ပှၤနီၣ်ကၠိအသိလ့ၣ်တဂၤ တသ့ၣ်နီၣ်သးလၢ သိလ့ၣ်အပၣ်ကၢၤအလိၤ, ဒီးအသိလ့ၣ် ဖးဒိၣ်အိၣ်ပှဲၤဒီး ပှၤမၤလိဖိ အဂၤဃုဆံန့ၣ် လဲၤဒ့ခံၣ်ဒ့ခ့, ပၢၤက့ၤဝဲတန့ၢ်လၢၤဘၣ်လီၤ.
ပှၤနွံတီၤဖိ (Dillon Reeves) ဟးထီၣ်တကီၢ်ခါလၢ အလီၢ်ဆ့ၣ်နီၤ, ဃ့ၢ်သဖှိဆူ သိလ့ၣ်အမဲာ်ညါတကပၤ, ဒီးယီၣ်လီၤ နီၣ်ပတုာ် (brake) တချုးတၢ်ဘၣ်ဒိမၤသးယူၢ်ဖိ အဆၢကတီၢ်န့ၣ်လီၤ. ဖဲပှၤမၤလိတၢ်ဖိအါဂၤအတၢ်မၤအါလၢ ကွဲးလံာ်ဆှၢလံာ် (မ့) လိာ်ကွဲလၢ ကွဲၤဒီနၢ်အခါန့ၣ်, Dillon – ပှၤလၢ အကွဲၤဒီနၢ်တအိၣ်တဂၤ _ မ့ၢ်အထံၣ်စိတၢ်ချုးအဃိ ဒီးမၤဆၢတၢ်န့ၣ်လီၤ. အဝဲသ့ၣ်ညါလၢ ကဘၣ်ယီၣ်လီၤ နီၣ်ပတုာ် ကယီၤကယီၤ မ့ၢ်လၢ ထံၣ်ဘၣ်ပှၤနီသိလ့ၣ် မၤတၢ်ဒ်သိးအံၤ အါဘျီလံအဃိလီၤ.

တၢ်အိၣ်ဒီးသူၣ်နီၣ်သးနီၣ်လၢခိ ဒီးတမ့ၢ်ဘၣ် သးလၢအတံာ်တာ်တၢ်မၤအါဘၣ်န့ၣ် မၤစၢၤ Dillon ဒ်သိး ကမၤပူၤဖျဲး ပှၤအိၣ်လၢသိလ့ၣ်ပူၤခဲလၢာ်အသးသမူလီၤ. ပၣ်ဃုာ်လၢ ပှၤနီသိလ့ၣ် လၢအဂ့ၤထီၣ်က့ၤတဂၤလီၤ.

စီၤယိၤရှူ ကဘၣ်ဟံးန့ၢ်တၢ်လီၢ်လၢ အခိၣ်အနၢ် စီၤမိၤရှ့အလီၢ်, ခိၣ်နၢ်လၢ တအိၣ်လၢၤလၢပှၤဆှၢတၢ်အလီၢ်, ကဘၣ်ဆှၢ ပှၤအံၣ်စရ့လးဖိတဖၣ်လီၤ. ကစၢ်ယွၤ စံးဘၣ်အီၤ “ယခ့ယပှၤ စီၤမိၤရှ့ သံလံဝဲလံ, ဒီးခဲကနံၣ်အံၤ ဂဲၤဆၢထၢၣ်, လဲၤခီဂာ် ယၢ်ဒ့ၣ်အံၤ…” န့ၣ်လီၤ(ယိၤရှူ ၁:၂). တၢ်လၢအတဲအါထီၣ်ဝဲန့ၣ်, “ထဲပာ်ဆူၣ်နသးဒီးတံးတဟီၣ်
တက့ၢ်. ဒ်သိးနကပလီၢ်နသး ဒီးမၤတၢ်ဒ်ကယဲၢ် တၢ်သိၣ်တၢ်သီလၢ ယခ့ယပှၤ စီၤမိၤရှ့ မၤလိာ်နၤန့ၣ်တက့ၢ်. စုထွဲမ့ၢ်ဂ့ၤ စုစ့ၣ်မ့ၢ်ဂ့ၤ ဃၣ်ကပၤလၢအီၤတဂ့ၤ” (:၇). ကစၢ်ယွၤ
စံးဘၣ် စီၤယိၤရှူလၢ မ်အသုတမၤတံာ်တာ် အသးဘၣ်, ဒီးအသးကဘၣ်စၢၢ်ဆၢ, ဒီးကပာ်အမဲာ်ချံတဖၣ်လၢ တၢ်နဲၣ်ကျဲ လၢယွၤဟ့ၣ်ဃာ်အီၤတဖၣ်အလိၤ – ကဘၣ်ဆိကမိၣ်လၢအပူၤ လၢ “မုၢ်ဆါဒီးလၢမုၢ်နၤ”လီၤ (:၈).

ပဘၣ်တၢ်မၤတံာ်တာ် ပခိၣ်နူၢ်လၢ တၢ်ကွၢ်ကွဲၤဒီနၢ် ကွဲၤထံၣ်ဟူတဖၣ်ဒီး တၢ်ဂုၤတၢ်ဂၤ လၢအထုးလီၤဖးကွံာ်ပမဲာ် လၢယွၤအအိၣ်, ဒီးလၢတၢ်ကူၣ်ဘၣ်ကူၣ်သ့ အိၣ်ကွဲးအသး လၢယွၤကလုၢ်ကထါအအိၣ် သ့ဝဲလီၤ ( ၂တံၤ ၃:၁၆-၁၇). လၢတၢ်န့ၣ်အလီၢ်, ဖဲပအိၣ်ဒံးလၢ တၢ်နီၣ်သူၣ်နီၣ်သးလၢခိ “ခီဖျိ ပကွၢ်ဃီၤတၢ်ဆူ ယ့ၣ်ရှူးအအိၣ်” (ဧ့ၤဘြံၤ ၁၂:၂)န့ၣ်, ပဆၢထၢၣ်သတူၢ်ကလာ်ဒီး မၤတၢ်ချ့ချ့ ကန့ၢ်ဝဲ ဖဲကစၢ်ယွၤကိးပှၤ အဆၢကတီၢ်န့ၣ်လီၤ.