တၢ်ဂီၤမူ (The Courier) န့ၣ် ဘၣ်တၢ်ထိၣ်ဂဲၤဒုးအိၣ်ထီၣ်လၢ တၢ်မၤသးနီၢ်နီၢ်တဖၣ်,ဒီးပှၤဂဲၤဒိမိၢ်ပှၢ် ကရ့ဘ့ (Greville) တဂၤ, ဘၣ်ကွၢ်ဆၢၣ်မဲာ်ဒီးတၢ်ဆၢတဲာ်အကီခဲတမံၤန့ၣ်လီၤ. အဝဲသ့ၣ်ညါထွဲဝဲလၢ အတံၤသကိးတဂၤလၢ အရ့လိာ်သးဘူးဘူးတံၢ်တံၢ်ဒီးအီၤန့ၣ် ကဘၣ်တၢ်ဖီၣ်အီၤ, ဒီးဖျါလၢကဘၣ်လီၤဃိာ်ယံာ်ယံာ်ထၢထၢန့ၣ်လီၤ. ကရ့ဘ့ မ့ၢ်ဃ့ၢ်ပူၤဖျဲးအသးလၢအထံကီၢ်တကီၢ်ခါ, ဒီးမ့ၢ်သမၢဝဲဒၣ်အတၢ်ဘၣ်ထွဲဒီးအတံၤသကိးန့ၣ်ဒီး, ကပူၤဖျဲးဝဲလၢတၢ်ဖီၣ်အီၤန့ၣ်လီၤ. လၢတၢ်အဲၣ်တၢ်သးကညီၤအပူၤန့ၣ်, ကရ့ဘ့ အိၣ်တီဒီးအတံၤသကိး, ဒီးတဃ့ၢ်ပူၤဖျဲးအသးဘၣ်အဃိ, ဘၣ်တၢ်ဖီၣ်န့ၢ် ထၢနုာ်အီၤဆူဃိာ်ပူၤ, ဒီးတူၢ်ဝဲတၢ်နးတၢ်ဖှီၣ်, ဒ်အတံၤသကိးတူၢ်ဘၣ်ဝဲအသိးန့ၣ်လီၤ. အဝဲသ့ၣ်တစူးကွံာ်ညိကွံာ်အသးကဒဲကဒဲဘၣ်. အကတၢၢ်န့ၣ်, ကရ့ဘ့ ထူၣ်ဖျဲးထီၣ်ဝဲလၢဃိာ်ပူၤ, တူၢ်ဘၣ်ခီၣ်ဘၣ်နးနးကျံးကျံးဘၣ်ဆၣ်, အဝဲမ့ၢ်တံၤသကိးနီၢ်နီၢ်, ဒီးအတီအလိၤတဂၤန့ၣ်လီၤ.
နီၢ်နၤဧမံ လိၣ်ဘၣ်ဝဲဒၣ် တံၤသကိးဒ်န့ၣ်အသိးတဂၤန့ၣ်လီၤ. ဖဲအဝၤဒီးအဖိခွါ တဖၣ်သံဝံၤန့ၣ်ဒီး, အဝဲဘၣ်ကွၢ်ဆၢၣ်မဲာ်တၢ်ဖှီၣ်တၢ်ယာ်, ဒီးကဘၣ်က့ၤဝဲဆူအထံအကီၢ် လၢတၢ်လီၢ်အယံၤန့ၣ်လီၤ. ရူၤ ၁:၈-၉ အပူၤန့ၣ် ပကထံၣ်ဘၣ် နီၢ်နၤဧမံ စံးဘၣ်အဒဲၣ်မုၣ် မုၣ်ကမဲနီၢ်ရူၤသး ဒ်သိးကအိၣ်တ့ၢ်ဝဲလၢ မိၤအးအကီၢ်, ဒီးဃုထံၣ်န့ၢ်တၢ်အိၣ်မူအသီ, လၢအနီၢ်ကစၢ်ဒၣ်ဝဲအဂီၢ်န့ၣ်လီၤ. အဆၢဖိ ၁၆ န့ၣ်, နီၢ်ရူၤသး စံးဆၢဝဲလၢ “ဃ့ကညးယၤ ဒ်သိးယကလဲၤသဒၣ်နၤ, ဒ်သိးယသုတပိာ်နခံတဂ့ၤန့ၣ်တဂ့ၤ. အဂ့ၢ်ဒ်အံၤ, ဖဲနလဲၤတၢ် ယကလဲၤယဲ” န့ၣ်လီၤ. လၢတၢ်သးတီအပူၤန့ၣ်, နီၢ်ရူၤသး လူၤပိာ် နီၢ်နၤဧမံအခံ ဆူထံဂုၤကီၢ်ဂၤ, ဒီးမၤစၢၤ လုၢ်အီၣ်လုၢ်အီအပှၤဟံၣ်ဖိန့ၣ်လီၤ. နီၢ်ရူၤသး အတၢ်သူၣ်တီသးလိၤန့ၣ် ဆီတလဲဝဲ အဟံၣ်ဃီလၢအဘၣ်ကီဘၣ်ခဲန့ၣ် ဆူပူလီၤလးတယုၢ်န့ၣ်လီၤ. တၢ်ဆၢကတီၢ်လဲၤပူၤကွံာ်ဖးယံာ်ဝံၤအလီၢ်ခံန့ၣ်, နီၢ်ရူၤသး အလံၤ, စီၤဒၤဝံး ကဲထီၣ်ဝဲဒၣ် ပှၤအံၣ်စရ့လးအစီၤပၤ, ဒီးဘၣ်တၢ်ကိးအီၤဒ်အမ့ၢ် ပှၤလၢအဘၣ်ယွၤအသးတဂၤန့ၣ်လီၤ.
တၢ်ကွၢ်ဆၢၣ်မဲာ်သကိးတၢ်နးတၢ်ဖှီၣ်ဒီးပှၤဂၤန့ၣ် မ့ၢ်တၢ်လၢအလီၤပျံၤလီၤဖုးတမံၤ န့ၣ်လီၤ. ဘၣ်ဆၣ်, ပမ့ၢ်စူးကွံာ်ညိကွံာ်ပနီၢ်ကစၢ်အသးဒၣ်ဝဲ, ဒီးဃုယွၤအဂံၢ်အဘါန့ၣ်ဒီး, ဒ်သိးပကအဲၣ်ပှၤဂၤတဖၣ်လၢ ကျိၤကျဲလီၤဆီတဖၣ်အပူၤအဂီၢ်န့ၣ် အဝဲကမၤစၢၤပှၤ န့ၣ်လီၤ. ခီဖျိလၢယွၤအစိအကမီၤန့ၣ်, ပဃုထၢစံးကတိၤလၢ “ဖဲနလဲၤတၢ်ယကလဲၤယဲ” သ့ဝဲဒၣ်န့ၣ်လီၤ.
