ကၠီး ဘၢဝၢၣ် (George Verwer) အတၢ်အိၣ်မူ ဆီတလဲအသးလီၤလိာ်လီၤလး, ဖဲစူၢ်က့ၤနာ်က့ၤကစၢ်ယ့ၣ်ၡူး, ခီဖျိလၢ သရၣ်ဖးဒိၣ် ဘ့လ့ၣ် ကရ့ဟၣ် စံၣ်တဲာ်တဲလီၤ တၢ်သးခုကစီၣ် (Billy Graham crusade) ဖဲ ၁၉၅၇ နံၣ်န့ၣ်လီၤ. အတၢ်အိၣ်မူ ဆီတလဲလိာ်
အသးဝံၤတယံာ်ဘၣ်န့ၣ်ဒီး, စးထီၣ်ဝဲ တၢ်သးခုကစီၣ်အတၢ်ကရၢကရိ (Operation Mobilization- OM), ဒီးဆှၢလီၤဝဲ ၦၤမၤတၢ်သးခုကစီၣ် အဂၤ ခံကထိ ဆူ ကီၢ်ယူရပၤ, ဖဲ ၁၉၆၃ န့ၣ်လီၤ. အိၣ်အဲ(မ) အတၢ်ကရၢကရိအံၤ ဂုၤထီၣ်ပသီထီၣ်, ဒီးကိးမုၢ်နံၣ်န့ၣ် ဆှၢလီၤဝဲ ၦၤလၢအကထိ, ဒီးကဲထီၣ်ဝဲဒၣ် တၢ်သးခုကစီၣ်ကရၢ အဒိၣ်ကတၢၢ်တဖၣ်အကျါ တကရၢ, ဖဲနံၣ်ကယၤ ခံကထိ အကတီၢ်အပူၤန့ၣ်လီၤ. ဖဲ ကၠီး သံဝဲဖဲ ၂ဝ၂၃ နံၣ်န့ၣ်ဒီး, တၢ်ကရၢအံၤ အၦၤမၤတၢ်ဖိတဖၣ်န့ၣ် အိၣ်ဝဲဒၣ်အါန့ၢ် အဂၤ ၃ဝဝဝ လၢထံကီၢ် ၁၃၄ ကီၢ်, ဒီးအဝဲသ့ၣ်မၤတၢ်လၢ ထံကီၢ် ၁၄၇ ကီၢ်အပူၤန့ၣ်လီၤ. ခီဖျိလၢတၢ်ဘၣ်ထွဲဒီး အိၣ်အဲ(မ) အဃိ, တၢ်သးခုကစီၣ်ကရၢကရိ အဂၤ ၃ဝဝ ဃၣ်ဃၣ်န့ၣ် ဘၣ်တၢ်သူၣ်ထီၣ်အီၤန့ၣ်လီၤ.

ဒ် တၢ်မၢဖိ စီၤပီလူးအသိးႇ ကၠီး တဂၤ အသးအိၣ်ဆှၢဝဲ ၦၤဂၤဆူ တၢ်စူၢ်က့ၤနာ်က့ၤကစၢ်ခရံာ်, လၢတၢ်အုၣ်က့ၤထီၣ်က့ၤအဂီၢ်န့ၣ်လီၤ. စီၤပီလူး လဲၤဝဲဆူ ဝ့ၢ်ဒၤမ့ၤစ့း အကျဲအကတီၢ်, အတၢ်အိၣ်မူ ဆီတလဲအသးလီၤလိာ်လီၤလးလၢဝံၤ, ကဲထီၣ် ၦၤသူၣ်ဆူၣ်သးဆူၣ်, လၢအစိာ်တၢ်သးခုကစီၣ် လၢယွၤအဂီၢ်န့ၣ်လီၤ. အသူၣ်ဆူၣ်သးဆူၣ်ဝဲလၢ တၢ်မၤထွဲ ကစၢ်ယ့ၣ်ၡူးအတၢ်မၤလိာ်, ဒ် မး၂၈:၁၉ ပာ်ဖျါဝဲအသိး, “လဲၤဒုးကဲထီၣ် ၦၤအကလုာ်တဖၣ်ခဲလၢာ်လၢ ယပျဲၢ်ယဘီၣ်တက့ၢ်” န့ၣ်လီၤ. လၢအတၢ်သးခုကစီၣ် အတၢ်လဲၤတဖၣ်န့ၣ် စီပီလူး သိၣ်လိနဲၣ်ယုၤ စီၤတံၤမသ့း, ဒီးၦၤအဂၤတဖၣ် ကလဲၤဒီးမၤဒ်သိးအီၤအဂီၢ်န့ၣ်လီၤ.

ခီဖျိလၢသးစီဆှံ အတၢ်နဲၣ်ဆှၢ စီၤပီလူး အတၢ်ကွဲးတဖၣ်အဃိ, လၢနံၣ်ကယၤ တစိၤဘၣ်တစိၤ, ပှၤကညီတဖၣ် အိၣ်ဒီးတၢ်သူၣ်ဒူသးဒူလၢ ကနီၤဟ့ၣ်လီၤ တၢ်သးခုကစီၣ်န့ၣ်လီၤ. ကစၢ်ယ့ၣ်ၡူး အတၢ်မၢလီၤတၢ်ဖးဒိၣ်, ဖဲ မး ၂၈:၁၉-၂ဝ န့ၣ် မ့ၢ်တၢ်လၢအကါဒိၣ်ကတၢၢ်တမံၤလီၤန့ၣ် စီၤပီလူး သ့ၣ်ညါဝဲဒၣ်န့ၣ်လီၤ. လၢတၢ်န့ၣ်အဃိ, ဖဲ ရိမ့ၤ ၁၂:၁၁ အပူၤန့ၣ် စီၤပီလူး ဟ့ၣ်ပလီၢ်ၦၤ, “လၢတၢ်မၤသၦၢ်ၦၢ်န့ၣ်, သုတဝံသးကၢၣ် တဂ့ၤ. လၢသူၣ်လၢသးအဂ့ၢ်န့ၣ် ဂဲၤလိာ်သုသးတက့ၢ်. လၢကစၢ်အဂ့ၢ်န့ၣ် မၤအတၢ်တက့ၢ်” န့ၣ်လီၤ. ယွၤအသးစီဆှံ မ့ၢ်အိၣ်မူအိၣ်ဂဲၤလၢပပူၤန့ၣ်ဒီး, သးစီဆှံ ကမၤဆူၣ်ထီၣ်ပသး ဒ်သိးပကစံးဘၣ်တဲဘၣ် ၦၤဂၤလၢ ကစၢ်ခရံာ်အဂ့ၢ်န့ၣ်လီၤ.