သၣ်မံယီၤလၢ အဟးဖျိးကျဲတဒုန့ၣ် မၤသီၣ်ထီၣ် အကလုၢ်ဖိလၢ အလီၤသးကညီၤအဃိ, ယအိၣ်ကတီၢ်လၢယတၢ်လဲၤန့ၣ်လီၤ. ယလဲၤဟးခီဂာ် တၢ်အီၣ်အပူၣ် တပူၣ်ပူၤယူၢ်, တၢ်အီၣ်လၢ ပှၤတဂၤဂၤ ဆူးကွံာ်တ့ၢ်ဝဲလၢ ဟီၣ်ခိၣ်လိၤန့ၣ်လီၤ. ယဆိကမိၣ်ထီၣ်ယဲလၢ ကစၢ်ယွၤ ကတဲာ်ကတီၤန့ၢ် တၢ်အီၣ်လၢ သၣ်မံယီၤ သၣ်ဝံၤလီၤဒိတဒုအဂီၢ်န့ၣ်လီၤ. တၢ်အီၣ်န့ၣ် အိၣ်တဒၢအသးလၢ ကျဲအကပၤတၢၣ်တဖျၢၣ်အလီၢ်ခံအဃိ, ယကျဲးစၢးထုးန့ၢ်သၣ်မံၤယီၤဃဲၤသံကျိသံတဒုအံၤဆူ တၢ်အီၣ်အိၣ်အလီၢ်န့ၣ်လီၤ. သၣ်မံယီၤဖိန့ၣ် ဟဲလူၤပိာ်ထွဲယခံလၢ တၢ်နာ်န့ၢ်ယၤအပူၤ, ဝံၤအိၣ်ကတီၢ်ဝဲ, ဒီးတဟဲပိာ်ယခံဆူညါ လၢၤဘၣ်. ယအဲၣ်ဒိးသံကွၢ်မးလၢ “ဘၣ်မနုၤအဃိ, နတနာ်ယတၢ်ဆှၢနၤလဲၣ်. တၢ်အီၣ်တဖၣ်အိၣ်ခိးပာ်လၢနဂီၢ်” န့ၣ်လီၤ.
ဝံၤန့ၣ်ဒီး, ယနၢ်ပၢၢ်က့ၤယဲလၢ ယစံးဆၢမၤဆၢတၢ်တမံၤဃီ, ဒ်ယတၢ်ရ့လိာ်ဘၣ်ထွဲဒီးကစၢ်ယွၤအသိး တမ့ၢ်ဘၣ်ဧါ. ယသးပူၤန့ၣ် အိၣ်ဒီးတၢ်ဆိကမိၣ်လၢ “ယွၤဧၢ, ယနာ်သန့ၤယဲနၤဘၣ်ဆၣ်, ယဆိကမိၣ် နတၢ်နဲၣ်ကျဲတဖၣ်န့ၣ် ယပာ်ဂံၢ်ပာ်ဘျါအီၤတသ့ဘၣ်- ယွၤအတၢ်ကတဲာ်ကတီၤမၤလၢပှဲၤတၢ်တဖၣ် ကအိၣ်ခိးပာ်ဝဲ ဖဲအလီၢ်ဘၣ်အကျဲဘၣ်လီၤန့ၣ်, ယတသ့ၣ်ညါဘၣ်အဃိ, မ့ၢ်ယစံးဆၢမၤဆၢဘၣ် ကစၢ်ယွၤအတၢ်နဲၣ်ဆှၢယၤန့ၣ် ကအိၣ်ဝဲဒၣ်ထဲလဲၣ်”
မ့ၢ်လၢကစၢ်ယွၤအဲၣ်ပှၤ, ဒီးအသးပူၤန့ၣ်အိၣ်ဒီးပတၢ်သးဆၢမိၣ်န့ၢ်အဂ့ၤကတၢၢ်တဖၣ်အဃိ, ယွၤအကျဲတဖၣ်န့ၣ် ပနာ်သန့ၤအီၤသ့ဝဲဒၣ်န့ၣ်လီၤ. စံး ၃၂:၈-၉ အပူၤန့ၣ် ယွၤစံးဘၣ်ပှၤ, “ယကသိၣ်က့ၤသီက့ၤနၤ, ဒီးဒုးနဲၣ်နၤလၢ ကျဲလၢနဘၣ်လဲၤန့ၣ်လီၤ. ယကဟ့ၣ်ကူၣ်နၤ လၢယမဲာ်” န့ၣ်လီၤ. ဘၣ်ဆၣ်, အဆၢဖိ ၉ ပာ်ဖျါဝဲလၢ ယွၤတသုးကျဲၤပှၤ ဒ်ဆၣ်ဖိကီၢ်ဖိလၢ အလိၣ်ဘၣ်တၢ်နဲၣ်ဆှၢအီၤအသိးဘၣ်. ကစၢ်ယွၤအသးအိၣ်ဝဲလၢ ပကလူၤပိာ်အခံ, လၢတၢ်သူၣ်အိၣ်သးအိၣ်အပူၤ, ဒီးပမ့ၢ်အိၣ်မူပိာ်ထွဲ ယွၤအကျဲန့ၣ်ဒီး, အဝဲအၢၣ်လီၤ ပှၤလၢ ကအိၣ်ဒီးပှၤလီၤစိၤလီၤထီ, ဒ်အဆၢဖိ ၁၀ ပာ်ဖျါဝဲ, “မ့မ့ၢ်ပှၤလၢ အသန့ၤအသးလၢ ယွၤန့ၣ် တၢ်ဘျုးတၢ်ဖှိၣ် ကအိၣ်ဝးတရံးအီၤ” အသိးန့ၣ်လီၤ. တၢ်လၢအလိၣ်ပကဘၣ်မၤတဖၣ်န့ၣ် မ့ၢ်ဒၣ်ပကပိာ်အခံဆူညါကွ့ၢ်ကွ့ၢ်, ပကအိၣ်ဒီးတၢ်သ့ၣ်ညါလၢ ကစၢ်ယွၤအိၣ်ဒီးပှၤ လၢပတၢ်လဲၤကျဲတဖၣ်, လၢပခီၣ်ခါကိးကါဒဲးအပူၤန့ၣ်လီၤ.
