ဖဲကီၢ်အမဲရကၤ ပှၤကမျၢၢ်အတၢ်ခွဲးတၢ်ယာ် အတၢ်ဟူးတၢ်ဂဲၤ (civil rights movement) အကတီၢ်, လၢ ဝ့ၢ် (New Orleans), ပှၤဖီတၢ်ဖိလၢအမံၤဟူသၣ်ဖျါ လံၣ်ဧၣ် ခၠ့း (Leah Chase) တဂၤ, တၢ်လၢအမၤဝဲသ့န့ၣ်, မၤဝဲဒၣ်န့ၣ်လီၤ. ဒ်သိးပှၤခဲလၢာ်ကဒိးန့ၢ်ခွဲးယာ် ဒ်သိးသိးအဂီၢ်, ပှၤဂီၢ်မုၢ် လၢအလဲၤဟးဒုးနဲၣ်ဖျါထီၣ်အတၢ်ပာ်သး လၢကျဲခိၣ်တဖၣ်အဂီၢ်, အဝဲကတဲာ်ကတီၤတၢ်အီၣ်တဖၣ်, ဒီးဒုးအီၣ်ဒုးအီဝဲဒၣ်န့ၣ်လီၤ. အဝဲစံးဝဲ “မ့ၢ်ဒၣ် ယဒုးအီၣ်ဒုးအီကမျၢၢ်တဖၣ်န့ၣ်လီၤ. အဝဲသ့ၣ်ဂဲၤလိာ်ဝဲလၢ တၢ်တမံၤမံၤအဂီၢ်, ဒီးလၢကျဲခိၣ်လိၤန့ၣ်, ကဘၣ်ကွၢ်ဆၢၣ်မဲာ်ဒီးတၢ်မနုၤလဲၣ်န့ၣ် အဝဲသ့ၣ်တသ့ၣ်ညါဘၣ်. လၢကျဲတဖၣ် အလိၤန့ၣ် တၢ်ကမၤအသးဒီးအဝဲသ့ၣ် မနုၤတမံၤလဲၣ်န့ၣ် ပှၤတသ့ၣ်ညါဘၣ်. ဘၣ်ဆၣ်, ဖဲပှၤဂီၢ်မုၢ်အိၣ်ဝဲလၢ ကျဲခိၣ်လိၤန့ၣ်ဒီး, သ့ၣ်ညါဝဲလၢ ယကဒုးအီၣ်ဒုးအီအဝဲသ့ၣ်န့ၣ်လီၤ. လၢအဝဲသ့ၣ်အဂီၢ် တၢ်မၤအံၤ မ့ၢ်တၢ်လၢယမၤသ့န့ၣ်လီၤ.”

ဘၣ်တဘျီဘျီ, တၢ်ဟ့ၣ်တမံၤလၢအမ့ၢ် တၢ်အဲၣ်တူၢ်တံၤတူၢ်တမှံၤန့ၣ် ဘၣ်တၢ်ကွၢ် ကပာ်အီၤဘၣ်ဆၣ်, မ့ၢ်တၢ်လၢအကါဒိၣ်ထဲသိးသိးဒီးကျိၤကျဲအဂုၤအဂၤတဖၣ်, လၢတၢ်မၤဂ့ၤမၤစၢၤလိာ်သးကဒဲကဒဲ, လၢကစၢ်ခရံာ်အပူၤန့ၣ်လီၤ. မၤ ၁၆:၁၁-၁၄ န့ၣ် ပကထံၣ်ဘၣ် ပိာ်မုၣ်လၢအမၤ ပနံာ်တၢ်ကၤအတၢ်မၤတဂၤ, အမံၤလၢနီၢ်လူၤဒံ န့ၣ် မ့ၢ် “ပှၤလၢအဆါ တၢ်လုးတကုာ်” ဒီးပာ်ဖျါထီၣ်တၢ်အဲၣ်တူၢ်တံၤတူၢ်တမှံၤဆူ စီၤပီလူးဒီးပှၤစိာ်ခရံာ်အတၢ်သးခုကစီၣ်တဖၣ် ဆူပှၤမၤက့းဒနံဖိတဖၣ်အအိၣ်န့ၣ်လီၤ. ဒ်သိး ကမၤစၢၤ ပှၤလဲၤတၢ်ဖိတဖုအဂီၢ်န့ၣ် တၢ်လၢအအိၣ်ဒီးအီၤ- အဟံၣ်ဃီ- န့ၣ် စူးကါဝဲဒၣ်န့ၣ်လီၤ. အဆၢဖိ ၁၅ န့ၣ် အဝဲတူၢ်လိာ်တၢ်သးခုကစီၣ်ဝံၤအလီၢ်ခံ, အဝဲဟ့ၣ်ထီၣ် တၢ်လီၢ်တၢ်ကျဲလၢ ပှၤစံၣ်တဲၤတဲလီၤတၢ်ဖိတဖၣ် ကအိၣ်ဘှံးအိၣ်သါအဂီၢ်, ဒီးစံးဝဲဒၣ် “သုမ့ၢ်ပာ်ယၤလၢ ပှၤစူၢ်က့ၤနာ်က့ၤကစၢ် နီၢ်နီၢ်ဒီး, ဟဲအိၣ်ဟဲဆိးလၢယဟံၣ်ပူၤတက့ၢ်.” ဒ်ပှၤလၢအမၤ ကမျၢၢ်တၢ်ခွဲးတၢ်ယာ်အဂီၢ်တဖၣ် ဒိးန့ၢ်ဝဲတၢ်အီၣ်တၢ်အီအသိးန့ၣ်, မ့ၢ်လၢနီၢ်လူၤဒံအတၢ်အဲၣ်တူၢ်တံၤတူၢ်တမှံၤအဃိ, စီၤပီလူးဒီးအပှၤမၤသကိးတၢ်တဖၣ် တလိၣ်ကိၢ်ဂီၤဘၣ်ဝဲလၢတၢ်အီၣ်အဂီၢ်ဘၣ်န့ၣ်လီၤ.

တၢ်တူၢ်တံၤတူၢ်တမှံၤ အတၢ်ဟ့ၣ်တဖၣ်န့ၣ် ကဲဘျုးကဲဖှိၣ်အါမး လၢတၢ်မၤစၢၤပှၤခဲလၢာ်- ပှၤစူၢ်က့ၤနာ်က့ၤတၢ်ဖိတဖၣ်ကဒဲကဒဲ,ဃုာ်ဒီးပှၤလၢအလိၣ်ဘၣ်ကစၢ်ယ့ၣ်ရှူးတဖၣ်န့ၣ်လီၤ. ဒ်သိးပကမၤစၢၤပှၤဂၤအဂီၢ်န့ၣ် မ့ၢ်လၢကစၢ်ယွၤကတဲာ်ကတီၤန့ၢ်ပှၤ တၢ်လၢပလိၣ်ဘၣ်အဃိ, မ်ပကမၤဂ့ၤမၤစၢၤပှၤဂုၤပှၤဂၤန့ၣ်တက့ၢ်.