ယမၤတၢ်ဒ်အမ့ၢ် ၦၤတဂၤလၢအိၣ်ဆိးကွၢ်ထွဲယမိၢ်အကတီၢ်, ဘၣ်တနံၤန့ၣ်, ပလဲၤဟးကွၢ်ကီ တၢ်ဒုးနဲၣ် စုသ့ဒွဲလၤအတၢ်ဖံးတၢ်မၤန့ၣ်လီၤ. ပလၢာ်ဂံၢ်လၢာ်ဘါ, လီၤဘှံးလီၤဘှါလၢနီၢ်ခိဒီးနီၢ်သး အကပၤကပၤန့ၣ်လီၤ. ယကွၢ်ထံကွၢ်စူၣ် ချံ ခံဘ့ၣ် ဘၣ်တၢ်မၤအီၤလၢ သ့ၣ်ဘၣ်ဘ့ၣ်, ဒီးဘၣ်တၢ်မၤၦဲၤအီၤလၢ ယွၤခၣ်စိးအလွဲၢ်အါကလုာ်, ဒီးဘၣ်တၢ်ကတဲာ်ကတီၤအီၤလၢ ၦၤယပၣ် (Japan) ဖိ အတၢ်တခွဲညၣ်, ဒီးဖီဖိတဖၣ်န့ၣ်လီၤ. တၢ်ဒုးနဲၣ်ဖျါ အံၣ်ကံၣ်ဘၤနၤ တၢ်ကယၢကယဲဖီ, ဒီးချံဖိတဖၣ် လၢထံဖီခိၣ် (Ikebana and Float Boats) တထံၣ်အံၤ အိၣ်ဆိးဝဲလၢ တၢ်ဒူၣ်အသူ အမဲာ်ညါ, ဒီးတၢ်ဆဲးကပီၤဖျါက့ၤတၢ်အမဲာ်ဖံးခိၣ်န့ၣ်လီၤ. တၢ်လၢအလီၤဂာ်ဒီးစံၣ်ပိလိအဖီးဖိႇ တၢ်ကံၣ်ဃ့ကံၣ်ဃာ်ဖိတဖၣ်, ဒီးယွၤခၣ်စိးအလွဲၢ်အပျ့ကဝီၤဖိတဖၣ်န့ၣ်, ဘၣ်တၢ်ပူၣ်ဆီထီၣ်အီၤလၢ ချံအဆံးဖိ အလိၤန့ၣ်လီၤ. ချံ ခံဘ့ၣ်တဘ့ၣ်အကုလိၤန့ၣ်, ယွၤခၣ်စိးအထီႇ လၢအဝံာ်ပကံးအသး, ဒီးက့ၣ်ကွီၤတဖၣ်န့ၣ် ဘၣ်တၢ်စိးပျၤဝဲ ဒ်ဖီတၢ်ဆှူၣ်, လၢအလီၤဂာ်ဒီးမဲာ်အူလၣ်ကပျီၤထီၣ်အသိးန့ၣ်လီၤ. ၦၤလၢအတ့တၢ်ဂီၤစိးပျၤ ယွၤခၣ်စိးအက့အခီတဖၣ်လၢမဲာ်အူ, ခီဖျိလၢတၢ်အူမၤကဆှီထီၣ် ယွၤခၣ်စိးအကျိၤအကျဲန့ၣ်လီၤ.

ယမဲာ်ထံယွၤလီၤလၢယဘိးပၤလိၤ, ဖဲလၢယဆိကမိၣ်ထီၣ် ယွၤအတၢ်ကဟုကယာ်အစုန့ၣ် ဟံးဃာ်ယၤဒီးယမိၢ်, လၢအမ့ၢ် အဖိတဖၣ်လၢအအဲၣ်ဝဲ, ဖဲပမုၢ်နံၤအကီခဲကတၢၢ်တဖၣ်အပူၤန့ၣ်လီၤ. ဒ်ကစၢ်ယွၤ တ့စိးပျၤ အၦၤဂီၢ်မုၢ်အသကဲာ်ပဝးလၢမဲာ်အူ, ဒီးမၤကဆှီထီၣ်ဝဲ တၢ်အိၣ်မူပူၤအသိးႇ ယၡါ ၄၃:၁ အပူၤန့ၣ် ယွၤမၤဂၢၢ်မၤကျၢၤဝဲလၢ ပတၢ်မုၢ်လၢ် အိၣ်ဟဲဝဲလၢ ယွၤသ့ၣ်ညါပှၤ, ဒီးပသ့ၣ်ညါလၢ ပမ့ၢ်ယွၤအတၢ်န့ၣ်လီၤ. အဆၢဖိ ၂ ပာ်ဖျါဝဲလၢ, ပဟးဆှဲးတၢ်ကီတၢ်ခဲ တန့ၢ်တသ့ဘၣ်ဆၣ်, ယွၤအၢၣ်လီၤဝဲလၢ ကတဒီတဒၢၦၤ, ဒီးကအိၣ်ဒီးၦၤန့ၣ်လီၤ. အဆၢဖိ ၃-၄ စံးဘၣ်ပှၤလၢ ကစၢ်ယွၤ အတၢ်မ့ၢ်တၢ်, ဒီးအတၢ်အဲၣ်လၢပဂီၢ်န့ၣ် မၤဂၢၢ်ကျၢၤအတၢ်အၢၣ်လီၤတဖၣ်န့ၣ်လီၤ. ဖဲလၢသးသမူအတၢ်အိၣ်အသးမၤအသးတဖၣ် ကိၢ်ထီၣ်နးထီၣ်အကတီၢ်, ပသး အဂံၢ်ဘါကစၢ်လီၤ, ပသးကဟးဂီၤညီဝဲ သ့ၣ်သ့ၣ်န့ၣ်လီၤ. ပနီၢ်ကစၢ် အသးဂံၢ်ဘါ
ကလီၤစၢ်ဝဲဘၣ်ဆၣ်, ဖဲလၢတၢ်ကိၢ်ကဖးဆူၣ်ဒိၣ်မးထဲလဲၣ်ဂ့ၤထဲလဲၣ်ဂ့ၤန့ၣ် ကစၢ်ယွၤ ဟံးဃာ်ပၢၤဃာ်ၦၤ အဂၢၢ်အကျၢၤ, လၢအတၢ်အဲၣ်အပူၤန့ၣ်လီၤ. ပဘၣ်တၢ်သ့ၣ်ညါၦၤန့ၣ်လီၤ. ပဘၣ်တၢ်အဲၣ်ၦၤန့ၣ်လီၤ. ပမ့ၢ်ကစၢ်ယွၤအတၢ်န့ၣ်လီၤ.