တၢ်ဂိၢ်ထီၣ်သီကိးနံၣ်ဒဲးန့ၣ်, “ရဲး(က)ဝံး” (ragweed-နီၣ်တပံၢ်တကလုာ်) မဲထီၣ်ဝဲလၢ ကျဲကပိာ်ကပၤတဖၣ်န့ၣ်, မၤကီမၤခဲ ယဖိခွါအတၢ်သါထီၣ်သါလီၤကလံၤကျိၤတဖၣ်
န့ၣ်လီၤ. ဘၣ်တနံၤန့ၣ်, တၢ်ဆါအပနီၣ် ဟဲဖျါထီၣ်ဝဲ နးနးကျံၤကျံၤအဃိ, ယဆိကမိၣ်အလီၢ်အိၣ်လၢ ကဘၣ်ဒုးနဲၣ်အီၤဒီးကသံၣ်သရၣ်န့ၣ်လီၤ. တဘျုးလါအတီၢ်ပူၤန့ၣ်, ပဟံၣ်ဖိဃီဖိတဖၣ် ပလဲၤခီဖျိဘၣ် တၢ်အိၣ်ဆူၣ်အိၣ်ချ့ အတၢ်ဂ့ၢ်ကီနးနးကျံၤကျံၤ, ဒီးဖဲပတၢ်အိၣ်ဆူၣ်အိၣ်ချ့ဂ့ၤထီၣ်က့ၤသီသီအကတီၢ်အဃိ, ယကဃ့ထုကဖၣ်တၢ်အဂီၢ်ဒၣ်လဲာ် ယသးဟးဂီၤယဲဒၣ်န့ၣ်လီၤ. ဘၣ်ဆၣ်, ခီဖျိတၢ်ခဲလၢာ်လၢကစၢ်ယွၤ မၤစၢၤတ့ၢ်ဝဲလၢပဂီၢ်တဖၣ်အပူၤ, ယဝၤသးဘိ ဃုထံၣ်န့ၢ်ဝဲ တၢ်မုၢ်လၢ်န့ၣ်လီၤ. လၢတၢ်နဲၣ်ကျဲအဂီၢ်, ဃ့ထုကဖၣ်ဝဲလၢကစၢ်ယွၤန့ၣ်လီၤ. တယံာ်ဘၣ်န့ၣ်, ခီဖျိလၢကသံၣ်ကသီတဖၣ် အတၢ်မၤစၢၤအဃိ, ပဖိခွါ အတၢ်အိၣ်ဆူၣ်အိၣ်ချ့ ဂ့ၤထီၣ်က့ၤဝဲဒၣ်န့ၣ်လီၤ.

၄ မိၤ ၁၄:၆-၉ န့ၣ် ဖဲပှၤလဲၤကွၢ်ဟုၣ်ကွၢ်စုာ် ကီၢ်ကနၤဧၣ် ထံလီၢ်ကီၢ်ပူၤ ဝံၤအလီၢ်ခံ, ပှၤလဲၤကွၢ်ဟုၣ်ကွၢ်စုာ်တၢ်အကျါ တနီၤန့ၣ် အသူၣ်ဟးဂီၤသးဟးဂီၤဝဲဘၣ်ဆၣ်, စီၤကၤလ့းဒီးစီၤယိၤရှူ ခံဂၤန့ၣ် ဒုးနဲၣ်ဖျါထီၣ် တၢ်မုၢ်လၢ်, ဒီးတၢ်ထံၣ်လၢအဂ့ၤတကပၤန့ၣ်လီၤ. ဟီၣ်ခိၣ်လီၢ်ကဝီၤအံၤ ကစၢ်ယွၤ အၢၣ်လီၤအီလီၤတ့ၢ်ဝဲလၢ ပှၤအံၣ်စရ့လးဖိအဂီၢ်အဃိ, ၄ မိၤ ၁၃:၃၀ အပူၤန့ၣ် စီၤကၤလ့းစံးဝဲဒၣ်လၢ, “မ်ပလဲၤထီၣ်တဘျီဃီဒီးမၤန့ၢ်အီၤတက့ၢ်, အဂ့ၢ်ဒ်အံၤ, ပမၤနၢၤမၤဃၣ်အီၤသ့ကစီဒီလီၤ” န့ၣ်လီၤ. အဆၢဖိ ၂၈,၃၁-၃၃ ပာ်ဖျါဝဲ ပှၤဂုၤပှၤဂၤတဖၣ် အတၢ်ထံၣ်, “မ့ၢ်လၢပှၤကနၤဧၣ်ဖိတဖၣ် အဂံၢ်ဆူၣ်အဘါဆူၣ်, ဒီးအဝ့ၢ်တဖၣ်စ့ၢ်ကီး အိၣ်ဒီးအခိၣ်ဒူဒိၣ်မးအဃိ, ပလဲၤထီဒါပှၤဂီၢ်မုၢ်န့ၣ်တသ့ဘၣ်” န့ၣ်လီၤ.

တၢ်ဂ့ၢ်တဖၣ်အံၤ မ့ၢ်တၢ်ဂ့ၢ်ကီနးနးကျံၤကျံၤ လၢအတၤယွၤအပှၤဂီၢ်မုၢ်ဘၣ်ဆၣ်, စီၤကၤလ့းအတၢ်နာ်န့ၣ် အိၣ်သူၣ်လီၤအသးလၢ အပူၤကွံာ်ကစၢ်ယွၤအတၢ်တီတၢ်လိၤ, ဖဲလၢ အပှၤဂီၢ်မုၢ်တဖၣ် ဘၣ်ဂုာ်ဂဲၤလိာ်တၢ်အကတီၢ်န့ၣ်လီၤ. အကတၢၢ်န့ၣ် ယွၤအပှၤဂီၢ်မုၢ်တဖၣ် ဒုးန့ၢ်မၤနၢၤ ကီၢ်ကနၤဧၣ်, ဒီး ယိၤရှူ ၁၄:၉ ပာ်ဖျါဝဲဒၣ် မ့ၢ်လၢ စီၤကၤလ့း “ပိာ်ယွၤ အကျဲလၢလၢပှဲၤပှဲၤ” အဃိ, ဒိးန့ၢ်ဝဲဒၣ် အတၢ်န့ၢ်သါ, လၢအကြၢးဒီးအီၤန့ၣ်လီၤ.

တၢ်အိၣ်သးမၤအသးတဖၣ်အါမးန့ၣ် ပသးကကလၢၢ်ဘၣ်ဝဲ ဒ်တၢ်မုၢ်လၢ်တအိၣ်လၢပဂီၢ်အသိးဘၣ်ဆၣ်, ပှၤလၢအသ့ၣ်ညါယွၤ, ဒီးနာ်ယွၤအတၢ်တီတၢ်လိၤတဖၣ်အဂီၢ်, ဖဲလၢပနာ်သန့ၤယွၤအစိကမီၤ, ဒီးအဘျုးအဖှိၣ်န့ၣ်ဒီး, ကမ့ၢ်ဝဲတၢ်ဂ့ၢ်တၢ်ကျိၤတမံၤလၢ အကဒုးအိၣ်ထီၣ် တၢ်မုၢ်လၢ်ထီဘိ, လၢအကစိာ်ဆှၢခီပှၤအဂီၢ်န့ၣ်လီၤ.