ပဝဲလွံၢ်ဂၤ ပဟးလၢခီၣ် ဒီးလဲၤတၢ်ဖဲ Watkins Glen Gorge လၢအအိၣ်ဖဲဝ့ၢ် New York လီၤ. တဘျီတခီၣ် ပအိၣ်ကတီၢ်ဒီးကွၢ်စူၣ်သကိး ထံလီၤဆှူတဖၣ်ဒီး လ့ဖးထီ အိၣ်ထီၣ်ထီ ပ့ၣ်ခံကယၤန့ၣ် လၢတၢ်ဆိကမိၣ်ဒိၣ်ဒီး တၢ်ပးကဲအပူၤလီၤ. တဘျီတခီၣ်, ပဘၣ်အိၣ်ကတီၢ် ဒ်သိးပကသါကလံၤဒီး ပာ်အိၣ်ဘှံးပခီၣ်တဖၣ် မ့ၢ်လၢပထီၣ်လၢၢ်လ့ ဘၣ်စီၣ်ဘၣ်သ့ ဒီးပဘၣ်ထွဲပခီၣ် ဖးယံာ်ဖးထၢအဃိလီၤ. ဖဲပဘူးထီၣ်လၢ ကစၢၢ်ခိၣ်စိးန့ၣ် ပှၤဟးတၢ်ဖိလၢ အဟဲက့ၤလီၤကဒါတဂၤစံးဝဲ, “သုတၢ်ထွဲ ၈၃၂ ကါအပူၤန့ၣ်
သုကဘၣ်ထီၣ်ဒံး ဆူညါအိၣ်တ့ၢ်ဒၣ် အကါ ၁၀ ဧိၤလီၤ.” တၢ်န့ၣ် ကမ့ၢ်တၢ်အဂ့ၤ ကတၢၢ်လၢ ပမ့ၢ်တသ့ၣ်ညါဆိတၢ်လဲၤအံၤ ကီထဲလဲၣ်အဂ့ၢ်လီၤ. အဂ့ၢ်ဒ်အံၤ ပမ့ၢ်သ့ၣ်ညါလၢ တၢ်လဲၤအံၤကီထဲထဲအံၤဒီး ပကဃၣ်က့ၤဆူလီၢ်ခံ ဒီးတထံၣ်ဘၣ် တၢ်လဲၤ တခါအံၤ အတၢ်ဃံတၢ်လၤသ့ၣ်တဖၣ်ဘၣ်န့ၣ်လီၤ.

သးသမူ အတၢ်လဲၤစ့ၢ်ကီး အိၣ်ဒီးခီၣ်ကါတၢ်ထွဲ လၢအကီတဖၣ်လီၤ. ကစၢ်ယ့ၣ်ရှူးဒီးစီၤပီလူး ဟ့ၣ်ပလီၢ် ပှၤစူၢ်က့ၤနာ်က့ၤတၢ်ဖိတဖၣ် ဘၣ်ဃးတၢ်ကီတၢ်ခဲဒီးတၢ်ဘၣ်မၤနးမၤဖှီၣ်တဖၣ်(ယိၤ ၁၆:၃၃, ၂ တံၤ ၃:၁၂). ဒီးတၢ်အံၤ လိၣ်ဘၣ်တၢ်ထံၣ် တနီၤလီၤ. စီၤယၤကိာ် စံးဝဲ “တုၤသုလီၤလၢ တၢ်လ့ပစီအကလုာ်ကလုာ်အပူၤဒီး ပာ်အီၤလၢ တၢ်သူၣ်ခုသးခုခဲလၢာ်တက့ၢ်” (ယၤကိာ် ၁:၂). ဘၣ်မနုၤလၢ ကဘၣ်မ့ၢ် တၢ်သူၣ်ခုသးခုခဲလၢာ်, ဒီးတဘၣ်မ့ၢ် တၢ်သးဆါန့ၣ်လဲၣ်. ကစၢ်ယွၤသ့ၣ်ညါဒီး “ပသ့ၣ်ညါလၢ တၢ်မၤကွၢ်ပှၤ ပတၢ်နာ်န့ၣ် ဒုးအိၣ်ထီၣ် တၢ်ဝံသးစူၤလီၤ”(:၃). ဘၣ်ဆၣ် တၢ်အကတၢၢ် ကမၤအသးဒ်လဲၣ်. မ့ၢ်ဒ်သိး “ပကလၢထီၣ်ပှဲၤထီၣ် ဒီးအိၣ်ဒီးတၢ်ခဲလၢာ် ဒီးတလီၤစှၤဘၣ်လၢတၢ်နီတမံၤဘၣ်န့ၣ်”လီၤ(:၄).

ပမ့ၢ်အိၣ်ကတီၢ်ဒီးကွၢ်, တၢ်ဘၣ်ဒိဆါ မ့ၢ်အိၣ်ဒၣ်ကယၢာ်, ပကထံၣ် က့ၢ်ဂီၤဃံလၤ အတၢ်ဂံၢ်တၢ်ဘါ လၢယွၤဟ့ၣ်ပာ်ပှၤ ဒီးပှၤလၢပဃၢၤတဖၣ်လီၤ. ဒီးပကမၤလိန့ၢ်တၢ်လၢ
ပကတူၢ်လိာ် တၢ်မ့ၢ်တၢ်တီ -လၢမုၢ်တနံၤ ပက“န့ၢ်ဘၣ် တၢ်မူအခိၣ်သလုးလၢ ပကစၢ်စံးပာ် လၢပှၤလၢအအဲၣ်အီၤတဖၣ်အဂီၢ်လီၤ” (:၁၂). မ်ပကထီၣ်သကိး ဆူညါဆူညါတက့ၢ်.