အါနဲး ဟဲမ့ဝ့ (Ernest Hemingway) အပူဖုၣ်တဖၣ်အကျါ, ပူအိၣ်ဝဲတယုာ် လၢအဘၣ်ဃးဒီး ပှၤစပ့ၣ်ဖိတဂၤလၢ အဆၢထံၣ်လိာ်က့ၤအသးဒီးအဖိခွါ, လၢအအိၣ်လီၤဖးဒီးအီၤ, တဆဲးကျိးရ့လိာ်သးဒီးအီၤလၢၤဘၣ်တဂၤန့ၣ်လီၤ. ပၢ်တဂၤအံၤ ထၢနုာ်လီၤတၢ်ဘိးဘၣ်သ့ၣ်ညါတမံၤ လၢလီၢ်ကဝီၤတၢ်ပရၢပစၢၢ်အပူၤ, လၢအပာ်ဖျါထီၣ်ဝဲ “ပၣ်ကိၣ် (Paco) ဧၢ, ဟဲထံၣ်ယၤလၢ မိၤတၤနၤ သမှံၤဟံၣ် (Hotel Montana) ဖဲမုၢ်ယူာ်နံၤ, မုၢ်ထူၣ်အဆၢကတီၢ်န့ၣ်တက့ၢ်. တၢ်ခဲလၢာ်ဘၣ်တၢ်ပျၢ်ကွံာ်လံ” န့ၣ်လီၤ. ဖဲပၢ်တဂၤအံၤလဲၤတုၤဝဲဒၣ်န့ၣ်ဒီး, ထံၣ်ဝဲလၢပှၤအိၣ်ခိးအီၤဒီဂီၢ်န့ၣ်လီၤ. ပှၤကအိၣ်ဝဲအဂၤဃိးကယၤ, လၢအမံၤမ့ၢ် ပၣ်ကိၣ် န့ၣ် စံးဆၢက့ၤအတၢ်ဘိးဘ့ၣ်သ့ၣ်ညါ, ဒီးဆၢမုၢ်လၢ်ဝဲလၢ အဝဲသ့ၣ်အပၢ်တဖၣ် ကပျၢ်အဝဲသ့ၣ်အတၢ်ကမၣ်န့ၣ်လီၤ.
ပူလၢအထိးဘၣ်ပှၤအသးတယုၢ်အံၤ ပာ်ဖျါထီၣ် ပနီၢ်ကစၢ်ဒၣ်ဝဲ ပသးဆၢမိၣ်န့ၢ် အဒိၣ်အယိာ်လၢ ပကဘၣ်တၢ်ပျၢ်ကပာ်ကွံာ်ပတၢ်ဒဲးဘး, ဒီးဒုးသ့ၣ်နီၣ်ထီၣ်က့ၤယၤ ပူတယုၢ်လၢ ကစၢ်ယ့ၣ်ရှူး ပာ်ဖျါဝဲန့ၣ်လီၤ. ဖဲလံာ် လူးကၣ် ၁၅:၁၃-၁၄ န့ၣ်, ပှၤသးစၢ်တဂၤ ဟးထီၣ်ဝဲလၢအပၢ်အအိၣ် ဒ်သိးကဃုအိၣ်မူဝဲ “လၢတၢ်လုၣ်ကိလုၣ်ကပာ်အပူၤ” ဘၣ်ဆၣ်, တယံာ်ဘၣ်န့ၣ် ဘၣ်ကွၢ်ဆၢၣ်မဲာ်တၢ်ကီတၢ်ခဲတဖၣ်န့ၣ်လီၤ. အဆၢဖိ (၁၇) ဒီး (၂၀) ပာ်ဖျါဝဲဒၣ်, ဖဲဖိတဂၤအံၤ “သ့ၣ်နီၣ်လီၤက့ၤအသး” ဒီးဟဲက့ၤဆူဟံၣ်န့ၣ်ဒီး, တချုးလၢဖိတဂၤအံၤ ဃ့ကညးဝဲအပၢ်ဒံးဘၣ်ဒၣ်လဲာ်, အပၢ်လၢအပာ်တ့ၢ်ဝဲတဂၤန့ၣ်, ဃ့ၢ်သဘျိၣ်ဆူအအိၣ်, ဒီးဖိးဟုအီၤန့ၣ်လီၤ. ဖဲအဆၢဖိ (၂၄) န့ၣ်, ပၢ်တဂၤအံၤ စံးဝဲဒၣ်လၢ တၢ်သးခုအပူၤ, “ယဖိခွါလၢအသံတ့ၢ်တဂၤအံၤ, မူထီၣ်က့ၤလံ, ဒီးဟါမၢ်တ့ၢ်, ဒီးဘၣ်တၢ်ထံၣ်န့ၢ်က့ၤအီၤလံ” န့ၣ်လီၤ. ပူတယုၢ်အံၤအပူၤန့ၣ်, ပၢ်တဂၤအံၤ မ့ၢ်ကစၢ်ယွၤ, ဒီးဖိခွါန့ၣ် မ့ၢ်ဝဲဒၣ် ပဝဲနၤယၤ, ဒီးဖဲပဟဲက့ၤဆူပပၢ်လၢမူခိၣ်အအိၣ်အကတီၢ်န့ၣ်ဒီး, တၢ်သးခုအိၣ်ပှဲၤဝဲလၢမူခိၣ်န့ၣ်လီၤ.
မ့ၢ်လၢပမၤကမၣ်တၢ်အဃိ, တၢ်ပျဲပျၢ်ကွံာ်ပတၢ်ဒဲးဘးန့ၣ် မၤဖှံထီၣ်ပသးလၢအဃၢန့ၣ်လီၤ. ဘၣ်ဆၣ်, တၢ်ပျဲပျၢ်ကွံာ်ပတၢ်ဒဲးဘးန့ၣ် ပကဘၣ်တူၢ်လိာ်အီၤ ဒ်အမ့ၢ်တၢ်ဟ့ၣ်တမံၤန့ၣ်လီၤ. လၢ ဟဲမ့ဝ့ အပူပူၤန့ၣ်, ပၢ်တဂၤအံၤ မ့ၢ်ထံၣ်လိာ်က့ၤအသးဒီးအဖိခွါ ပၣ်ကိၣ်ဧါန့ၣ် တၢ်တပာ်ဖျါထီၣ်အီၤနီတဘျီဘၣ်. လၢကစၢ်ယ့ၣ်ရှူးအပူပူၤ ပၢ်ယွၤတဂၤ, မ့ၢ်အဖိခွါ, အဖိမုၣ်တဖၣ် ကဟဲက့ၤဆူအအိၣ်ဧါ. ကစၢ်ယွၤ ယူာ်ဃီၤဝဲအစု, ဒီးအိၣ်ခိး ကွၢ်လၢ်ပတၢ်စံးဆၢန့ၣ်လီၤ.
