ဖဲကၠိစံၣ် (Josie) အပၢ်သးပှၢ် လၢအဆါဆိးက့တဂၤ ဟဲအိၣ်ဆိးဒီးအီၤအကတီၢ်န့ၣ်, အသးဘၣ်ကိၢ်ဘၣ်ဂီၤဝဲလၢ တနံၤဘၣ်တနံၤ တၢ်အံးထွဲကွၢ်ထွဲပၢ် အတၢ်လိၣ်တဖၣ် န့ၣ်လီၤ. ကသံၣ်ကသီလၢကဘၣ်ပှ့ၤဝဲတဖၣ်န့ၣ် အပှ့ၤဒိၣ်မးန့ၣ်လီၤ. အတၢ်ဖံးတၢ်မၤလၢ ကဘၣ်မၤဝဲလၢာ်ဆၢလၢာ်ကတီၢ်, တကးဒ်ဘၣ်န့ၣ်, တၢ်အံးထွဲကွၢ်ထွဲမူဒါ, ဒီးလိၣ်ဘၣ် တၢ်ကူၣ်သ့လၢ ကနဲၣ်ဆှၢ အတၢ်ဆၢတဲာ် ဘၣ်ဃးဒီးအပၢ်အတၢ်ဆါလၢ အနးဒိၣ်ထီၣ်အံၤန့ၣ် မၤလီၤဘှံးလီၤတီၤအီၤန့ၣ်လီၤ. ကၠိစံၣ် စံးဝဲလၢ “ထီဘိန့ၣ် ယကပာ်ဖှိၣ်ထုးထီၣ် ယဂံၢ်ဘါ, စုလီၢ်ခီၣ်ခိၣ်ဂံၢ်ခီၣ်ထံးနီၢ်နီၢ်, တၢ်ကူၣ်သ့, ဒီးတၢ်အဲၣ်တဖၣ်ကသ့ဝဲဒၣ်ဒ်လဲၣ်” န့ၣ်လီၤ.

ကၠိစံၣ် ဃုထံၣ်န့ၢ် တၢ်မုၢ်လၢ်လၢ လံာ်သးသယုၢ်တၢ်အပူၤ, လံာ်တဘ့ၣ်လၢ အကွဲးပာ်ဖျါထီၣ် ဝံယံးရမံယၤ, ဒီးယွၤအပှၤဂီၢ်မုၢ်တဖၣ် တူၢ်ဘၣ်ခီၣ်ဘၣ် တၢ်သူၣ်အုးသးအုးအဂ့ၢ်န့ၣ်လီၤ. ပှၤဘၤဘူၤလိၣ်ဖိတဖၣ် မၤဟးဂီၤဝဲဒၣ် ဝ့ၢ်ယရူၤရှလ့ၣ်, ဒီးခဲကနံၣ်အံၤ, ဖဲမုၢ်နံၤလၢအကဟဲတဖၣ်န့ၣ် ပှၤယူဒၤဖိတဖၣ် ဘၣ်ကွၢ်ဆၢၣ်မဲာ်ဒီးတၢ်စိာ်မၢကဲကုၢ် န့ၣ်လီၤ. တၢ်နးတၢ်ဖှီၣ်တဖၣ် နးဒိၣ်မးဘၣ်ဆၣ်, သးသယုၢ် ၃:၂၂ အပူၤန့ၣ် ကစၢ်ယွၤ အၢၣ်လီၤဝဲလၢ “မ့ၢ်ယွၤအဘျုးအဖှိၣ်, မ့ၢ်အသးတတူာ်ဘၣ်သတးဒီး, ပတတုၤဘၣ်လၢ တၢ်ဟးဂူာ်ဟးဂီၤဘၣ်” န့ၣ်လီၤ. ဒ်အဆၢဖိ ၂၂ ပာ်ဖျါဝဲအသိး, “မ့ၢ်လၢယွၤအသးတတူာ်ဘၣ်သတးအဃိ,” အပှၤဂီၢ်မုၢ်တဖၣ် မ့ၢ်တအိၣ်ဆိးဝဲလၢ ကီၢ်တၢ်စံးပာ်အပူၤလၢၤဘၣ်ဒၣ်လဲာ်, ယွၤအတၢ်အဲၣ်လၢ အၢၣ်လီၤအီလီၤပာ်ဝဲန့ၣ် ကအိၣ်ဂၢၢ်ဆိးကျၢၤဒီးအပှၤဂီၢ်မုၢ်တဖၣ်န့ၣ်လီၤ.

ယွၤအတၢ်အဲၣ် လၢအဖိတဖၣ်အဂီၢ်န့ၣ် တၢ်အဒူၣ်အဆၢတအိၣ်ဘၣ်. ကၠိစံၣ် သ့ၣ်ညါနၢ်ပၢၢ်ဝဲလၢ “ယွၤမ့ၢ်ယဂီၢ်လီၤ, ကယဲၢ်ဂံၢ်ခီၣ်ထံးလၢ ယမၤန့ၢ်သ့တဖၣ်” ဒ်အဆၢဖိ ၂၄ ပာ်ဖျါထီၣ်ဝဲအသိးန့ၣ်လီၤ. “မ့ၢ်လၢယဒိးန့ၢ်ယဂံၢ်ဘါ လၢကစၢ်ယွၤအအိၣ်, ယွၤတဂၤလၢအသးတတူာ်ဘၣ်ပှၤနီတဘျီအဃိ, တနံၤဘၣ်တနံၤ တၢ်လၢအလိၣ်တဖၣ်အဂီၢ်န့ၣ်, ယပာ်ဖှိၣ်ထီၣ်, ဒီးဟ့ၣ်ထီၣ်သ့ဝဲဒၣ်” န့ၣ်လီၤ.

ဖဲပအိၣ်မူအိၣ်ဂဲၤလၢ တၢ်စူၢ်ဒိကနၣ်ယွၤကလုၢ်န့ၣ်ဒီး, ခါဆူညါ ကယဲၢ်တၢ်မၤအသးတမံၤဂ့ၤတမံၤဂ့ၤန့ၣ် ပဒိးန့ၢ် တၢ်မုၢ်လၢ်သ့ဝဲဒၣ်န့ၣ်လီၤ. ခီဖျိလၢယွၤအတၢ်ကူၣ်သ့ အလၢအပှဲၤအပူၤ, ကစၢ်ယွၤ ထံၣ်တၢ်အဂ့ၤကတၢၢ် လၢပဂီၢ်အဃိ, တၢ်လၢပလိၣ်ဘၣ် တဖၣ်န့ၣ် သ့ၣ်ညါဝဲဒၣ်, ဒီးကဟ့ၣ်လီၤပှၤန့ၣ်လီၤ.