ပှၤလဲၣ်ခၠဲၣ်ဘိၢ်သဝီဖိ(Le Chambon, France) လၢကီၢ်ဖြ့ၣ်စ့ၣ်တဖၣ်, ညိကွံာ် တဲာ်သး အတၢ်ကိးမံၤ ဒ်သိးကမၤပူၤဖျဲး ဖိသၣ်ဆံးအဂၤယဲၢ်ကထိ, လၢအအါကတၢၢ် မ့ၢ်ပှၤအံၣ်စရ့လးဖိ, ဖဲနၣ်စံၢ် (Nazi)အတၢ်ဂုာ်ဆူၣ်ဒီး ပၢတၢ်ဆၢကတီၢ်ခါလီၤ. ပှၤဘၣ်ကီဘၣ်ခဲ လၢဃ့ၢ်ဟးထီၣ်လၢအဟံၣ်တဖၣ် ဘၣ်တၢ်ပာ်ခူသူၣ်အီၤ ဖဲ ဟံၣ်တဖၣ်ဒီး တၢ်ဘုၣ်အီၣ်ဘုၣ်အီအလီၢ်အကျဲတဖၣ် ဖဲလီၢ်ဘၢၣ်ကဝီၤအပူၤန့ၣ်လီၤ. တၢ်အိၣ်ဖှိၣ်သရၣ် အဲဒရံၣ်ထြီး(ခ)မဲ (André Trocmé) သဆၣ်ထီၣ် ပှၤဝ့ၢ်ဖိတဖၣ်အခံ ဒ်သိးကမၤစၢၤတၢ်, စံးဒိကဒါ ၅ မိၤရှ့ ၁၀:၁၉ အတၢ်ကတိၤလၢ “အဲၣ်သုဝဲ ပှၤတခီဘီမုၢ်ဖိတက့ၢ်. အဂ့ၢ်ဒ်အံၤ, သုမ့ၢ်တ့ၢ်ပှၤတခီဘီမုၢ်ဖိလၢ ကီၢ်အဲၤကူပတူးအပူၤလီၤ.”

တၢ်ကလုၢ်လၢယွၤဟ့ၣ်လီၤ ပှၤအံၣ်စရ့လးဖိတဖၣ်အဂီၢ်အံၤ စးထီၣ်ဝဲလၢ တၢ်ဒုးသ့ၣ်နီၣ်ထီၣ် ဘၣ်ဃး “ဟီၣ်ခိၣ်ဖျၢၣ်ဒီဘ့ၣ်န့ၣ် မ့ၢ်ယွၤအတၢ်, ကစၢ်ဖးဒိၣ်လၢ အအိၣ်ဒီး အစိအကမီၤ”န့ၣ်လီၤ(:၁၇). ဘၣ်ဆၣ် ကစၢ်ယွၤဃုထၢလၢ ကအဲၣ်ပှၤအံၣ်စရ့လးဖိလီၤ(:၁၅). ယွၤန့ၣ် အံးကွၢ်ဃုာ် ပှၤအဆံးလၢ အလိၣ်တၢ်မၤစၢၤတဖၣ် (မ့)ပှၤတခီဘီမုၢ်ဖိတဖၣ် (:၁၈), ပၣ်ဃုာ်လၢ ပှၤလၢအတမ့ၢ်ပှၤအံၣ်စရ့လးဖိတဖၣ်လီၤ. ဖဲပှၤအံၣ်စရ့လးတဖၣ် နုာ်လီၤအိၣ်ဆိးလၢတၢ်လီၢ်တၢ်ကျဲအသီတဖၣ်န့ၣ်, အဝဲသ့ၣ် ကဘၣ်မၤဒိ ယွၤအတၢ်အဲၣ်, ဒီးအံးကွၢ်ပှၤလၢအလိၣ်ဘၣ်တၢ်မၤစၢၤ,
လီၤဆီဒၣ်တၢ် မ့ၢ်လၢအဝဲသ့ၣ် သ့ၣ်ညါလံ တၢ်မ့ၢ်ပှၤတခီဘီမုၢ်ဖိ အတၢ်ကွၢ်ဆၢၣ်မဲာ် တၢ်အိၣ်သးကီခဲတဖၣ်အဃိလီၤ (:၁၉).

ပမ့ၢ် မၤတ့ၢ်လံတၢ် လၢတၢ်မၤတခါခါအပူၤ ဖးယံာ်မ့ၢ်ဂ့ၤ, မ့တမ့ၢ် ပအိၣ်ဆိးလၢ ဟံၣ်တဖျၢၣ်ဃီအပူၤ အါနံၣ်အါလါမ့ၢ်ဂ့ၤ, ကစၢ်ယွၤ ဘၣ်သ့ၣ်သ့ၣ် ကဟ့ၣ်ပှၤ တၢ်ခွဲးယာ် လၢ ပကဒုးနဲၣ် တၢ်သးကညီၤဆူ ပှၤတဂၤဂၤ လၢအမူဘၣ်ဝဲဒ် “ပှၤတခီဘီမုၢ်”ဖိ န့ၣ်လီၤ. အဒိ, ဘၣ်သ့ၣ်သ့ၣ် ခီဖျိ တၢ်ဟ့ၣ်တၢ်ဟ့ၣ်ကူၣ်ဆူ ပှၤမၤသကိးတၢ်အသီတဂၤ, မ့တမ့ၢ် မၤစၢၤ ဒူၣ်ထၢလၢအဟဲတုၤသီ ဖဲပကပၤတဖၣ်န့ၣ်လီၤ. ဖဲပမၤဒ်န့ၣ်, မ့ၢ်ပပာ်ဖျါယွၤ အတၢ်အဲၣ်ဆူပှၤလၢ အဟဲတုၤအသီဒီး ညီနုၢ်မ့ၢ်ပှၤဘၣ်ဒိညီတဖၣ်န့ၣ်လီၤ.