အပူၤကွံာ်စှၤသီန့ၣ်, ဖဲမ့ၣ်ဖီးဂီၤအကတီၢ်, ယအိၣ်ကတီၢ်ယသိလ့ၣ်ဖဲ သိလ့ၣ်ဖိတခိၣ် အလီၢ်ခံန့ၣ်ဒီး, လၢသိလ့ၣ်အလီၢ်ခံမဲာ်ထံကလၤအလိၤန့ၣ်, ယပာ်သူၣ်ပာ်သးယဲလၢ လံာ်က့ကျးစဲအလွဲၢ်စီၣ်တမံၤန့ၣ်, ပာ်ဖျါထီၣ်လံာ်မဲာ်ဖျၢၣ်ဖျါဆှဲတထံၣ် “ပှၤနီၣ်သီသိလ့ၣ်. ဝံသးစူၤ သူၣ်စူၤသးစူၤတက့ၢ်” န့ၣ်လီၤ. ပနၢ်ဟူဘၣ် (မ့တမ့ၢ်လဲၤခီဖျိဘၣ်) ကယဲၢ်တၢ်သူၣ်ဒိၣ်သးဖျိး ဖဲတၢ်နီၣ်သိလ့ၣ်အကတီၢ် (road rage) အဂ့ၢ်န့ၣ်, မ့ၢ်တၢ်လၢအမၤသ့ၣ်နီၣ်ထီၣ်က့ၤတၢ်ဖးဒိၣ်တမံၤလၢ ပကဘၣ်ဝံသးစူၤ ပှၤနီၣ်သိလ့ၣ်အဂၤတဖၣ်န့ၣ်လီၤ.
ဖဲယကွၢ်လီၤလံာ်က့ကျးစဲဖိ, ဒီးယဆိကမိၣ်ထီၣ်ယဲလၢ ပှၤမ့ၢ်ဟးစိာ်ထီ တၢ်ပနီၣ် ဟ့ၣ်ပလီၢ်လၢ အဝဲသ့ၣ်မ့ၢ် “မိၢ်/ပၢ် အသီ”, မ့တမ့ၢ် “ပှၤခရံာ်ဖိအသီ” န့ၣ်ဒီး, တၢ်ကမၤအသးမနုၤတမံၤလဲၣ်န့ၣ်လီၤ. လၢပတၢ်အိၣ်မူအိၣ်ဂဲၤ အမုၢ်နံၤမုၢ်သီတဖၣ်အပူၤန့ၣ် ပမ့ၢ်သ့ၣ်ညါ ပှၤလၢပခိၣ်ပဃၢၤတဖၣ်, ပှၤမၤသကိးတၢ်တဖၣ်, မ့တမ့ၢ် ပှၤအဂုၤအဂၤလၢပထံၣ်ရ့လိာ်သးတဖၣ်န့ၣ် လဲၤခီဖျိဘၣ်ဝဲတၢ်မနုၤလဲၣ်န့ၣ်ဒီး, မ့ၢ်ပတၢ်သူၣ်စူၤသးစူၤကအါထီၣ်, ဒီးလၢအဝဲသ့ၣ်အတၢ်ဂဲၤလိာ်တဖၣ်အပူၤဒၣ်လဲာ် မ့ၢ်ပမၤဂ့ၤမၤစၢၤအဝဲသ့ၣ်ကသ့ဧါ.
လၢပမုၢ်နံၤမုၢ်သီတဖၣ်အပူၤ, ပဂုာ်မၤတၢ်ချ့ချ့, ဒီးပဂုာ်ကျဲးစၢးဟးဆှဲးတၢ် ဒ်သိးဒီး ပှၤဂုၤပှၤဂၤတဖၣ် အသုတမၤတံာ်တာ်ပှၤတဂ့ၤအဂီၢ်သ့ၣ်သ့ၣ်ဘၣ်ဆၣ်, မ်ပကဆိကမိၣ်ထံသကိး, ကစၢ်ယ့ၣ်ရှူး မၤတၢ်ဒီးပှၤဂီၢ်မုၢ်တဖၣ်ဒ်လဲၣ်အဂ့ၢ်န့ၣ်တက့ၢ်. ကစၢ်ယ့ၣ်ရှူးန့ၣ် တဂုာ်မၤတၢ်ချ့ချ့ဘၣ်. မ့မ့ၢ်သူၣ်ကညီၤသးကညီၤ ပှၤဂီၢ်မုၢ်တဖၣ်, ဒီးပှၤလၢအထံၣ်လိာ်သးဒီးအီၤတဖၣ်န့ၣ် ကစၢ်ယ့ၣ်ရှူး ဟံးန့ၢ်တၢ်ဆၢကတီၢ်, ဒီးမၤမုာ်ထီၣ်က့ၤဝဲဒၣ်, ဒီးသိၣ်လိဝဲ, ဒီးပာ်ဖျါထီၣ်ဝဲတၢ်အဲၣ်တၢ်ကွံန့ၣ်လီၤ.
ဒ်ပမ့ၢ်ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်အသိးန့ၣ်, အ့းဖ့း ၄:၁ စံးဘၣ်ပှၤလၢ, ပဘၣ်တၢ်ကိးပှၤ “ဒ်သိးသုကလဲၤဒ်အကြၢးဒီးတၢ်ကိးလၢ တၢ်ကိးက့ၤသုအသိး” န့ၣ်လီၤ. ပှၤတၢ်မၢဖိစီၤပီလူး အတၢ်စံးတၢ်ကတိၤတဖၣ် လၢအဆၢဖိ ၂ အပူၤန့ၣ် ပာ်ဃုာ်ဝဲလၢ “အိၣ်ဒီးကယဲၢ်တၢ်ဆီၣ်လီၤသုသး, ဒီးသူၣ်စူၤသးစူၤ, အိၣ်ဒီးတၢ်ဝံသးစူၤဃဲးဃဲး, ဒီးကီၤသုသး သကိးသကိး လၢတၢ်အဲၣ်တၢ်ကွံအပူၤသတး,” ဒီးအဆၢဖိ ၃ စံးဘၣ်ပှၤလၢ “ဂုာ်ဟံးဃာ်သုသးတဖျၢၣ်ဃီ လၢတၢ်ဃူတၢ်ဖိးအတၢ်စၢဃာ်အပူၤ” န့ၣ်လီၤ.
ပှၤကညီတဖၣ်ဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲမနုၤတဖၣ်လဲၣ်န့ၣ်, ပမ့ၢ်တသ့ၣ်ညါ ဝဲဘၣ်ဆၣ်, ပဝံသးစူၤအဝဲသ့ၣ်သ့ဝဲဒၣ်န့ၣ်လီၤ. မ်ပကမ့ၢ် ပှၤလၢအပာ်ဖျါထီၣ်ကစၢ်ယ့ၣ်ရှူးအတၢ်အဲၣ်ဆူ ပှၤလၢပထံၣ်လိာ်သးကိးဂၤဒဲး လၢပတၢ်လဲၤကိးမုၢ်နံၤအပူၤန့ၣ်တက့ၢ်.
