ဖဲ ကၠူလံၣ် (Julie) ဒီးအဝၤသးဘိ သ့ၣ်ညါထွဲဝဲဒၣ်လၢအဖိမုၣ် ဟးဟုၣ်တၢ်လၢကျးန့ၣ်ဒီး, အသူၣ်အုးသးအုး, ဒီးအသူၣ်တမုာ်အသးတမုာ်ဝဲဒၣ်န့ၣ်လီၤ. ဘၣ်ဆၣ်, မ့ၢ်လၢယွၤအတၢ်မၤစၢၤအဃိ, လၢတၢ်သးအုးဒိၣ်မးအပူၤန့ၣ်, အဖိမုၣ်ဟဲဝဲဆူအမိၢ်အပၢ်အအိၣ်န့ၣ်ဒီး, အဝဲသ့ၣ်ပျၢ်အဖိမုၣ် အတၢ်ကမၣ်, ဒ်သိးဒီးကဟ့ၣ်လိးက့ၤတၢ်, ဒီးကဒိးန့ၢ်တၢ်ကူၣ်လိာ်အဂီၢ်န့ၣ် မၤစၢၤဝဲဒၣ်အဖိမုၣ်န့ၣ်လီၤ. စှၤလါပူၤကွံာ်ဝံၤအလီၢ်ခံ, အဖိမုၣ်ကတိၤထီၣ်ဖျဲးဝဲဒၣ်, တမ့ၢ်လၢအမိၢ်အပၢ်ကနာ်အီၤလၢၤဘၣ်န့ၣ်ဒီး, ကၠူလံၣ် ဆိကမိၣ်ဝဲဒၣ်လၢ “မ့ၢ်ယဖိမုၣ်အဲၣ်ဒိးစံးတၢ်မနုၤလဲၣ်.” တၢ်သးဘၣ်ဒိဆါလၢအသးပူၤကံၢ်ပူၤန့ၣ် မ့ၢ်လၢကစၢ်ယွၤထုးသံကွံာ်တ့ၢ်လံအဃိ, တကီၢ်ခါန့ၣ် အဝဲတသ့ၣ်နီၣ်ထီၣ်က့ၤ အဖိမုၣ်အတၢ်မၤကမၣ်လၢၤဘၣ်. တၢ်လၢအမၤတ့ၢ်တၢ်တမံၤအပူၤန့ၣ်, အဝဲတအဲၣ်ဒိးအိၣ်ဆိးဝဲလၢၤဘၣ်အဃိ, ဒ်သိးကပျၢ်ဝဲဒၣ် အဖိမုၣ်အတၢ်ကမၣ်အဂီၢ်န့ၣ် ပာ်လီၤအသးလၢ ကဃ့ထုကဖၣ်ဝဲဒၣ်ကစၢ်ယွၤန့ၣ်လီၤ.
ဒ် ကၠူလံၣ် လဲၤခီဖျိကလၢၢ်ဘၣ်ဝဲ ကစၢ်ယွၤအတၢ်အဲၣ်တၢ်ကွံ, လၢအဟ့ၣ်ဃီၤဆူအပှၤဂီၢ်မုၢ်တဖၣ်အအိၣ်န့ၣ်ဒီး, အကတီၢ်ဖဲန့ၣ်, ကၠူလံၣ် အသးကလၢၢ်ဘၣ် ယွၤအတၢ်ဂ့ၤတၢ်ဝါ, ဒီးအဘျုးအဖှိၣ်န့ၣ်လီၤ. ယရှါ ၄၃:၁၈-၁၉ အပူၤန့ၣ်, မ့ၢ်လၢကစၢ်ယွၤ “ကမၤတၢ်အသီတမံၤ” အဃိ, ယွၤစံးဘၣ်အပှၤဂီၢ်မုၢ် “တၢ်လၢအခီၣ်ထံးတဖၣ်, သ့ၣ်နီၣ်ထီၣ်က့ၤအီၤတဂ့ၤ” န့ၣ်လီၤ. ဖဲအဆၢဖိ ၂၅ န့ၣ် ယွၤပာ်ဖျါထီၣ်ဃံဃံလၤလၤ, ဒီးစံးဝဲဒၣ်လၢ “ယဲဒၣ်အံၤယတြူာ်ကွံာ်နတၢ်သရူးတၢ်ကမၣ် လၢယဂီၢ်ဒၣ်ယဲလီၤ. ယတသ့ၣ်နီၣ်ထီၣ်က့ၤဘၣ် နတၢ်ဒဲးဘးဘၣ်” န့ၣ်လီၤ. ကစၢ်ယွၤမ့ၢ်ဃုထၢစၢဃာ် ပတၢ်ဒဲးဘးန့ၣ် သ့ဝဲဘၣ်ဆၣ်, မ့ၢ်လၢအတၢ်အဲၣ်, ဒီးအတၢ်သးကညီၤအဃိ, တမၤဝဲဒၣ်ဘၣ်. ဖဲပပီၢ်ယၢ်လီၤက့ၤပသးန့ၣ်ဒီး, အဝဲကတြူာ်စီကွံာ်ပတၢ်ဒဲးဘးန့ၣ်လီၤ.
တၢ်လၢပမၤကမၣ်တၢ်, လၢအဘၣ်တၢ်ပျၢ်ကွံာ်အီၤတဖၣ်န့ၣ် ကဘၣ်ဒိဘၣ်ထံးပတၢ်အိၣ်မူ, ဒီးပှၤဂုၤပှၤဂၤအတၢ်အိၣ်မူသ့ၣ်သ့ၣ်န့ၣ်လီၤ. ဘၣ်ဆၣ်, ကစၢ်ယွၤန့ၣ် တစၢဃာ်ဝဲဒၣ် ပတၢ်သရူးကမၣ်န့ၣ်ဘၣ်. အဝဲကဖိးဟုဟံးဃာ်ပှၤလၢ အတၢ်အဲၣ် တၢ်သးကညီၤ, ဒီးအတၢ်ဘျုးတၢ်ဖှိၣ်အပူၤန့ၣ်လီၤ.
