ပှၤသူဖံးဖိအဆိကတၢၢ်တဂၤ လၢအလိာ်ကွဲ ခ့ခါ ဖျၢၣ်တီၢ်အတၢ်လိာ်ကွဲ ကရၢမိၢ်ပှၢ် (Major League Baseball) န့ၣ် မ့ၢ်ဝဲဒၣ် ကၠဲးကံၣ် ရီၣ်ဘ့စၢၣ် (Jackie Robinson) န့ၣ်လီၤ. လါမ့ၤ (၉) သီ, ၁၉၄၇ နံၣ်, ဖဲအဝဲလိာ်ကွဲတၢ်လၢ ရှံၣ်ဘဲ (Shibe Park) တၢ်လိာ်ကွဲပြၢ အပျီဖးဒိၣ်, ဖဲဝ့ၢ် ဖံၣ်လဒဲဖံယၢၣ် (Philadelphia) အကတီၢ်, ဒီရ့း(စ) (Doris), အသးအိၣ်အနံၣ်တဆံဖိတဂၤဒီးအပၢ်န့ၣ်, ခိးကွၢ်ဝဲ ပှၤလိာ်ကွဲတၢ် ဖဲပျဲၢ်စီၢ် ကွၢ်ကီတၢ်အဖီခိၣ်
တကထၢန့ၣ်လီၤ. ဖဲန့ၣ် ပှၤသူဖံးသးပှၢ်တဂၤ ဟဲလီၤဝဲလၢခးဆ့ၣ်နီၤတဖၣ်အကဆူးကျဲ, ဒီးဆ့ၣ်နီၤဝဲလၢ အဝဲသ့ၣ်အကပၤန့ၣ်ဒီး, အပၢ်န့ၣ် စံးကတိၤသကိးတၢ်ဒီးအီၤန့ၣ်လီၤ. ဒီရ့း(စ) စံးဝဲဒၣ် အဝဲသ့ၣ်ကတိၤသကိးတၢ် ဘၣ်ဃးဒီးတၢ်လိာ်ကွဲနီၢ်ဂံၢ်အဖီးအဂ့ၢ်န့ၣ် အသးကလၢၢ်ဘၣ်ဝဲဒ် “ပှၤဒိၣ်တုာ်တဂၤ”အသိးန့ၣ်လီၤ. လၢခံ Doris ပာ်ဖျါထီၣ်က့ၤဝဲလၢ “ပှၤသးပှၢ်တဂၤအံၤ, ဒီးအမဲာ်သၣ်နံၤကမှံဖိန့ၣ် ယတသးပ့ၤနီၣ်ယဲ နီတဘျီဘၣ်” န့ၣ်လီၤ. မုၢ်နံၤအအံၤတနံၤဖိလၢ တၢ်ရ့လိာ်စံးကတိၤသကိးတၢ်အမုာ်အလၤ လၢ ဒီရ့း(စ) ပှၤဝါဖံးဖိသၣ်မုၣ်ဖိတဂၤ, ဒီးကုၢ်အဖိခွါ ပှၤသးပှၢ်သူၣ်ဂ့ၤသးဝါတဂၤအံၤအဘၢၣ်စၢၤန့ၣ် မ့ၢ်ဝဲမုၢ်နံၤကပြုၢ်ကပြီၤအဃံအလၤတနံၤန့ၣ်လီၤ.
ဘၣ်ဆၣ်, ရီၣ်ဘ့စၢၣ် ဘၣ်ကွၢ်ဆၢၣ်မဲာ် တၢ်သးဟ့ လၢတၢ်ပြၢအဂၤတဘျီ, ဖဲ တၢ်လိာ်ကွဲအကတီၢ် (season) တကတီၢ်ဃီန့ၣ် မ့ၢ်ဝဲတၢ်ဂ့ၢ်လၢအလီၤဆီလိာ်အသးလၢာ်လၢာ်ဆ့ဆ့တမံၤန့ၣ်လီၤ. အတၢ်လဲၤခီဖျိန့ၣ် ပာ်ဖျါက့ၤ “ကမျၢၢ်တဖၣ် စံးကတိၤဆဲးအဲးယၤလၢ ကယဲၢ်တၢ်ကတိၤအၢသီအရၢၢ်အစၢၢ် ဘၣ်ဃးဒီးဖံးဘ့ၣ်အတၢ်လီၤဆီန့ၣ်လီၤ.”
တၢ်ပာ်သူၣ်ပာ်သးလၢအမၤဆါတၢ်, လၢအတအိၣ်ဒီးတၢ်သးကညီၤဘၣ်န့ၣ် တမ့ၢ်ဝဲဒၣ်ထဲလၢ တၢ်လိာ်ခိၣ်လိာ်ကွဲအပျီပူၤန့ၣ်ဘၣ်. လၢဟံၣ်လၢဃီ, လၢပခိၣ်ဃၢၤ, ပတၢ်ဖံးတၢ်မၤအလီၢ်, ဒီးလၢပတၢ်အိၣ်ဖှိၣ်တဖၣ်အပူၤဒၣ်လဲာ်, ကဲထီၣ်ဝဲလၢ တၢ်တဃံတလၤမၤနၢၤတၢ်သ့ဝဲ အလီၢ်အကျဲတဖၣ်န့ၣ်လီၤ. ဘၣ်ဆၣ်, ယွၤလၢအဒုးနဲၣ်ဖျါတၢ်သးကညီၤ ခီဖျိအဖိခွါ (ကွၢ်ဖဲ တံတူး ၃:၄) တဂၤန့ၣ်, အသးအိၣ်ဝဲလၢ ပှၤစူၢ်က့ၤနာ်က့ၤကစၢ်ယွၤတဖၣ် ကမၤတၢ်တမံၤဃီ ဒ်သိးဒီးအီၤန့ၣ်လီၤ. ၁ ပ့း ၃:၈-၉ အပူၤန့ၣ်, စီၤပ့းတရူး စံးဝဲဒၣ်လၢ “မ်ပှၤခဲလၢာ်ကဲထီၣ်ပှၤသးတဖျၢၣ်ဃီ, ပှၤဒိးဃုာ်တၢ်, ပှၤအဲၣ်ဒီပုၢ်ဝဲၢ်, ပှၤသးကညီၤတၢ်, ပှၤဆီၣ်လီၤအသးန့ၣ်တက့ၢ်. လၢတၢ်အၢအဃိန့ၣ်, ဟ့ၣ်ကၣ်တၢ်အၢတဂ့ၤ, လၢတၢ်ဒုၣ်ဒွဲၣ်အဃိန့ၣ်, ဟ့ၣ်ကၣ်တၢ်ဒုၣ်ဒွဲၣ်တဂ့ၤ” န့ၣ်လီၤ. ခီဖျိလၢသးစီဆှံ အတၢ်မၤစၢၤန့ၣ်, ဖဲပှၤဒိးန့ၢ်တၢ်သးကညီၤလၢယွၤတဖၣ်န့ၣ်, မ့ၢ်ဟ့ၣ်ခီနီၤလီၤ တၢ်သးကညီၤဆူပှၤဂၤတဖၣ် လၢတၢ်သးအိၣ်အပူၤန့ၣ်ဒီး, တၢ်သးကညီၤ ကမၤနၢၤတၢ်န့ၣ်လီၤ.
