးကဟ့ၣ်ထီၣ် အတၤသၣ်န့ၣ်လီၤ.
အတၢ်ဒုးနဲၣ်အံၤ မၢၤရ့ မၤဘၣ်ထွဲဝဲဒီး စီၤပီလူး အတၢ်ကွဲးဆူ ပှၤအ့းဖ့းစူးဖိတဖၣ်အဂီၢ်န့ၣ်လီၤ. လၢ ဝ့ၢ်ရိမ့ၤ အဃိာ်ပူၤန့ၣ်, လံာ်ပရၢတဘ့ၣ် လၢအပာ်ဖျါထီၣ် ကစၢ်ယ့ၣ်ရှူးခရံာ်အတၢ်သးခုကစီၣ်အဂ့ၢ်န့ၣ်, စီၤပီလူး ကွဲးတ့ၢ်ဝဲ အတၢ်ကွဲးဖုၣ်ကိာ် လၢတၢ်ကမၢကမၣ်အပူၤန့ၣ်လီၤ. အ့းဖ့း ၃:၁၆-၁၇ ပာ်ဖျါဝဲဒၣ် စီၤပီလူး အသးလၢအအဲၣ်အံးထွဲကွၢ်ထွဲတၢ်န့ၣ်ကဲၤကပီၤထီၣ် ခီဖျိအတၢ်ဃ့ထုကဖၣ် “ဒ်သိးအကဟ့ၣ်လီၤသု, လၢသုနီၢ်လၢညါကန့ၢ်ဘၣ် အဂံၢ်ဆူၣ်အဘါဆူၣ်လၢသး, ဒ်သိးခရံာ် ကအိၣ်ဝဲဆိးဝဲလၢသုသးအပူၤ
လၢတၢ်နာ်အဃိ,” ဒီးပှၤစူၢ်က့ၤနာ်က့ၤတၢ်တဖၣ် အဂံၢ်ဘါကဆူၣ်ထီၣ်လၢ တၢ်စိတၢ်ကမီၤကသ့ဝဲအဂီၢ်န့ၣ်လီၤ. အဆၢဖိ ၁၇-၁၈ န့ၣ် ပှၤအ့းဖ့းစူးဖိတဖၣ်အဂီၢ် စီၤပီလူး အဲၣ်ဒိးဝဲန့ၣ် “ဒ်သိးသုဂံၢ်စဲၤလီၤ, ဒီးသုခီၣ်ထံးပာ်ကျၢၤအသးလၢ တၢ်အဲၣ်တၢ်ကွံအပူၤ,” ဒီးကစၢ်ယွၤအတၢ်အဲၣ် လၢအပှဲၤလုၣ်ကွံာ်တဖၣ်န့ၣ် ကနၢ်ပၢၢ်အါထီၣ် လၢလၢပှဲၤပှဲၤန့ၣ်လီၤ.
ဒ်ပမ့ၢ်ပှၤစူၢ်နာ် ကစၢ်ယ့ၣ်ရှူးတဖၣ်အသိး, ပဂံၢ်တဖၣ်စဲၤလီၤအသးယိာ်ယိာ်လၢ ယွၤအတၢ်အဲၣ်, ဟီၣ်ခိၣ်ညၣ်ထ့ၣ်လၢအဂ့ၤ, တၢ်အီၣ်ဂံၢ်သဟီၣ်အလီၢ် လၢအပာ်ဂၢၢ်ကျၢၤပှၤ, ဒီးမၤစၢၤပှၤလၢပကဒိၣ်ထီၣ်အဂီၢ်န့ၣ်လီၤ. မ့ၢ်လၢတၢ်သူၣ်ထီၣ်က့ၤပှၤလၢကစၢ်ယ့ၣ်ရှူးအလိၤအဃိ, ဒ်သိးပကဟ့ၣ်ထီၣ်တၤသၣ်အဂီၢ် အသးစီဆှံကမၤစၢၤပှၤန့ၣ်လီၤ. ကလံၤမုၢ်တွၤလၢအမၤဒံဝ့ၤဒံဝီၤပှၤတဖၣ်ကအိၣ်သ့ၣ်သ့ၣ်ဘၣ်ဆၣ်, ဖဲလၢပဂံၢ်တဖၣ် မ့ၢ်အိၣ်ဂၢၢ်ကျၢၤလၢ တၢ်မူ, ဒီးတၢ်အဲၣ်အဂံၢ်ထံးန့ၣ်ဒီး, ပတူၢ်ဆၢခီၣ်ဆၢကန့ၢ်ဝဲဒၣ်န့ၣ်လီၤ.
