လၢတီၤထီကၠိ အတၢ်လိာ်ကွဲပြၢတၢ်တဖၣ်အကျါ တၢ်လိာ်ကွဲအိၣ်ဝဲအသီတထံၣ်, ဒီးတၢ်လိာ်ကွဲလၢပထံၣ်တ့ၢ်လံတဖၣ်အကျါ တၢ်လိာ်ကွဲအသီအံၤ မ့ၢ်တၢ်လၢအဟ့ၣ်သဆၣ်ထီၣ် ပနီၢ်သးအဂ့ၢ်အဘါအဒိၣ်ကတၢၢ်န့ၣ်လီၤ.
ဒ်တၢ်လိာ်ကွဲတဖၣ် ကြၢးအိၣ်ဝဲဒၣ်အသိး, တၢ်လိာ်ကွဲအသီအံၤ အိၣ်ဒီးက့ၢ်ဂီၤတဖၣ်, လၢအမ့ၢ်, ကမျၢၢ်ပှၤဟ့ၣ်ဂံၢ်ဟ့ၣ်ဘါတၢ်တဖၣ်, ပှၤစံၣ်ညီၣ်ကွီၢ်တဖၣ်, ဒီးတၢ်ပာ်ဖျါထီၣ်တၢ်အဖီးဘ့ၣ်ဘၣ် (scoreboard) န့ၣ်လီၤ. ဘၣ်ဆၣ်, တၢ်အကါဒိၣ်လီၤဆီတမံၤလၢ အမၤတရံးပမဲာ်အိၣ်ဝဲဒၣ်န့ၣ်လီၤ. လၢတၢ်လိာ်ကွဲပျီပူၤန့ၣ် ပှၤလိာ်ကွဲတၢ်ဖိ တဖုန့ၣ် အိၣ်ဝဲဒၣ် ယဲၢ်ဂၤစူၢ်စူၢ်, ပှၤအနီၢ်ခိက့ၢ်ဂီၤဂ့ၤခံဂၤ, ဒီးပှၤအနီၢ်ခိက့ၢ်ဂီၤ တလၢပှဲၤတမံၤမံၤ ကဘၣ်အိၣ်ဝဲ သၢဂၤန့ၣ်လီၤ. ပှၤလိာ်ကွဲတၢ်ဖိ တဖုဂ့ၤတဖုဂ့ၤ, ဒ်ပှၤလိာ်ကွဲတၢ်ဖိကဒဲကဒဲ မၤစၢၤလိာ်အသး, ဟ့ၣ်ဂံၢ်ဟ့ၣ်ဘါလိာ်အသး, ဆၢဂ့ၤဆၢဝါလိာ်သး လၢတၢ်လိာ်ကွဲပျီပူၤ တၢ်ဟူးတၢ်ဂဲၤတဖၣ်န့ၣ် ဒုးအိၣ်ထီၣ်တၢ်သူၣ်ဟူးသးဂဲၤန့ၣ်လီၤ. တၢ်လိာ်ကွဲအံၤ မ့ၢ်တၢ်ဟ့ၣ်သဆၣ်ထီၣ်ကၠိဖိတဖၣ်အသး, ကၠိဖိတဖၣ်လၢအတလဲၤခီဖျိကလၢၢ်ဘၣ် တၢ်သူၣ်ဖှံသးညီ ဘၣ်ထွဲဒီးတၢ်လိာ်ကွဲပြၢတၢ်တဖၣ်အဂီၢ်န့ၣ်လီၤ.
တၢ်ကမၤလၤကပီၤ ကၠိဖိတဖၣ် ခီဖျိလၢကျိၤကျဲၤဒ်သိးအံၤအဂီၢ်, ကၠိတဖၣ်န့ၣ် လိၣ်ဘၣ်ဝဲ တၢ်ကဲခိၣ်ကဲနၢ် ထံၣ်ဆိကမိၣ်တၢ်လၢ တၢ်ကူၣ်သ့န့ၣ်လီၤ. ဒီးခိၣ်နၢ်ဒ်သိးအံၤတဖၣ် အတၢ်ထဲးဂံၢ်ထဲးဘါန့ၣ် ကဆဲးကပီၤဖျါထီၣ်က့ၤ လံာ်စီဆှံအပူၤ တၢ်အဒိအတဲာ်, ဘၣ်တၢ်ပာ်လီၤန့ၢ်ပှၤလၢ စီၤပၤ စီၤဒၤဝံးန့ၣ်လီၤ.
၂ ရှမူၤ ၅:၈ အပူၤန့ၣ်, ပကထံၣ်ဘၣ် ဖဲလၢ စီၤဒၤဝံး အမုၢ်နံၤတဖၣ်န့ၣ် ညီနုၢ် တၢ်စံးကတိၤဟ့ၣ်ဒိ အဒုၣ်အဒါတဖၣ်န့ၣ် မ့ၢ်ဝဲလၢ “ပှၤမဲာ်ဘျီၣ်ဒီးပှၤအခီၣ်ဟးဂီၤ တဘၣ်ဟဲနုာ်လၢဟံၣ်ပူၤဘၣ်” န့ၣ်လီၤ. ဘၣ်ဆၣ်, ၂ ရှမူၤ ၉:၇ ပာ်ဖျါဝဲဒၣ် စီၤဒၤဝံး ဃုထၢဝဲဒၣ် စီၤယိၤနၤသၣ် အဖိခွါ စီၤမဖံဘိရှး, လၢအခီၣ်ဟးဂီၤခံခီလိာ်န့ၣ်ဆူအနီပူၤ, ဒီးဟ့ၣ်မၤလၤကပီၤအီၤတၢ်လီၢ်, ဒ်သိး “ကအီၣ်တၢ်အီတၢ်လၢ အစီၤနီၤခိၣ်” န့ၣ်လီၤ.
ပကဘၣ်ရ့လိာ်သးဒီးပှၤဂၤဒ်လဲၣ်န့ၣ် စီၤပီလူး ပာ်ဖျါဝဲ တၢ်နဲၣ်ကျဲဆှဲဆှဲဖိ, ဖဲ ရိမ့ၤ ၁၂:၁၀ အပူၤ, ဒီးစံးဝဲ “ဒီပုၢ်ဝဲၢ်အဲၣ်လိာ်ကွံလိာ်အသးန့ၣ်, အဲၣ်လိာ်ကွံလိာ်သုသး ဒ်ဒီပုၢ်ဝဲၢ်တံၢ်တံၢ်အသိးန့ၣ်တက့ၢ်. လၢတၢ်ယူးယီၣ်န့ၣ်, လဲၤလၢညါလိာ်သုသးတက့ၢ်” န့ၣ်လီၤ.
မ်ပကအိၣ်မူ မၤလိသကိးတၢ်အိၣ်မူဃူဃူဖိးဖိး- လၢကစၢ်ယ့ၣ်ရှူး အတၢ်အဲၣ်အပူၤန့ၣ်, ပကမၤလီၤတံၢ် တၢ်မၤလၤကပီၤ, ကယဲၢ်ပှၤလၢ ပရ့လိာ်ဘၣ်ထွဲလိာ်သး တဖၣ်ကိးဂၤဒဲးန့ၣ်တက့ၢ်.
